Цæгат Иристони Сæргълæууæг Сергей Меняйло ин разамунд лæвардта, уотемæй æрæги Мæздæги райони арæзт æрцудæй террори нихмæ республикон къамиси æмбурд. Дзубанди си цудæй террористон æма экстремистон идеологи парахат кæнуни нихмæ ахедгæ мадзæлттæ æнхæст кæнуни фарстати фæдбæл.

Æмбурди радзубанди кодта Мæздæги райони сæргълæууæг Гутнати Геннади. Е куд фегъосун кодта, уотемæй Мæздæги райони уой фæдбæл ци куст æнхæстгонд цæуй, уой туххæй. 2025 анзи райдайæнæй райони арæзт æрцудæй 140 мадзали терроризм æма экстремизми профилактики, нацити ’хсæн бастдзийнæдтæ, ирæзгæ фæсевæди ’хсæн патриотон гъомбæладон куст ахедгæдæр кæнуни нисанеугутæй.

Республики еудадзуг цæстдард цæуй Интернети, мухур æма электрон дзиллон фæрæзнити мæнгæ хабæртти фæрци региони цæргутæбæл психологон æгъдауæй гъомус кæнунмæ ка гъавуй, еци дуйнеуон террористон организацитæ, украинаг сæрмагонд службитæ, нигулæйнаг пропагандæгæнæн центртæ, неонацистон æма националистон организацитæмæ. Еци кусти мухур æма дзиллон коммуникацити Комитетæн агъаз кæнунцæ Фæсевæди социализаци æма Регионтæн фæткæдæттæг центртæ, сæ хæццæ еумæйаг хъауритæй информацион тугъдади разæнгардæй профилактикон мадзæлттæ аразунцæ.

Республики фæзуати æнæзакъон дæрæнгæнæн фæрæзнитæ парахат кæнун, уой хæццæ сæ Уæрæсей Федераций паддзахадон арæнти сæрти æрбаласуни уавæртæ райеуварс кæнуни туххæй доклад искодтонцæ Республикæ Цæгат Иристон-Аланий Уæрæсей Æдасдзийнади федералон служби Арæнгъæуайгæнæн управлений хецау Сергей Балакин æма Цæгат Иристони Медгъуддæгути министради пъæлици хецауи хуæдæййевæг Нанити Роберт.

– Абони ахсгиаг объекттæ терроризмæй багъæуай кæнун æма терроризми профилактики мадзæлттæ аразун вазуггин гъуддаг æй. Æма мах гъæуама æмхъауритæй архайæн фидбилизтæ ма ’руадзуни туххæй, – къамиси кусти кæронбæттæни загъта Сергей Меняйло.