Ахургæнæги Бони кадæн Дзæуæгигъæуи сувæллæнтти исфæлдистади Галауани арæзт æрцудæй цитгин мадзал. Уоми архайдта нæ республики Сæргълæууæг Сергей Меняйло. Е нæ республики ахуради къабази фæллойнæгæнæг дзиллæн зæрдиагæй райарфæ кодта сæ бæрæгбони фæдбæл. Сæрмагондæй баханхæ кодта уой, æма, куд Цæгат Иристони, уотæ нæ Фидибæсти исонибон аразгæ æй нæ кæстæр фæлтæрти гъомбæлгæнгути æновуд фæллойнæй. Æ загъд адтæй:

– Ахургæнæг разæнгарддзийнадæ æма цардиуагæ ’й. Беретæ еци дæснийадæн сæ цард иснивонд кодтонцæ. Фал ци гъуддаг равзурста, уомæ фагæ уарзондзийнадæ кæмæ нæ разиннуй, е си берæ нæ бафæстеуат уй. Сумах уæ зæрдæмæ хæстæг райсетæ, ци сувæллæнтти ахур æма гъомбæл кæнетæ, уони. Сумахæй кæнгæ ’й, уæ гъомбæлкæнуйнæгтæ цæбæл æма куд исахур уодзæнæнцæ. Алли ахургæнуйнагæн дæр уæ хъауритæ, рæстæг æма зæрди гъар ке  дæттетæ, уомæ гæсгæ сæ царди байахæссетæ ахсгиаг бунат. Уæ профессионалон бæрæгбони фæдбæл уин арфæ кæнун, уæ зин, бæстон æма бухсон кусти туххæй. Мæ зæрдæ уин зæгъуй федар æнæнездзийнадæ, æведуйгæ уæлкурдиадæ, нæуæг æнтæстдзийнæдтæ уæ кусти, сæйрагдæр ба – арфæгæнæг ахурдзаутæ!

Идарддæр Сергей Меняйло ахуради къабази косгутæн равардта паддзахадон хуæрзеугутæ.

Республикæ Цæгат Иристон-Аланий Сæргълæууæги указмæ гæсгæ æригон фæлтæри ахур æма гъомбæладæмæ устур æвæрæн бахæссуни туххæй майдан «Иристони намусæн» лæвæрд æрцудæй: Цæгат Иристони базарадон-экономикон колледжи директор Æбити Валерийæн, фæндзæймаг профессионалон училищей директор Гаджити Хъазбегæн, Цæгат Кавкази арæзтадон техникуми директор Гуриати Георгийæн.

Науки æскъуæлхтдзийнæдтæ æма берæанзон æнтæстгин кусти туххæй Республикæ Цæгат Иристон-Аланий науки æскъуæлхт архайæги кадгин ном лæвæрд æрцудæй Цæгат Иристони Хетæгкати Къостай номбæл паддзахадон университети фæсарæйнаг æвзæгти кафедри разамонæг Дрети Джанеттæн.

Педагогон архайд æма бæрзонд профессионалон æскъуæлхтдзийнæдти туххæй Республикæ Цæгат Иристон-Аланий æскъуæлхт ахургæнæги ном райстонцæ: Горæтгæрон райони Æнагъом натуралистти уæлæнхасæн ахуради педагог Уалити Ритæ, Хумæллæги гъæуи Социалистон Фæллойни Бæгъатæр Кокайти Саламгерий номбæл скъолай физикон культурæ æма спорти ахургæнæг Дзампати Барис, Ногири гъæуи Хугай-фурти номбæл аййевæдти скъолай хузæкæнуйнади ахургæнæг Хъайсунти Екатеринæ, сахар Дигорай Къесати Астани номбæл дуккаг скъолай физики ахургæнæг Хъодзасти Аннæ, сахар Мæздæги Уæрæсей Федераций Бæгъатæр К. Шишкини номбæл æвдæймаг скъолай технологий ахургæнæг Нелли Лукожева, Октябригъæуи дуккаг скъолай математики ахургæнæг Плити Ларисæ, сахар Беслæни æстæймаг скъолай райдайæн кълæсти ахургæнæг Хæблиати Иринæ.

Педагогон архайд æма бæрзонд профессионализми æскъуæлхтдзийнæдти туххæй Республикæ Цæгат Иристон-Аланий ахуради  æскъуæлхт косæги ном лæвæрд æрцудæй: Психологон-педагогон реабилитаци æма коррекций центри директор Бритъиати Зæлинæн, Цæгат Кавкази аграрон-технологон колледжи мастер Гайти Заяйæн, Цæгат Иристони Паддзахадон медицинон академий ахурадон-гъомбæладон кусти проректор, биологон химий кафедри разамонæг Аллæ Гуринайæн, ахурадон центр «Интеллект»-и гъомбæлгæнæг Дзоблати Регинæн, Цæгат Иристони Хетæгкати Къостай номбæл паддзахадон университети алгебрæ æма анализи кафедри профессор Хъойбайти Владимирæн, сахар Мæздæги Сувæллæнтти исфæлдистади центри уæлæнхасæн ахуради педагог Наталья Ломакинайæн, Дзæуæгигъæуи берæфадуатгин техникуми директори хуæдæййевæг ахурадон-гъомбæладон кусти Мукагъати Иветæн, сахар Мæздæги æстæймаг скъолай директор Дмитрий Скрыльниковæн, Дзæуæгигъæуи электроники колледжи ахургæнæг Хубати Мæдинæн.

Ахургæнгутæ сæхуæдтæ дæр райарфæ кодтонцæ республики Сæргълæууæгæн, ахурадон къабазæмæ гъосдард æма сæ кустæн бæрзонд аргъи туххæй.

Нæ уацхæссæг