Æбæрæгæй фесавдæй… Алли тугъд дæр æнæуойдæр æ æверхъаудзийнæдтæй зæрдрист фæккæнуй адæми, фал уæлдай содзаггаг е фæууй, æма сæ тугъдонти ирисхъи фæдбæл ка фæттухсуй, уонæн си, æбæрæгæй фесавдæй, зæгъгæ, ку фегъосун кæнунцæ… Устур Фидибæстон тугъди рæстæг цал æма цал бийнонтемæ исигъусидæ уæхæн уæззау хабар… Цал æма цал ниййерæги, седзæргæси, уобæл не ’ууæндгæй æнгъæлмæ кастæнцæ сæ тугъдонти фæззиндмæ… Цал æма си цал гъеууотæ æнгъæлмæ кæсгæй банæхстæр æнцæ се ’носон дуйнемæ…

Æма мæнæ нур дæр бабæй, сæрмагонд æфсæддон операций архайгутæй кедæрти бийнонтæмæ, гъулæггагæн, исигъусуй уæхæн уæззау хабар. Уони зæрдрист лæдæргæй, паддзахади ’рдигæй дæр æма бархеуонти фæрци арæзт цæуй куст, æбæрæгæй фесавдæй, зæгъгæ, ке нимайунцæ, уони ирисхъæ исбæлвурд кæнуни фæдбæл. Уой туххæй æрмæг кæсетæ 3-аг фарсбæл.

Æбæрæгæй фесавдæй, зæгъгæ, сæрмагонд æфсæддон операций архайгутæй нимад ка цæуй, уони ирисхъæ исбæлвурд кæнунбæл еугур равгитæ æма гæнæнтæй байархайун абони æй ахсгиагæй-ахсгиагдæр гъуддаг. Уой фæдбæл архайд нæ республики уæнгæ дæр цудæй, идарддзæфмæ ’й æнхæст кодта «Своих не бросаем», зæгъгæ, къуар. Фал куст цæмæй никки фæййахедгæдæр уа, уой туххæй ба нæ республики Сæргълæууæг Сергей
Меняйлой хъæппæресæй сæрди арæзт æрцудæй æбæрæгæй фесæфæг тугъдонти ирисхъæ исбæлвурд кæнуни сæрмагонд Центр. Разамунд ин дæттуй тугъдон уацхæссæг Арзу Мамедова.

Арзу МАМЕДОВА

Аци æригон силгоймаг цуппар анзей дæргъи барвæндонæй кæнуй, æбæрæгæй фесавдæй, зæгъгæ, нимад ка цæуй, еци тугъдонти иссеруни куст. Æма ин а сæрди республики Сæргълæууæг, сæрмагонд тугъдон операций уогæй, ку фегъосун кодта Центр исаразуни гъуди, уæд лæдæрдтæй, зин, фал æнæмæнгæ гъæугæ гъуддаг ке æй, æма исарази æй æ разамонæг исунбæл.

Æрæги Арзу Мамедовайæн дзиллон хабархæссæг фæрæзнити минæвæртти хæццæ ци фембæлд адтæй, уоми куд фегъосун кодта, уотемæй Центри байгонбæл уоййасæбæл берæ рæстæг нæ цæуй (дууæ мæйемæй еуцæйбæрцæдæр фулдæр), уæддæр æнæмæнгæ гъæуйнаг ке æй, е уайтæккæдæр рабæрæг æй.

Сæрмагонд æфсæддон операций æбæрæгæй ка фесавдæй, еци  тугъдонти ирисхъæ базонуни туххæй ардæмæ цæунцæ, финсунцæ, дзорунцæ айдагъ нæхе республики сахартæ æма гъæутæй нæ, фал  Уæрæсей иннæ регионтæй дæр. Агорæн куст ка кæнуй, еци фондз æма дууинсæй адæймагемæй цуппæрдæс сæхуæдтæ ’нцæ операций архайгутæ.

