Устур Фидибæстон тугъди архайæг, Цæгат Иристони адæмон финсæг Цæгæрати Максим æ тугъдон æмдзæвгитæй еуеми æ тохи зарæн, ниннæрæ арвнæрæгау, зæгъгæ, фæдзæхсгæй финста:

Нæ дзыллæтæн æрæмбырд кæн сæ уарзтад,

Сырх уæйгуытæн æй тохы фæзы ратт.

Цæмæй сæ ныфсыл

Авд ныфсытæ бафта ноджы,

Цæмæй сæ гæрзтæ алмаситау уой,

Æмæ бынтон фашистон куыйты ’рдонджы

Ницъцъист кæной,

Куыднæуал уа сæ кой!..

Тугъдон финсæги аци нистауæн хумæтæги нæ æримистан – абони дæр бабæй нæ дзилли багъудæй, ка иснæуæг æй æма маргæйдзаг цъух нæмæ ка бахæлеу кодта, уой  нихмæ карз тохи бацæун. Еци зин ихæс исæнхæст кæнун ба сæхемæ райстонцæ нæ сахъ фæсевæд. Етæ знаги нихмæ комкоммæ ’рлæугæй, уодуæлдайæй тох кæнунцæ нæ Фидибæсти, нæ рæстади сæрбæлтау. Уомæй си сæрустур ан. Фал уой дæр гъæуама лæдæрæн, æма цийфæнди æхсаргин адæймагæн дæр уæззау хъазауати рæстæг зæрдæхцæуæн уодзæнæй хуæрзауодæн, е æй никки хъæбæрдæр разæнгард кæнуй æ тохи. Уомæ гæсгæ ба мах ихæсгин ан нæ тугъдонтæбæл ауодунæй. Æма уомæй ба нæ дзиллæ еузæрдиуон æнцæ, ке бон куд æй, уотæ æ агъази хай хæссуй еугурадæмон гъуддагмæ.

Сæрмагонд æфсæддон операций æма сæ бийнонтæн агъаз кæнуни фæдбæл паддзахади ’рдигæй дæр  берæ зæрдæмæдзæугæ мадзæлттæ арæзт цæуй. Æма еци гъуддаги нерæнгæ ци бантæстæй æма ма æнæмæнгæ ци банхæст кæнун гъæуй, уобæл æрæги бабæй дзубанди цудæй Уæрæсей Федераций Паддзахадон совети сæрмагондæй арæзт урухгонд æмбурди.

Æмбурди радзубанди кодта Паддзахадон Совети нимæрдар Алексей Дюмин. Æма куд фегъосун кодта, уотемæй сæрмагонд æфсæддон операций архайгутæ æма сæ бийнонтæн, тугъдон цаути ветерантæн конд цæуй устур агъаз. Фал уой хæццæ ба ма ес, æнæмæнгæ æнхæсткæнуйнаг ка ’й, уæхæн берæ аллихузон фарстатæ дæр. Уой фæдбæл загъта:

– Царди уагæ уотæ ’й, æма еугур фарстатæ рагацау нæ исбæлвурд кæндзæнæ, кæцидæртæ фæстæдæр рабæрæг унцæ. Æма аци гъуддаги ци нæуæг сагъæссаг фарстатæ ес, уони райаразуни фæдбæл дæр нисангонд æрцæуй гъæугæ мадзæлттæ. Еци куст æй еудадзугон. Уой хæццæ ба ма уой дæр зæгъун гъæуй, æма гъæуама абони цæттæ уæн, нуртæккæ тугъди цæхæри ка ’й, етæ тагъд рæстæги сæ хæдзæрттæбæл ке исæмбæлдзæнæнцæ, уомæ.

– Мах ихæс æй, уонæбæл цæттæй исæмбæлун, хуарз цæстæй сæмæ ракæсун, байауодун  сæбæл. Уой дæр, еунæг хатт нæ, фал еудадзугдæр. Аци фарстатæ нур дæр æвзурст цæунцæ, кæсуй сæмæ профилон къамис, еци кусти архайунцæ сæхуæдтæ ветерантæ дæр.

