Дигори райони сæргълæууæг Цагъати Сослан иссæй III-аг Еугуруæрæсеуон муниципалон преми «Лæггадæ»-йи кæронбæттæн еристи архайæг. Аци æхцæуæн хабар куддæр райгъустæй, уотæ дзиллон хабархæссæг фæрæзнити ци берæ æрмæгутæ фæззиндтæй, уонæн сæ еумæйаг медес адтæй: «Цæгат Иристони ес хецаудзийнади уæхæн косæг, кæцимæн гъуди «Адæмæн рæстуодæй лæггадæ кæнун…» уотид сæнттади загъд нæй, фал æй æ царди фæткæ, æ уодигъæди менеуæг. Уомæ гæсгæ адæмæн цийнаг иссæй Цагъай-фурти æнтæстдзийнадæ. Федарæй си æруагæс кæнуй еци премий аккаг æцæгæйдæр ке æй, е. Уомæн æма син зундгонд æнцæ æ лæгдзийнади æма рæстзæрдæ фæллæнтти æвдесæнтæ. Еци хабæрттæн сæ еугурей кой  ракæнунæн нин равгæ нæййес, фал си уæддæр дууæ цауей туххæй ба цубурæй радзордзинан.

Фиццаг цау æрцудæй Дур-Дури гъæуи, цалдæр анзей размæ, Сослан уæд уоми гъæуи сæргълæууæгæй куста. Фарастанздзуд биццеу бугъдони иссирдта, Устур Фидибæстон тугъди рæстæгутæй ардæмæ ами зæнхи ци гранат РГД-5 байзадæй, уой. Сувæллон æнгъæл адтæй, е уотид æфсæйнаги тумбулæг æй, зæгъгæ, æма ’й сæ хæдзарæмæ ’рбахаста. Уоми ба ’й æзгелун байдæдта, фæндадтæй æй æ хурфи ци ес, уой базонун. Цалинмæ еци иссерæггаги хæццæ архайдта, уæдмæ сæ тургъæмæ бацудæй Цагъати Сослан, æма биццеуи къохти гранат ку рауидта, уæд фиццаг уотæ æхецæн раунаффæ кодта, нуртæккæ, дан, ин æй райсдзæнæн, зæгъгæ, фал гранати зелæггаг биццеуæн е ’нгулдзæбæл ку рауидта, уæд æцæгæй таси бацудæй. Цидæр къæрцц райгъустæй. Еци-еу тахт ракодта æндæмæ æма ’й будур æрдæмæ фехста… Кæд не ’срæмугъдæй, уæддæр Сослан фæдздзурдта ервæзунгæнгутæмæ, кæцитæ гранат æнæзиангъон искодтонцæ. Хуцауи фæрци неке бастъалдæй. Уой фæсте сапертæ куд фегъосун кодтонцæ, уотемæй гарзæг зæнхи буни берæ æнзти дæргъи ке фæллæудтæй, уой туххæй ниууомæл æй æма уомæ гæсгæ не ’срæмугъта. Еци гъæуккаг биццеу, куд фæззæгъунцæ, хæдони райгурдæй. Уæдта ма хъæбæр хуарз ба е адтæй, æма æ рази æдæрсгæ адæймаг ке фæцæй, кæци æнæфæстæмæ фæккæсгæй, ци гъудæй, уой афойнадæбæл исæнхæст кодта.

*  *  *

Дуккаг цау ба æрцудæй Дигорайæй Дзæуæгигъæумæ цæугæй надбæл. Уæззау транспортон фидбилиз си ’рцудæй: æригон силгоймаг æма æнагъон сабийи хæццæ хуæдтолгæ сæрбехъулæнттæ кæнгæй, фæснадмæ расхъиудтæй, фæууæлгоммæ ’й. Цæф уотæ карз адтæй, æма сувæллæнттæй еу къæразгæй рахаудтæй, еу-дæс æма дууинсæй метри æндæдæр. Сабий æ кеми нæбал адтæй. Дуккаг сувæллон æма æ мадæн дæр гъудæй æвæстеуатæй фæййагъаз кæнун. Еци рæстæг уоми фæцæй Цагъати Сослан æма бæлахи бахаугутæн æ бон цидæриддæр адтæй, уомæй фæййагъаз кодта…

ЦАГЪАТИ Сослан, фидбилизæй ци биццеуи фæййервæзун кодта, уой хæццæ.

Цæгат Иристони цæргутæ хуарз гъуди кæнунцæ еци хабæрттæ, æма уæлдай разæнгардæй гъæлæс кæнунцæ сæ бæгъатæрбæл,  цæмæй преми «Лæггадæ» райсуни кæронбæттæни æркасти рамола. Еци гъуддаги гъæлæсгæнгути ’хсæн æй Цæгат Иристони Сæргълæууæг Сергей Меняйло. Æ телеграм-канали ниффинста: «Хъазар æмбæлттæ, æз дæр исгъæлæс кодтон, æма мæ фæндуй, цæмæй  еугурæй дæр фæллæууæн не ’мзæнхони фарс».

Преми «Лæггадæ»-йи цæстдарæг совет куд игъосун кæнуй, уотемæй федаргонд æрцудæй кæронбæттæн æркасти архайгути номхигъд – уомæ хаст æрцудæнцæ дæс æма фондзинсæй проекти. 2 мартъий райдæдта Адæмон гъæлæскæнуйнадæ. Уоми архайуни барæ ес нæ бæсти цæргутæй алкедæр. Премийæн ес еуæндæс номинаций, уонæй алкæцидæри дæс архайæги. Цагъати Сослан архайуй «Бæгъатæрдзийнадæ æма æхсарæ Фидибæстæн лæггадæ кæнуни сæрбæлтау», зæгъгæ, номинаций.

Уæлахездзаутæн преми раттуни кадгин церемони арæзт æрцæудзæнæй аци анзи 21 апърели. Цагъати Сослан рамолдзæнæй æви нæ, уæддæр æй æцæг бæгъатæр, уомæн æма адæми фæййервæзун кодта, æхе цардбæл нæ сагъæс кæнгæй.

Кæронбæттæни ма уой зæгъуйнаг ан, æма ци премий кой ракодтан, е нисангонд æрцудæй Уæрæсей Федераций Президент Владимир Путини фæндонмæ гæсгæ. Лæвæрд ба цæуй, уæлдай æскъуæлхдзийнæдтæ ка равдиста, еци бæрнон бунæтти косгутæн.

БИЧИЛТИ Алетæ