Республики цæрæнуæтти æма архитектурон-арæзтадон цæстдарди паддзахадон службæмæ фæззиндтæй разамунддæттæг компанити рейтинг. Уой аразгæй, нимад цудæнцæ аллихузон бæрæггæнæнтæ лæггадæ кæнуни фæзуæттæ, еуварсгонд феппайуйнæгтæ, прокуратури æрмдзæф, цæргути хæццæ æмбурдти нимæдзæ æма уотæ идарддæр.

Уæлдай æргом раздахтонцæ  цæргути хæццæ æмбурдти нимæдзæмæ, феддонти бæрцæмæ, разамунддæттæг компанити æма хæдзæртти хецæутти ’хсæн æмгустадæмæ. Республики цæрæнуæтти æма архитектурон-арæзтадон цæстдарди паддзахадон служби разамонæги ихæстæ рæстæгмæ æнхæстгæнæг Дмитрий Кабацкий куд фæббæрæг кодта, уотемæй берæфатерон хæдзæртти еу хай райзадæй æнæ разамунддæттæг компанитæй, гъома, æнцæ æнæ хецау.

Дзæуæгигъæуи разамунди хæццæ нуриуæнгæ исаразтонцæ кусти пълан, аци мæйи кæронмæ дæс æма дууинсæй  берæфатерон хæдзари  бакæндзæнæнцæ нæуæг разамундæттæг компанити бæрни. Æнæ хецауæй ци 273 хæдзари райзадæнцæ, уони уавæрæн дзуапп дæттуй сахари бунæттон хеунаффæйади администраци. Закъони етæ бæрæггонд æнцæ. Уавæр домуй гъæугæ политикон бундор. Разамунддæттæг компанитæн гъæуама сæ архайд уа сæребарæдæр хузи, цæстдарæг оргæнти ’рдигæй æвзаронцæ минкъий гъосдард, тарифти ирæзтæн дæр фадуæттæ гъæуама уа.

Уотемæй, берæфатерон хæдзæрттæн фæззиндзæнæй нæуæг разамунддæттæг компанитæ. Дзæуæгигъæу зумæгмæ цæттæгæнæн куститæбæл нур нæ хъæртуй. Районти æмбесæн сæ бон бацæй æнæ хецау хæдзæртти еу хай зумæгмæ бацæттæ кæнун, иннетæбæл ба ма нерæнгæ куст цæуй.

Нæ уацхæссæг