Аци бæнтти Дзæуæгигъæуи æ куст кодта Цæгат Кавкази фиццаг хатт арæзт Æхсæнадæмон æлхæнæн сесси. Æ сæйраг нисан – Цæгат Иристон æма Уæрæсей иннæ регионти уагъд продукций экспортон гæнæнтæ фæуурухдæр кæнун.

Мадзали архайдтонцæ уæрæсейаг агъазиаудæр продукциуадзæг кустуæттæ æма ритейлхизти минæвæрттæ Гурдзийæй, Иранæй, Еугонд Араббаг Эмираттæй, Казахстанæй, Узбекистанæй, Хонсар Иристонæй. Æ кусти ма архайдтонцæ Цæгат Кавкази федералон зилди æнхæстгæнæг хецаудзийнади оргæнти минæвæрттæ.

Сессий архайдта æма нæ иуазгутæн зæрдиагæй райарфæ кодта нæ республики Хецауади Сæрдар Дзанайти Барис. Æ радзубандий баханхæ кодта æмгустади ауæхæн хузи устур ахедундзийнадæ æма загъта, иристойнаг товаруадзгутæ æхсæнадон базаради æнæмæнгæ гъæуама ке архайуонцæ.

Æ загъдмæ гæсгæ, фарæ еумæ райсгæй, нæ республики экспорти бæрцæ, æхцай фæрæзнитæй нимайгæй, адтæй 90 миллион доллæремæй фулдæр, гъома, продукцийæй – 360 тонни. Уонæн сæ фулдæр хай, 80 проценти – агропромышленнон къабази уагъд продукци.

Дзанай-фурт ма куд загъта, уотемæй абони базаради экспортон æздæхт ирæзуй национ проект «Æхсæнадæмон коопераци æма экспорт»-и фæлгæти, æма еци кусти устур ахедундзийнадæ ес республикæ æма Уæрæсейаг экспортон центри æмгустадæн.

– Абони мæ бон федарæй зæгъун æй, федералон æмкосгути хæццæ нæ берæанзон æнгом архайдæн ке ес зингæ æвæрццæг фæстеугутæ. Айдагъ евгъуд анз Уæрæсейаг экспортон центр фæййагъаз кодта нæ товар уадзгутæй 350-æн. Е ахедгæ бæрæггæнæн æма устур нимæдзæ ’й мах субъектæн. Уомæй уæлдай ма, Цæгат Иристони  æнтæстгинæй архайуй регионалон центр экспортæн агъазæн. Ами лæггæдтæ есунцæ минкъий æма рæстæмбес амалгъонади субъекттæ. Царди уагъд цæуй регионалон экспортон стандарт, бафедар кодтан экспортон стратеги, æвзурст æрцудæй, ка ’й æнхæст кæндзæнæй, еци къуар. Нæ республики уагъд цæуй, базаради устур аргъ кæмæн ес, уæхæн продукци. Цæмæй раппæлæн, е нæмæ ес. Нæ продукци агурд æй нæ бæсти иннæ регионти дæр. Æма ахсгиаг гъуддаг æй, цæмæй нæ амалгъонтæ пайда кæнонцæ, паддзахадæ æма ирæзти федералон институттæ ци агъази мадзæлттæ дæттунцæ, уонæй.

Мадзали архайгутæн фадуат адтæй сæ фæлтæрддзийнадæй кæрæдземæн фæххай кæнунæн, сæ цæстингас зæгъунæн, уæдта, ци цæлхдортæ исæвзуруй, уони ралух кæнунæн еумæйагæй унаффитæ рахæссунæн.