Уотæ исхудтонцæ, æрæги Горæтгæрон райони ци æхсæнрегионалон æмбурд арæзт æрцудæй, уой æ исарзгутæ. Арæзт ба ’рцудæй Фидибæсти тугъдонти бийнонти Комитети цæгатиристойнаг хайади фонд «Фидибæстæ гъæуайгæнгутæ»-йи регионалон хайадæ æма аци райони бунæттон хеунаффæйади администраций хъæппæресæй. Архайдтонцæ си нæ республики Сæргълæууæг Сергей Меняйло æма Парламенти Сæрдар Тускъати Таймораз.

Мадзал æрбайеу кодта æхсæнади, хецаудзийнади оргæнти косгути, сæрмагонд æфсæддон операций архайгути, сæ хеуæнтти, куд Цæгатæй, уотæ Хонсар Иристонæй дæр, Хъæрæсе-Черкесийæй, Кæсæг-Балхъарæй, Дагестанæй, Цæцæнæй иссæуæг минæвæртти.

Нæ республики Сæргълæууæг æма Хецауади пресс-службæ куд игъосун кæнуй, уотемæй си дзубанди цудæй нæ абониккон цардарæзти зæрдæмæдзоргæдæр гъуддæгутæбæл. Уæлдайдæр ба сæрмагонд æфсæддон операций архайгутæн аккаг агъаз кæнуни фарстатæбæл.  Сергей Меняйлой дзубандимæ гæсгæ, форум иссæй, кæрæдзей хæццæ комкоммæ, уомæй уæлдай, сæрмагонд æфсæддон операций архайгути бийнонти цæститæмæ бакæсуни ахсгиаг равгæ. Æ загъд адтæй:

– Хецаудзийнади оргæнти косгутæ æма æхсæнади ’хсæн гъæуама кæрæдзей лæдæрундзийнадæ æма æмгустадæ уа, сæрмагонд æфсæддон операций архайгути бийнонтæбæл, сæ кæстæртæбæл бамæтæ кæнун нæ сæйргадæр ихæстæй еу æй.

Куд ма баханхæ кодта, уотемæй операций ветерантæн сæ фарсмæ балæуун гъæуй, сабур царди син фадуæттæ гъæуама фæззиннонцæ, социализаций еугур къæпхæнтæ рацæуонцæ:

– Еци фарстатæмæ гъæуама еудадзугдæр нæ цæстæ дарæн, алли ветерани ресагæдæр гъуддæгутæ æвзарæн. Æрæги исфедар кодтон, Ветеранти гъуддæгути туххæй комитет исаразуни унаффæ, е еугур фарстатæ дæр æрбайеу кæндзæнæй. Еунæг адæймаг-ветеран дæр æ фарстай хæццæ еунæгæй нæ байзайдзæнæй, сæрмагонд æфсæддон операцийæй исæздахтæй, уæд æй гъæуама зона, сабур царди дæр зæрдтагонæй ке гъæуй, уой.

Форуми кустонцæ тематикон фæзитæ, æргом раздахтонцæ  æфсæддон операций архайгæй, æбæрæгæй ка фесавдæй æма нерæнгæ ке ирисхъæ бæлвурдгонд нæма ’рцудæй, уони цæуæтæн психологон агъаз бакæнуни гъуддæгутæмæ, реабилитацион кустмæ, социалон нисантæ царди уадзунмæ. Агъаззаг дзубандий архайгутæ бакастæнцæ концертмæ, форуммæ рахастонцæ Кавкази адæмти хуæруйнæгти равдист.