Уæрæсей Æхсæнадон палати иуонгтæ косгæ балций иссудæнцæ Цæгат Иристонмæ. Сæ нисан адтæй Дзæуæгигъæуи æфсæддон госпитæли кусти хæццæ базонгæ ун.

Раздæри рагон тугъдон поликлиники бæсти 2020-аг æнзти исаразтонцæ нæуæг æма парахат бæстихай. Æ косгутæ куд зæгъунцæ, уотемæй алцæмæй дæр хуарз ефтонг æй. Сæрмагонд æфсæддон операций архайгутæ реабилитаци цæунцæ физиотерапевтон къæбинети, ес си бонигон стационар терапевтон хайади бундорбæл, æндæр равгитæ. Госпитæлæн æхеми ци специалисттæ нæ фагæ кæнунцæ, зæгъæн, нейрохирург, уони уайтæккæ ’рбахонунцæ æндæр медицинон косæндæнттæй. Гъуддæгутæ конд цæунцæ графикмæ гæсгæ.

Уæрæсей Æхсæнадон палати иуонгти æфсæддон гиспитæли кусти хæццæ базонгæ кодта æ разамонæг, медицинон служби болкъон Аркадий Смольников. Куд загъта, уотемæй госпитæли ирæзти стратегимæ гæсгæ гъæуама фæззиннонцæ кафедритæ æма клиникитæ. Уой фæдбæл æ загъд адтæй:

– Куддæр нæмæ инфекцион незти хирургий æма травматологий кафедритæ фæззиннонцæ, уотæ рæнгъæмæ рахæсдзинан госпитæлæй тугъдон-клиникон  косæндонæ исаразуни фæндæ. Уони исæнхæст кæнун нæ зæрди æй 2026 анзи уæнгæ, нур ба бал куст цæуй незтæ дзæбæхгæнæн-æртасæн бæстихаййи арæзтадæбæл», – фæббæрæг кодта медицинон служби болкъон.

Поликлиники бæрни æнцæ дæсгай мин адæймаги – тугъдонтæ, сæ бийнонтæ, сæрмагонд æфсæддон операций ветерантæ. Штат æнхæстæй дæр æй конд, ес си травматологтæ, офтальмологтæ, ЛОР-дохтиртæ, урологтæ, эндокринологтæ, психиатртæ, стоматологтæ, туни диагностики специалисттæ æма клиникон лабораторий косгутæ. Афтеки хуастæ дæттунцæ лæвар.

Иуазгутæ куд радзурдтонцæ, уотемæй сæ балцийæй аразийæй байзадæнцæ, госпитæли еугур уавæртæ, равналæнтæ ’нцæ æнаййеп.