Рæхги, 25 мартъий бæрæггонд цæудзæнæй нæ зæрдæмæдзæугæдæр бæрæгбæнттæй еу – Уæрæсей культури косæги Бон. Уой фæдбæл культури косгути Еумæйагуæрæсеуон профцæдести Цæгат-Иристойнаг республикон организаций номæй æ сæрдар Годжити Еленæ зæрдиагæй арфæ кæнуй нæ республики культури косгутæн, аййевади архайгутæн æма аци къабæзти ветерантæн. Æ арфити нистауæни уотæ баханхæ кодта:

– Абони алæмæти хуæрзаййев равгæ ес бознæ зæгъунæн сумахæн – уæ арфиаг гъуддаги æцæг арæхстгинтæн, уæ дæсниадæбæл æновуд уогæй ин, æ сæрбæлтау уодуæлдайæй лæггадæгæнгутæн.

Мах уи боз æма сæрустур ан, уомæн æма сумах æнхæст кæнетæ  ездондзийнади ихæсгонд æма бæркадгундæр кæнетæ нæ бæсти культурон гъæздугдзийнадæ, уодуæлдайæй агъаз кæнетæ арæхстдзийнæдтæ æма искурдиадæ раргом кæнунæн, архайетæ исфæлдистади уæлмонци уавæртæ аразунбæл, зæрдити уодцирени æма дессагдзийнадæ уарзуни æнæниххусгæ арт иссодзунбæл.

Хъæбæр æхцæуæнæй уин мæ зæрдæ зæгъуй, цæмæй алкæддæр гъе уотæ рæсугъд æма æнтæстгин куд уайтæ уодикондæй  уæ арфиаг фæллойни!.. Нæ культури сæрбæлтау уæ хъазауат уæ алкæмæн дæр куд исуа æнтæстдзийнæдти, уе ’скъуæлхтдзийнæдтæн аккаг аргъ кæнуни рæстæг, уæ ирисхъи тæккæ зæрдæхцæуæндæр æма ирддæр афонæ.

Уадзæ æма уæ бæлдитæ рæсугъд æцæгдзийнадæй исæнхæст уæнтæ, уæ разæнгарддзийнадæ ба  тухгинæй-тухгиндæр кæнæд!..

*  *  *

Годжити Елени арфитæмæ гæсгæ æримисуйнаг ан номдзуд уруссаг философ Николай Трубецкойи (1890-1938) загъд: «Хуæдхуз национ культурæ агъаз æй, хецæн адæймæгутæ цæмæй сæхе балæдæронцæ, базононцæ, уомæн…» Æма еци гъуддаги хъазауатонтæ ба ’нцæ нæ национ культури косгутæ, етæ уодуæлдайæй фæллойнæ кæнунцæ æ гъомусади сæрбæлтау. Æма си нæ дзиллæ уомæ гæсгæ ба хъæбæр арфиаг æнцæ.