Æма бабæй нæ дзубанди райдайæн Бабочити Русланæн æхе æмдзæвгити зæгъдтитæй:

Æз дуйне уидтон мин хузи,

Сæдæ хузи ба – и цард,

Мæхецæн дæр нури уæнгæ

Нæма дæн, цума фæсмард.

Нæ зонæн, Руслан æхецæн цæйбæрцæбæл æвæсмард æй, фал цæйбæрцæбæл æргом фæсмард æй нæ дзиллæн, е ба бæлвурдæй зундгонд æй.

Уомæн еума æвдесæн иссæй, æрæги ин Дзæуæгигъæуи Национ наукон киунугæдони ци исфæлдистадон цитгингæнæн мадзал арæзт æрцудæй, е. Нæ бон æй федарæй уотæ зæгъун, æма е рауадæй æцæгæй дзиллон – æрæмбурд си æй берæ адæм, хестæртæ дæр æма кæстæртæ дæр, аллихузон кустгæнгутæ… Еу загъдæй, нæ национ литературæ æнæгъæнæй дæр, уой хæццæ ба Бабочити Руслани исфæлдистадæ зæрдтагон кæмæн æй, еци адæм.

Мадзали рæстæг дзубандий куд амунд æрцудæй, уотемæй Бабочити Руслан æмдзæвгитæ  финсун райдæдта  Чиколай астæуккаг скъолай 5-аг къласи ку ахур кодта, уæд.

Æригонæй  ни æмдзæвгитæ ка ба нæ финста, фал беретæ, куд байлæгъдæр кæниуонцæ, уотæ еци гъуддагбæл устурзæрдæ кæнун байдайиуонцæ. Фал Руслан æ еци тулавастбæл нæ исустурзæрдæ ’й. Ка ’й зонуй, уомæй фæрразæнгард æй кодта, е ’мдзæвгитæ ин рæстæгæй-рæстæгмæ ке мухур кодтонцæ райони газети. Куд фæстæдæр, уотæ æ исфæлдистадон архайд берæвæрсугдæр кодта, медесгун æмдзæвгитæй финсунæй уæлдай райдæдта наукон æртасæн куст кæнун дæр нæ национ аййевадон литератури классикти туххæй. Уони ’хсæн – Малити Геуæрги, Ходи Камал, Кертанти Тæхир… Нарти эпоси туххæй дæр имæ ес критикон куст. Бабочий-фурт ма ниффинста æ райгурæн гъæу Чиколай туххæй очерктæ, уой хæццæ ба ма ’й уой  гимни дзурдти автор.

Нæкæси, æ исфæлдистадон мадзалмæ Руслан, куд фæззæгъунцæ, ревæд къохтæй не ’рбацудæй, ка си архайдта, уони зæрдитæ е ’мдзæвгити нæуæг æмбурдгондæй барохс кодта. Исхудта ’й «Фæстаг мæтæ».

Поэт æхуæдæг æ радзубандий  куд загъта, уотемæй æй бафæндадтæй, аци æмбурдгондмæ бахæссун æхемæ гæсгæ ин æ зундирахаст æма æ зæрдиуагæ еуцæйбæрцæдæр æнхæстæй ка æвдесуй, æ еци æмдзæвгитæй. Æ загъд адтæй:

– Нæ тæрсун ирисхъæй æма зæруæйæй, мæ абони сагъæстæ æма мæтæ ’нцæ исонибонбæл. Материалон æгъдауæй хуæздæр цæрун райдæдтан, фал нæ уодварни хæзнатæ нæ цардæй исæфунцæ. Мæн бæргæ фæндуй нæ рагфидтæлти æгъдæуттæ, фæткитæ раздахун сæ меддуйней хæзнати хæццæ, æма сæ кæстæр фæлтæрмæ раттун, нæ фидтæлтæ сæ махæн устур хæзнайæн куд ниууагътонцæ, еци хузи…

Еугæр дзубанди Бабочий-фурти нæуæг киунуги туххæй рацудæй, уæд æнæмæнгæ уой дæр зæгъун гъæуй, æма ин æ рауадзуни зæрдиагæй фæййагъаз кодта  Цæгат Иристони æнхæстбаргин минæвар Идард Искæсæни Хидирти Валери. Æма ин мах дæр Руслани æмбæрцæ арфæ кæнæн æ хуарздзийнади туххæй. Уой хъæппæрес æвдесæн æй уомæн, æма æ уарзон адæми уодварнон цардгъондзийнадæбæл æцæгæй ка тухсуй, етæ уой фæдбæл бæлвурд гъуддæгутæ аразунцæ.

Мадзали рæстæг Руслани цардвæндаги хабæртти æма æ исфæлдистади алæмæтдзийнади туххæй берæ рæсугъд зæгъдтитæ райгъустæй. Арфи финстæг имæ ’рбарвиста нæ республики Сæргълæууæг æма Хецауади Администраций разамонæг Гобети Ибрагим дæр. Æма си уотæ загъд ес: «Дæ исфæлдистадон над, дæ бæркадгун архайд  æнцæ ирд æвдесæн  нæ фидибæстон литератури сæрбæлтау куд архайун гъæуй, уомæн. Дæ финсæн сесæй исфæлдист æгæрон берæ уадзимистæ, аккаг бунат ниййахæстонцæ нæ литератури сугъзæрийнæ хæзнадони  тæрхæгбæл, уони фæрци нури фæлтæрæн сæ меддуйне  фæгъгъæздугдæр æй…»

Мадзали рæстæг айдагъ арфи радзубандитæ æма æмдзæвгитæ кæсунæй нæ райевгъудæй. Ци адæм си æрæмбурд æй, уони зæрдитæ сæ исфæлдистадæй барохс кодтонцæ зундгонд артисттæ, райгъустæнцæ поэти æмдзæвгитæбæл финст зартæ, ракодта сæ Секъинати Майя. Тæккæ хъазардæр лæвар ба юбилярæн адтæй æ бæдоли бæдолæ Олег ин е ’мдзæвгитæ ке бакастæй, е.

Иуазгути размæ радзубанди кæнгæй, Бабочити Руслан баханхæ кодта, æхе амондгун адæймагбæл ке нимайуй, уой. Æ цардвæндагбæл цæугæй, æ хæццæ æмдзо кæнуй æ еузæрдиуон цардæмбал Земфирæ, æ цæуæт æма уони цæуæт, уони лæдæрундзийнадæ æма фарсхуæцуни фæрци  æ къохæй  федар æма нифсгунæй  хуæцуй финсæн сесбæл…

Ку зæгъæн, мадзали рæстæг берæ адæм радзубанди кодтонцæ, уонæн сæ еугурей зæгъуйнæгтæ ниммухур кæнуни равгæ нин нæййес. Уомæ гæсгæ дзурди барæ дæттæн зундгонд поэт Мамукъати Хъазбегæн –  е æй  Бабочити Русланæн æ «зæнæги» – æ киунугути –  сæ устур балций ка рафæндараст кодта. Хъазбег адтæй Руслани æмдзæвгити æмбурдгонд «Къурцдзæвæн»-и редактор, уæдта мæнæ æ нæуæг киунугæ «Фæстаг мæтæ»-йи редактор дæр. Фиццаг киунугæн ма раздзурд ниффинста. Æма си уæд ци гъудитæ зæгъта, уонæй кæцидæрти абони æримисæн.