Нæ адæми æгъдæутти туххæй дзубандитæ кæнгутæн сæ загъд фулдæр хæтти фæууй: «Нæ фидтæлтæмæ æгъдау уæхæн адтæй!..»

Уæхæн дзубандитæгæнæги æ зонундзийнæдтæ ин исбæлвурд кæнуни рæуагæй минкъий ку разгелай, уæд уайтæккæдæр рабæрæг уй, ци куд æй æцæгæй, уой ба уоййасæбæл зонгæ дæр ке нæ фæккæнуй, фал кæмæйдæр цидæр фегъуста, æма ибæл ниццæггаг æй.

Уотемæй ба, æцæгæй ци куд æй, уой бæлвурдæй базонунæн ес хуарз равгæ. Нæ фидтæлтæ сæ цардиуагæ ци табуйаг æгъдæуттæмæ гæсгæ аразтонцæ, уони цитгиндзийнади туххæй финст ка ’рцудæй, еци медесгун наукон æма публицистон æрмæгутæ лæмбунæгдæрæй кæсун æма си пайда кæнуни фæрци.

Махмæ гæсгæ, уæхæн пайдахæссæг исуиуонцæ нæ номдзуд ахургæндтæй еу, историон наукити доктор, профессор Мæхæмæтти Хадзирæти фурт Æхсарбеги (1920-1983) историон-этнографион куститæ дæр. Абони уæ зонгæ кæнæн æ уацтæй еуей хæццæ (3-6-аг фæрстæбæл). Кæддæр ма ’й мухур кодтан, фал æй нæуæгæй æримисун раст уодзæнæй, уæлдайдæр ба уомæ гæсгæ, æма абони бабæй берæ дзубанди цæуй нæ адæми уодварнон уаги хецæн фæткити фæдбæл. Æхсæнадон æзмæлд «Аланти Нихæс» ба ма иснæуæг кæнуйнаг æй «Æгъдауи скъола»-й куст. Нæ зонæн, цæбæл си цæудзæнæй дзубанди, амонгутæ си ка уодзæнæй, уой, фал син кæдимайди ба аци æрмæг дæр хуарзæн исбæззидæ.