Сæрмагонд æфсæддон операций архайгутæн агъази паддзахадон фонд «Фидибæстæ гъæуайгæнгутæ»-йи сæрдар Аннæ Цивилева ба æ радзубандий фегъосун кодта:

– Дууæ анземæ нæ фондæн бантæстæй тугъдон архæйдтити ветерантæн агъаз кæнуни алæмæти ахедгæ системæ исаразун, бæлвурдæй алли ветеранмæ дæр хецæн æргом æздæхт цæуй.  Абони дзубанди кæд кæнæн, нуриуæнгæ нæ къохи ци бафтудæй, уонæбæл, уæддæр нæ сæйрагдæр сагъæс ба ’й, нæ размæ ма ци лухкæнуйнаг гъуддæгутæ лæуунцæ, етæ: медицинон агъаз, санаторон-курортон дзæбæхкæнуйнадæ æма кусти бунæттæ иссерун. Сæ зиндзийнæдти хæццæ гъæуама еунæгæй ма байзайуонцæ.

Уæрæсей Паддзахадон Совети æмбурди  хатдзæгтæмæ гæсгæ, федаргонд æрцудæнцæ, куд æнæмæнгæ æнхæсткæнуйнаг, уотæ дууинсæй фæндони. Етæ æмзæлон æнцæ, аци гъуддаги фæдбæл Уæрæсей Президенти фæдзæхстити хæццæ. Гъæуама сæрмагонд æфсæддон операций архайгутæн арæзт цæуонцæ еугур уавæртæ дæр, етæ гъæуама есонцæ медицинон, психологон, социалон реабилитаций мадзæлттæ, кусти бунæттæ агоруни дæр сæ рази балæууонцæ, мадта сæ бийнонтæн дæр лæвæрд цæуй алливæрсуг агъаз.

Совети æмбурди архайдта Цæгат Иристони Сæргълæууæг Сергей
Меняйло дæр. Æма æ загъдмæ гæсгæ, уоми ци берæвæрсуг дзубанди рауадæй, уæдта си унаффитæ хаст æрцудæй, етæ ахедгæ хузи фæббæрæг уодзæнæнцæ сæрмагонд æфсæддон операций архайгутæн, ветерантæн, сæ бийнонтæн агъаз кæнуни гъуддаги. Куд баханхæ кодта, уотемæй Цæгат Иристони куст нимад æй ахсгиагдæртæй-ахсгиагдæрбæл. Кадæриддæр си архайуй, етæ æвдесунцæ бæрзонд бæрнондзийнадæ, зæгъæн, ес хуарз фæлтæрддзийнадæ «Фидибæстæ гъæуайгæнгутæ»-йи  регионалон фонди хæццæ æмгустади, еумæйаг архайди фæрци æнхæстгонд  цæуй аллихузон агъаздзийнадæ. Уотæ фæллойни æма социалон райрæзти министради хæццæ дæр, æ сæргъи лæууй сæрмагонд æфсæддон операций архайæг, Уæрæсей Бæгъатæр Абайти Юри. Е хуарз лæдæруй тугъддонти еугур сагъæстæ. Республики æ хъаури бацудæй ахурадон программæ «Иристони æхсарæ», уой кæронбæттæнмæ ка рацудæй, етæ стажировкæ кæнунцæ хецаудзийнади алли æмвæзади къабæзти. Уой фæсте син сæ гæнæнтæ æма равгитæмæ гæсгæ лæвæрд цæудзæнæй кусти бунæттæ.

Сергей Меняйло æ дзубандий ци æхцæуæн хабæртти кой искодта, уонæй еу е æй, æма республики фæззиндтæнцæ бархеуон къуæрттæ, етæ багъæуаги ахзедгæ хузи агъаз кæнунцæ æфсæддонти бийнонтæн.

Нæ республики разамонæг ци хабæртти кой ракодта, уони туххæй мах дæр нæ газети рæстæгæй-рæстæгмæ мухур кæнæн аллихузон æрмæгутæ, еци гъуддагмæ идарддæр дæр мах æрдигæй æргом æздæхт цæудзæнæй.