Уæрæсейаг регионти нæуæгæй рапарахат æй «Уæлахези цæсгæнттæ», зæгъгæ, федералон номерæн проект æнхæст кæнунбæл куст.

Еци арфиаг гъуддаги бæрæг даруй Цæгат Иристони байвæрæн дæр. Уой туххæй фегъосун кодта Цæгат Иристони Сæргълæууæг æма Хецауади пресс-службæ.

Пресс-служби минæвари дзубандимæ гæсгæ, Устур Фидибæстон тугъди ка архайдта, кенæ фæскъилдуни фæллойнæгæнæг ка адтæй, еци адæми цардвæндаги туххæй хабæрттæ æмбурд кæнунцæ Цæгат Иристони Хетæгкати Къостай номбæл паддзахадон университети. Фæстæдæр еци æрмæгутæ еугурæй дæр лæвæрд æрцæудзæнæнцæ Уæлахези музеймæ (æрбунæттон æй Мæскуй).

Цæгат Иристони цæргутæ зæрдиаг æргом раздахтонцæ амунд акцимæ. Е син  еума фадуат дæттуй, цæмæй бæсти еугур цæргутæн дæр рахабар кæнонцæ нæ хестæр фæлтæрти минæвæртти æгæрон бæгъатæрдзийнадæ æма тугъдон æскъуæлхтдзийнæдти туххæй. Нæ алке хæдзари дæр ес Устур Фидибæстон тугъди бæгъатæр архайгутæ æма фæскъилдуни фæллойнæгæнгути туххæй æрмæгутæ æма имисуйнæгтæ. Æма нин аци акци еума фадуат дæттуй, цæмæй еци арфиаг хабæртти туххæй æрмæгутæ гъæуайгонд æрцæуонцæ айдагъ бийнонти анзфинсти нæ, фал син бунат исуа Уæрæсей сæйраг æфсæддон-историон хæзнадонæ – Уæлахези музейи архиви.

Номерæн акци «Уæлахези цæсгæнттæ»-йи архайæг исуни фадуат алкæмæн дæр ес. Уой туххæй айдагъдæр гъæуй Уæлахези музейи официалон сайти (дæлпроект «Уæлахези цæсгæнттæ»-йи) регистраци искæнун æма тугъди бæгъатæр, кенæ фæскъилдуни фæллойнæгæнæги царди хабæрттæ уоми райвæрун. Уой хæццæ, анкети кæрони фæббæрæг кæнун æнгъезуй, айдагъдæр Цæгат Иристони паддзахадон университети бæрнæмæ лæвæрд ке цæунцæ, уой. Идарддæр еугур историон æрмæгутæн дæр сæ бунат исуодзæнæнцæ Уæлахези музейи æвæрæнтæ  æма экспозицитæ.

Уæлахези музейи куд радзурдтонцæ, уотемæй бæсти цæргутæ устур цæмæдесдзийнадæ равдистонцæ номерæн акцимæ. Абони уæнгæ бал еуæндæс мин уæрæсейаг бийнонтемæй фулдæр «Уæлахези цæсгæнттæ»-йи электрон экспозицимæ барвистонцæ сæ тугъдонти хабæрттæ. Акций зæрдиагдæр архайгутæ ’нцæ Новосибирск æма Мæскуй облæст, Краснодари край, Мæску æма Цæгат Иристон…