Пневмонийæ дохтиртæ нимайунцæ уæззау незбæл, уомæн æма æ нихмæ рæстæгæй-рæстæгмæ нæуæг хуастæ кæд фæззиннуй, уæддæр,  уой фудæй ка рамæлуй, еци сæйгитæ еу æма дууæ нæ ’нцæ.

Пневмонийæй ес хе багъæуайгæнæн профилактикон мадзæлтти фæрци. Циуавæр æнцæ еци мадзæлттæ?

Фиццагидæр, организм гъæуй уазалбæл ахур кæнун. Пайда æй, уазал æма гъар дон кезугай кæцæй кæлунцæ, уæхæн души буни ралæуун, къæхтæ уазал дони радарун. Райдайун гъæуй, æ температурæ 34-36 градуси кæмæн уа, уæхæн донæй, уæдта температурæ минкъийгай æргæлдзун 25 градусей уæнгæ. Организм уазалбæл ку исахур кæнайтæ, уæд инфекцити нихмæ федардæр лæудзæнæй, уомæн æма иммунитет федардæр уодзæнæй.

Дохтиртæ амонунцæ уолæфæнти гимнастикæ. Е уæлдай пайдадæр æй хуссæни хъан сæйгитæн. Уолæфæнтæ цæмæй хуарз косонцæ, уой туххæй хуарз æй тумбулæгтæ думун.

Пневмонийи профилактики иннæ хузæ ’й, инфекци æхе кæми «римæхсуй», уæхæн бунæттæ дзæбæх кæнун, зæгъæн, дæндæгутæ, хъуртæ æма æндæртæ. Алли незгун оргæни дæр ци инфекци ес, е æнцондæрæй бахъæртуй уолæфæнтæмæ.

Иммунитет фæффедардæр кæнунæн ахид пайда кæнунцæ зайæгойтæй арæзт иммуномодулятортæ – элеутерококк, эхинацея, левзия, гулæр (ромашка). Сæ еугур дæр ниуазгæ ’нцæ цаййи хузи.  Уомæй уæлдай, пневмонийи профилактикæн куд сувæллæнттæн, уотæ хестæр кари адæймæгутæн дæр пайда æй массажтæ кæнун.

Пневмонийæй цæмæй ма фæссæйгæ уайтæ, уой туххæй аци незæй сæйгæмæ хæстæг ма цотæ. Уæхе гъæуай кæнетæ уазалтæй æма гъæуай кæнетæ уæ нервтæ дæр. Аллихузон химион бауæргъæдтæй уæ уолæфæнтæ гъæуай кæнетæ.

Еугур еци фæдзæхститæ ку æнхæст кæнайтæ, уæд уæхе пневмонийæй багъæуай кæндзинайтæ æма, цийфæнди бонигъæдæ, циуавæрдæр уавæрти ку бахауайтæ, уæддæр уодзинайтæ æнæнез.

Медицинон профилактики  республикон центр