Цæгат Иристони Парламенти Сæрдар Тускъати Таймораз æрæги фембалдæй тугъдон цаути архайæг ветеранти – нæ неспублики сæрмагонд æфсæддон операций архайæг ветеранти Ассоциаций минæвæртти хæццæ. Уой туххæй фегъосун кодта Парламенти пресс-службæ.

Магкати Олег, Туати Артур, Саламти Осмæн, Алибегти Роман…Анæй алкæмæн дæр ес æхе ирисхъæ, фал сæ цардвæндаги хабæрттæ ба уотæ рауадæнцæ æма сæ æрбайеу кодта еу уæлиауон уæлмонц – Фидибæстæбæл æновуддзийнадæ, æ сæрбæлтау тохмæ цæттæдзийнадæ. Æма нæ абониккон фæсевæдæн æ фулдæр хай æхсаргинæй сæхе æвдесунцæ бæлвурд гъуддæгути. Уæлдайдæр ба сæрмагонд æфсæддон операций архайгæй. Уордигæй, е фсæддон ихæс исæнхæст кæнгæй, фæстæмæ ка исæздахтæй, уонæн сæ фулдæр сæ хæдзæрттæбæл исæмбæлдзæнæнцæ уæззау цæфти фæсте, барæ сæ адтæй æнцад-æнцойнæй сæ идарддæри царди хабæрттæ кæнунæй. Фал сæ уодиконд уотæ разиндтæй, æма æхсæнади цардæй идардгомау ун сæ бон нæ бацæй, сæхецæн æй нæ аккаг кæнунцæ. Ассоциаци Магкати Олеги разамундæй агъазиау куст кæнуй, цæмæй сæрмагонд æфсæддон операций ветерантæн сæхецæн дæр æма  сæ бийнонтæн дæр багъæуаги агъазгонд цæуа…

Устур æргом æздахунцæ патриотон гъомбæладæмæ, ветерантæ ахид цæунцæ скъоладзаути хæццæ фембæлдтитæмæ, дзубанди кæнунцæ ирæзгæ фæлтæрти хæццæ, «Лæгдзийнади Уроктæ» аразунцæ.

Сæ еци кустæн син бæрзонд аргъ искæнгæй, Тускъати Таймораз загъта:

– Гъæуама æригæнтти уодигъæди бундоронæй федаргонд цæуонцæ хуæрзгъæдæдзийнади менеугутæ, цæмæй уарзонцæ сæ Фидибæстæ, æцæг патриотизм ци æй, уой лæдæронцæ. Еци гъуддаги ба сумах æновудæй лæггадæ кæнетæ. Æма уи боз ан,  зæрдиагæй уин арфæ кæнæн!..

Дзубанди ма цудæй ветерантæн сæхе царди хабæртти туххæй дæр, загътонцæ сæ фæндитæ, сæ курдиæдтæ. Зæгъæн, кусти бунæттæ агорун æма æндæр бæлдтаг ахурадæ райсун. Уæлдæр кенæ техникон ахурадæ тагъд хузи райсун ветерантæн æй хъæбæр гъæугæ æма вазуггин фарста. Тускъати Таймораз еци хъæппæрес банимадта растбæл æма син еци гъуддаги агъаз кæнунæй зæрдæ байвардта.

Фембæлди рæстæг ма Тускъати Таймораз куд фегъосун кодта, уотемæй бацæттæ кодтонцæ федералон центрмæ курдиадæ, цæмæй тухи структуритæмæ кустмæ райсуни туххæй ветерантæй искæнонцæ кадрти фæстауæрцæ.

Фембæлди кæронбæттæни Тускъати Таймораз сæрмагонд  æфсæддон операций ветерантæн еума хатт райарфæ кодта, Цæгат Иристони хуæрзагадæн  сæ архайд агъаз ке кæндзæнæй, уой баханхæ кæнгæй.