Не ’нсувæрон республики театри артисттæ æртæ боней дæргъи сæ спектакльтæ æвдистонцæ Тæбæхсæути Балой номбæл паддзахадон Ирон академион театри сценæбæл. Иристони номæй иуазгутæн зæрдæбун арфæ ракодта республики культури министр
Гудиати Батрадз:

– Нæ культурон бастдзийнæдтæ аци бонæй нæ ’нцæ, берæ æнзти дæргъи  нин хуарз æгъдау иссæй кæрæдземæ гастрольти цæун. Мæ бон æй уотæ зæгъун дæр, æма Иристони сумах иуазгутæ нæ айтæ, цума уæхемæ айтæ, уотæ æнгъæлетæ уæхе. Раст уотæ фенгъæлунцæ  сæхе Ирон театри артисттæ дæр абхазаг сценæбæл…

Гудиати  Батрадз Цæгат Иристони Культури министради Кади гæгъæдитæй исхуарзæнхæгин кодта Абхази драмон театри генералон директор, Абхазий æма Хонсар Иристони æскъуæлхт артисткæ Хибла Мукбайи, театри режиссер-æвæрæг Мадинæ Аргуни æма Абхази адæмон артист Хагба Кесоуи.

– Абони махæн уæлдай ахсгиаг бон æй. Нæ театри номæй мæ фæндуй райарфæ кæнун Ирон театри коллективæн, уæлдай цитгин нæ кæнунцæ. Цæгат Иристон æма Абхази ’хсæн хæлардзийнадæ дзубандитæй нæй, фал арф, æнæхийнæ, рæстæги цуди ка нæ  нидæн кæнуй, уæхæн рахастдзийнæдтæй. Абони гастрольтæ ’нцæ æвдесæн, нæ хæлардзийнадæ федардæр ке кæнуй, уомæн. Арфæ кæнун театрæн, уæлдайдæр ба æ аййевадон разамонæг Уалити Гивийæн, нæуæгæй бабæй таурæхъон сценæбæл ке лæууæн, уой туххæй. Аци анз нæ театрæн юбилейон æй, æнхæст ибæл кæнуй 95 анзи. Нæ юбилейон анз Иристонмæ гастрольтæй ке райдæдтан, е уæлдай æхцæуæн æй махæн. Арфæ кæнун дууæ республикей культури министрадтæн – нуртæккæ гастрольти цæун нæ рæстæги æнцон гъуддаг нæй. Кæд идард ан, уæддæр уæ цийнæбæл цийнæ кæнæн, уæ зинбæл зин кæнæн, – зали бадгути зæрдитæ æ зæгъуйнæгтæй балхæдта Хибла Мукба æма театрæн балæвар кодта абхазаг театри хузæгæнгути куст.

Æртæ спектакли æрласта Абхази театр – трагеди Федерико Гарсиа Лоркайи фæстаг пьесæмæ гæсгæ æвæрд спектакль «Дом Бернарды Альбы», Евгений Шварци аргъаумæ гæсгæ æвæрд спектакль, комеди «Голый Король» æма Алексей Гогуай роман «Большой снег»-мæ гæсгæ æвæрд драмæ «Асцу». Гастрольти фæстаг бон, театрдзаути тæрхонмæ рахастонцæ, абхазаг адæмти уæззаудæр дзаман – 1911 анзи тухгин метуарди рæстæг, зиндзийнæдти сæрти бахезгæй, сæ нифс ке нæ расастæй æма ке багъæуай кодтонцæ сæ традицитæ, культурæ æма зундирахаст.

ХЕКЪИЛАТИ Маринæ