Цæгат-Кавказаг федералон округи Уæрæсей Федераций Президенти Æнхæстбаргин минæвари размæ косæг Совети кезуй  æмбурд æрæги арæзт æрцудæй Дзæуæгигъæуи. Разамунд ин лæвардта Æнхæстбаргин минæвар Юрий Чайка. Дзубанди си цудæй федералон зилди энергетикон компанитæ æма цæрæнуатон-коммуналон хæдзаради кустуæтти абониккон уавæри æма сæ идарддæри райрæзти гæнæнтæ æма равгити фæдбæл.

Æмбурди райдайæни Юрий Чайка куд фæббæрæг кодта, уотемæй амунд фарстатæбæл косгæй ахсгиаг æй, цæмæй энергетикон комплекс æнæкъулумпийæй коса, цæмæй энергетикон фæрæзнитæ хæдзардзинæй харзгонд æма фæстауæрцæгонд цæуонцæ, уомæ аккаг цæстдард куд уа, цæмæй коммуналон лæггæдти хуæрзгъæдæдзийнадæ хузæнондæр кæна. Æ дзубандимæ гæсгæ, лæмбунæг архайд гъæуама цæуа харзгонд энергетикон фæрæзнити феддонти ихæстæ минкъийдæр кæнунбæл дæр.

Энергетикон æма цæрæнуатон-коммуналон комплексти идарддæри райрæзти фæдбæл арæзт фæлварæн федералон программæ куд æнхæстгонд цæуй, уой фæдбæл æмбурди сæрмагонд доклад искодта  Цæгат Иристони Сæргълæууæг Сергей Меняйло. Æма куд фегъосун кодта, уотемæй Цæгат Иристон федералон зилди æртæ регионей номхигъди уогæй, программи уагæвæрдтæ æнхæст кæнунмæ бавналдта 2023 анзи. Уæдæй нуриуæнгæ берæ ахедгæ мадзæлттæ арæзт æрцудæй энергетикон комплекси кустуæттæ æма цæрæнуатон-коммуналон хæдзаради къабæзтæ фæццардгъондæр кæнунæн. Арæзт æрцудæй еумæйаг республикон донуадзæн кустуат, цалцæггонд цæуй энергетикон æма коммуналон инфраструктурæ, фæмминкъийдæр æнцæ исхарзгонд энергетикон фæрæзнити туххæй феддонти ихæстæ…

Видеоконференций бастдзийнади фæрци дзубандий архайгутæ адтæнцæ Цæгат Кавкази федералон зилди регионти сæргълæугутæ, Уæрæсей энергетики министри хуæдæййевæг Петр Конюшенко, Уæрæсей экономикон ирæзти министри хуæдæййевæг Сергей Назаров, акционерон æхсæнадæ «Россети»-й генералон директор Андрей Рюмин, акционерон æхсæнадæ «Газпром»-и правлений сæрдари хуæдæййевæг Виталий Маркелов, акционерон æхсæнадæ «Газпром межрегионгаз»-и генералон директор Сергей Густов, уæдта æндæр федералон министрадтæ æма компанити минæвæрттæ.

Совети æмбурдæн хатдзæгтæ кæнгæй, Юрий Чайка федералон зилди регионтæ æма профилон ведомствити разамонгути размæ исæвардта бæлвурд ихæстæ. Бони фæтки фарстатæбæл дзубанди идарддæр дæр цæудзæнæй еугур регионти æмвæзадæбæл.

Фæстæдæр Юрий Чайка æма Сергей Меняйлойæн адтæй сæрмагонд фембæлд дæр. Уоми дзубанди цудæй Цæгат Иристони нури социалон-экономикон уавæрбæл, ахедгæдæр инвестицион проекттæ æнхæст кæнуни, сæрмагонд æфсæдтон операций архайгутæн æма сæ бийнонтæн уæлæнхасæн паддзахадон агъаз кæнуни æма æндæр ахсгиаг фарстатæбæл.

*  *  *

Аци игъосункæнуйнагмæ гæсгæ уой зæгъуйнаг ан, æма æмбурди ци дзубанди цудæй æма си ци комкоммæ бæлвурд мадзæлттæ нисангонд æрцудæнцæ, етæ кæдимайди ба æнæгъæнæй ахедгæ рауайиуонцæ æма, адæмæн уоййасæбæл ахсгиаг ка ’й, еци къабази гъуддæгутæ фæррæстмæдæр уиуонцæ æма си зæрдрохс куд уонцæ къабази кустуæттæ сæхуæдтæ дæр æма фæлхасгæнгутæ дæр. Е исуйнаг хабар æй, фал абони ба ма зæрдæдзоргæ ’нцæ еци фарстатæ æма сæбæл æнæдзоргæ дæр куд нæ  уæн. Уомæ гæсгæ ба уой фæдбæл æрмæгутæ мухур кæнæн 6-7-аг фæрстæбæл.