Куд нæ бæсти еугур рауæнти, уотæ Цæгат Иристони дæр 25 мартъий бæрæггонд æрцудæй Уæрæсей  культури косæги Бон. Уой фæдбæл культури косгутæн зæрдиаг арфитæ ракодта нæ республики Сæргълæууæг Сергей Меняйло. Бæрæгбони цитгиндзийнадæ уæлдай бæрзонд ба уомæй искодта, æма, нæ национ культури сæрбæлтау уæлдай æновудæй æма æнтæстгинæй ка архайуй, агъазиау арфиаг гъуддæгутæй си ка фескъуæлхтæй, уони кадгин хуæрзеугутæй ке исхуарзæнхгин кодта, уомæй дæр.

Зæгъæн, музыкалон аййевадæ парахат кæнуни гъуддаги устур байвæрæн ке бахаста, уой туххæй майдан «Иристони кадæн» лæвæрд æрцудæй Махъоти Ацæмæзи номбæл сувæллæнтти музыкалон скъолай ахургæнæг Хъиргъути-Лазарти Ларисæн;

Цæгат Иристони адæмон артисти ном лæвæрд æрцудæй Цæгат Иристони Тæбæхсæути Балой номбæл ирон паддзахадон драмон театри актер Цæллагти Сосланæн, æригæнтти студи-сатири театр «Амран»-и актертæ Басити Асланæн æма Сидахъати Дзамбулатæн;

Кадгин ном «Цæгат Иристони адæмон финсæг» аккаггонд æрцудæй рауагъдадæ «Ир»-и редактор Мамукъати Хъазбегæн æма Цæгат Иристони финсгути Цæдеси сæрдари хуæдæййевæг Цомартати Изæтбегæн;

«Цæгат Иристони æскъуæлхт артист»-и ном лæвæрд æрцудæй камерон хор «Алания»-йи артисттæ Езети Игорæн, Демьян Карнауховæн æма Сидахъати Азаматæн;

«Цæгат Иристони культури æскъуæлхт косæг»-и номхæссæг иссæнцæ Дзæуæгигъæуи Дзанайти Азанбеги номбæл аййевадон училищей ахургæнæг Бæдтиати Таймураз, Зæронд Бæтæхъой гъæуи культури Хæдзари сæргълæууæг Берозти Римæ, Æрæдони сувæллæнтти аййевæдти скъолай ахургæнæг Дзигасти Виктория æма Чиколай сувæллæнтти аййевæдти скъолай ахургæнæг Кокойти Людмилæ.

Аци кадгин хуæрзеугутæй хуарзæнхæгонд ка ’рцудæй, уонæн сæ еугуремæн дæр зæрдиагæй арфæ кæнæн. Æма син ковæн: «Никки агъазиаудæр исфæлдистадон æскъуæлхтдзийнæдтæ уин бантæсæд!..»