Нæ национ аййевади райрæзти гъуддаги æвæллайгæй ка фæхъхъазауат кодта, еци алæмæти искурдиадæгин адæймаг – Дзбойти Тепсарихъой фурт Батæрбеги (адæм æй уарзонæй худтонцæ Бабле) райгурдбæл 4 мартъий исæнхæст æй дæс æма цуппаринсæй анзи (1936-2005).

Куд актер, режиссер, Иристони кинематографий бундорæвæргутæй еу, уотæ е берæ арфиаг гъуддæгутæй фескъуæлхтæй. Адтæй, айдагъ Иристони нæ, фал æнæгъæнæ  Кавкази æма Уæрæсей киноаййевади федауцæ ка иссæй, еци кинонивтæ («Здесь мой дом», «Ах, любовь», «Мужское самолюбие», «Жизнь, ставшая легендой», «Прощайте, коза и велосипед» æма æндæртæ) исаразгутæй еу, æ ном, куд фæззæгъунцæ, сугъзæрийнæ дамугъатæй финст æрцудæй нæ фидибæстон аййевади анзфинсти.

Æ зонгитæ æма æмгустгæнгутæ куд имисунцæ, уотемæй адтæй зæрдхæлар, цæстуарзон, кусти ихæстæ лæмбунæг æнхæстгæнæг адæймаг.

БАСКАТИ Урузмæг, актер æма журналист:

– Бабле адтæй дессаги цардбæллон, æргъудигин адæймаг. Вазуггин уавæр ку исæвзуридæ, уæддæр гъенцъун нæ кодта. Нифссастæй æй некæд фæууидтон. Адæймаги равгæ фæххуæздæр кæнунмæ Баблейæй дæснидæр неке адтæй.

ЦÆРИАТИ Валерий, Цæгат æма Хонсар Иристони адæмон артист:

– Театри косун ку райдæдтон, уæд мæ зундамонгутæй еу адтæй Дзбойти Бабле. Æ берæ зонундзийнæдтæй махæн, æригон актертæн, рæдауæй хай кодта. Дзбой-фурти фæрци театр æма киноаййевади кусти листæг фæззелæнтæ базудтон. Аци адæймаг ме ’сфæлдистадон кусти ниууагъта ирд фæд.

БЕГИЗАТИ Иринæ, паддзахадон телерадиокомпани «Алани»-й телекинофонди шеф-редактор:

– Киноаййевади къабази косгæй, Бабле æхе равдиста парахат зонундзийнæдти хецауæй. Актерти нæуæг фæлтæр цæттæ кæнуни гъуддагмæ Дзбой-фурт устур æргом æздахта. Царди ахедгæдæр æууæлтæ кинонивти æвдист цæмæй цæуонцæ, дæсни режиссер æма актер уобæл архайдта. Баблей хузæн æнæхийнæ, цæстуарзон адæймæгутæй федауй цард.