ЦÆРИКЪАТИ Римæ æ хуæрзеуæг ин дæттуни рæстæг нæ республики культури министр ГУДИАТИ Батрази хæццæ.

Дзæуæгигъæуи Туйгъанти Махарбеги номбæл аййевадон музейи æрæги кадгин уавæри исцитгин кодтонцæ нæ республики исфæлдистадон архайгутæй къуарей. Цæмæй нæ национ аййевадæ бæрзонддæр æма игъустгонддæр уа айдагъ Цæгат Иристони нæ, фал æнæгъæнæ Уæрæсей æма дуйней дæр, цæмæй фæлтæрæй-фæлтæрмæ гъæуайгонд цæуонцæ æма гъæздугдæр кæнонцæ нæ адæми уодварни хæзнатæ, еци табуйаг гъуддагмæ сæ бæрзонд искурдиади фæрци агъазиау æвæрæн ке хæссунцæ, уой туххæй хуарзæнхæгонд æрцудæнцæ аллихузон паддзахадон хуæрзеугутæй. Уой фæдбæл син сæ еугуремæн мах дæр зæрдиагæй арфæ кæнæн. Уæлдай æхцæуæн ба нин е æй, æма бæрзонд аргъгонд ке ’рцудæй зундгонд зартæгæнæг
Цæрикъати Римæн дæр – исаккаг ин кодтонцæ Цæгат Иристони адæмон артисти кадгин ном. Аци хабар нин уæлдай æхцæуæн ба уомæ гæсгæ ’й, æма Римæ адæмон артисти номи аккаг æй, дзубанди дæр ибæл нæййес, æ бæрзонд искурдиади æма æ исфæлдистадон берæ фæллæнтти туххæй, уомæй сæйрагдæр ба – æ исфæлдистадæ æцæгæйдæр адæмæн зæрдтагонæй уарзон æма æхцæуæн ке ’й, уомæ гæсгæ. Цæрикъати Рими уоййасæбæл ке исцитгин кодтонцæ, е ма нин уæлдай æхцæуæн æй уомæ гæсгæ дæр, æма нæ газети редакцийæн æй хуарз æмбал, æ хуæрзауодæг, æ фарсхуæцæг. Царикъати Рими байвæрæн нæ республики театралон аййевадæмæ агъазиау æй. Мæскуй Щукини номбæл театралон институт каст фæууни фæсте æй кæд нæ бæсти сæйраг сахари зундгонд театртæ сæхе сценæмæ худтонцæ,  уæддæр исæздахтæй æ райгурæн Иристонмæ æма цубур рæстæгмæ иссæй Тæбæхсæути Балой номбæл паддзахадон  Ирон академион театри раздзæуæг артисткæ.

Æ бæрзонд искурдиадæй, æ дæсни аййевадон арæхстдзийнадæй, æ рæсугъд бакаст æма æзмæлдæй æхе бауарзун кодта театрдзаутæн. Сценæмæ æ алли рацуд дæр исуй устур бæрæгбони хузæн.

Римæ айдагъ театралон аййевади нæ фескъуæлхтæй, фал ма зундгонд æй куд дæсни зартæгæнæг, музыкæ финсæг, аллихузон исфæлдистадон изæртæ аразæг. Æ хъæппæресæй Дзæуæгигъæуи Евгений Вахтангови номбæл Хæдзарæ-музейи еудадзугдæр арæзт æрцæунцæ литературон-исфæлдистадон изæртæ. Уонæми фæййархайунцæ зундгонд артисттæ, уæлдай хуарз ба е æй, æма си  нæ маддæлон æвзагбæл фæккæсунцæ нæ национ литератури классикти æма нæ нури рæстæги нæ искурдиадæгин поэтти æмдзæвгитæ. Еци гъуддаг ба, æнæмæнгæ, устур пайда æй кæстæр фæлтæрти ’хсæн маддæлон æвзаг парахат кæнуни гъуддаги. Куд æхсæнадон архайæг, уотæ дæр æ архайд минкъий нæй. Зæгъæн, цалдæр анзи фæд-фæди Цæрикъати Рими хъæппæресæй арæзт цудæнцæ концерттæ «Дигорон зар». Уордæмæ æрбахонидæ нæ республики зундгонд зартæгæнгути, фæндурдзæгъдгути, исфæлдистадон коллективти архайгути. Уонæн сæ нисан адтæй, газет «Дигорæ»-йæн фæййагъаз кæнун æ рафинсуни гъуддаги. Æма еци куст, æнæмæнгæ, хъæбæр гъомусгин æма æнтæстгин адтæй. Газети тираж дзæвгарæ фæббæрзонд уидæ…

Æрæги ба ма Римæ æхемæ райста Ирæфи райони аййевадон артдзæсти театралон хехъæппæресадон коллективæн разамунд дæттуни ихæс. Æма цубур рæстæгмæ æ къохи устур æнтæстдзийнæдтæ бафтудæй. Кæстæр фæлтæрæн ци нæуæг спектакль «Машæ æма арс» ниввардта, уобæл театрдзаутæ хъæбæр æхцæуæнæй исæмбалдæнцæ. Æнæгъæнæ республики гъæутæ æма сахартæбæл райгъустæй цæмæдесаг спектакли кой æма театралон коллективи агорун райдæдтонцæ сæхемæ иуазæгуати… Гъе уотемæй æригон исфæлдистадон къуарæн гастролти цæугæ дæр рауадæй, кæцитæ, æхцæуæнæй зæгъун æнгъезуй, рауадæнцæ æнтæстгин…

Мах, газет «Дигорæ»-йи коллектив зæрдиагæй арфæ кæнæн Цæрикъати Римæн, нæ республики адæмон артисти кадгин ном ин лæвæрд ке ’рцудæй, уой фæдбæл. Нæ зæрдæ дин, Римæ, зæгъуй федар æнæнездзийнадæ, дæ уарзон бийнонтæ амонд æма фарнæй хайгин уæнтæ, исфæлдистадон гъуддаги ба  никки бæрзонддæр уæлахездзийнæдтæ,  дæ размæ æвæрд нисантæ æнхæстæй кæддæриддæр дæ къохи æфтуйæнтæ!.. Кади хæццæ хæссæ Адæмон артисти цитгин ном!

Республикон газет «Дигорæ»-йи редаций коллектив