Журнал «Ирæф»-и раздæри сæйраг редактор МАЛИТИ Васо æма е ’мгустгæнæг КОЛИТИ Витали.

МАМУКЪАТИ Хъазбег

 МÆ РÆУФУНТÆ

Колити Виталий фæнзгæй

Æрдо-хедбæл цудтæн мæ рæуæги,

Арт сугъдæй гур-гурæй мæ фæсте,

Æригъал æй мæ фун мæйнæуæги, –

Ниви арвбæл, цума, ци финст е?..

Ци рахастон фунтæй мæ асæгмæ? –

Зуст ампъезтæн, миййаг, сæ тæссонд…

Ци ’й мæ хицæ мæсгути дасæгмæ,

Кæд мæсгутæ æнцæ метæй конд?

Ци ниууагътон уæдта мæ рæубæнтти –

Къæл-къæл ходун æви сор цъæхахст?

Цæмæй ма ’й базонон, ци рæууæнтти,

Мæ бæласæ ку ’рцæй æрдæгсаст…

Мæ фæззæги уæргутæ зæгъдзæнцæ,

Ци адтæй мæ уалдзæгæн æ догъ, –

Мæ фунтæ мæмæ уæд æздæхдзæнцæ,

Ма калдзæй мæ бæласæ къомбох…

ФÆСТАГ ÆМДЗÆВГИТÆ

Колити Виталийæн

Дзилли фарни рæстбарæ тæразæн

Æ гупп-арти нихсист дæ, поэт.

Цъилингай рохс кæлуй дæ къæразæй –

Рохс æмдзæвги егаугæ ниннет.

Æрвгæрони стъæлфуй мæйæ-байраг

Дæ цъæхснаг рæнгъæ-æхси къæрццæй.

Æрфæни фæдбæл ин – берæ хуайраг,

Дæ рохс зартæн се ’рхъестæ хуæрдзæй.

Æстъалуй нæмугау ин нигъзали

Дæ рæстзæрдæ бæлдитæн сæ уод, –

Сæхолау, уæд де ’мдзæвгæ, Витали,

Фæлдесонди бæрзонддæр исконд!

Кæд фæндур нæ цæгъдуй фæрсæрхъезæй,

Нæ кæнуй саст куройнæ инсгæ, –

Сæдæ анзи уæддæр æнæнезæй

Дæ фæстаг æмдзæвгитæ финсæ!