– Уæрæсей регионти хæццæ идарддзæфмæ  куст дæр нæ ниууагътан, операций райдайæнæй æй æнхæст кæнæн, – загъта Арзу Мамедова. –  Раст нæ адтайдæ, цуппар анзи сæ хæццæ фæккосæ, æма нур Центр  ку байгон æй, уæдта сæ ниууадзæ. Æбæрæгæй ка фесавдæй, еци тугъдонтæн сæ дæс æма инсæй проценти иссирдтан. Агоруни гъуддаги берæ аразгæ ’й Уæрæсей Гъæуайкæнуйнади министради агъазæй. Уомæ гæсгæ ба нисан кæнунцæ Запорожьей «Алани»-й батальони дæр Центри   дæлхайадæ байгон кæнун,  уотемæй тугъдон командирти фæрци Уæрæсей Гъæуайкæнуйнади министрадæй информаци есун, уæдта æфсæддон хæйтти хæццæ бастдзийнадæ дарун.

Зингæ бафтудæй волонтерти нимæдзæбæл, кæмидæриддæр сæ агъаз багъæуй, уоми еуварс нæ лæуунцæ. Зæгъун гъæуй уой дæр, æма сæ куст ба зин æма уæззау æй, уæлдайдæр ба психологон уагæй. Æма си алке нæ бафæраздзæнæй. Тæккæ зиндæр æй, тугъдони бийнонтæн æ мæлæти хабар фегъосун кæнун. Дзиллон хабархæссæг фæрæзнити минæвæртти хæццæ фембæлди рæстæг Арзу куд фегъосун кодта, уотемæй еци бон иссирдтонцæ, æбæрæгæй фесавдæй, зæгъгæ, нимад ка цудæй уонæй еуей, хуæрзæригон лæхъуæни.

Æ хеуæнттæн æй куд зæгъонцæ, еци сагъæс Арзуйæн нæ цох кодта æ сæрæй нæ бацудмæ.

Сæ куст зин æма уæззау æй уомæй дæр, æма сæхуæдтæ дæр æдас нæ ’нцæ фудбæлахæй.

– Нæ волонтертæй дууæ фæммард æнцæ знаги нæмугæй, – зæрдхъурмæй фегъосун кодта Арзу. – Келехсати Рустам Сунжи гъæуæй æма Туати Хетæг Æрæдонæй… Фиццаг бæнттæй фæстæмæ адтæнцæ сæрмагонд æфсæддон операций. Анз æма сæ æрдæг сæ сикъити хайбæл исæмбæлун кæнунæн равгæ нæййес… Рустам цæфæй, госпитæли уогæй дæр æ куст нæ ниууагъта. Е ’нсувæр Геннади дæр фæмард æй тугъди будури, исластонцæ ’й æма ’й ами байвардтонцæ…

Æцæг патриоттæ адтæнцæ Рустам æма Хетæг… Тæссаг рауæнти тох кодтонцæ, фал нæмæ нифс адтæй, сæрæгасæй ке исæздæхдзæнæнцæ. Иристонæй сæ фæллад исуадзуни фæсте ку æздахтæнцæ тугъди будурмæ, уæд сæ нæхуæдтæ рафæндараст кодтан. Сæхуæдтæ зин уавæри уогæй, агъаз кодтонцæ иннетæн дæр… Нæбал æндеуæн еци рауæнтæмæ еске æрветун, мæ гъудитæ алкæд сæ хæццæ ’нцæ. Рустам æстдæсанздзуд тугъдони мард авд километри æхебæл фæххаста тугъди будурæй, æ мадæмæ ’й бахъæртун кæнон, зæгъгæ.

Æхуæдæг цæф адтæй, бахаудтæй госпитæлмæ. Хетæги нæбæл фæдзахста, ести мæбæл ку ’рцæуа, уæд мин мæ мадæн фатер балхæнетæ. Æ ниййерæг æмдзæрæни цæруй, лæхъуæни зæрдæ имæ дзурдта, лæдæрдтæй æй, кумæ цæуй, уордигæй хъæбæр зин ке уодзæнæй фæстæмæ исæздæхун… Æ фæстаг загъд дæр адтæй: «Нæбал мæ фæууиндзийнатæ». Сæ мæлæти фæсте дæргъвæтийнæ рæстæг мæбæл хуссæг нæбал хуæстæй, мæхуæдæг дæр рандæ дæн сæрмагонд æфсæддон операцимæ. Мæйæ, дууæ мæйи си фæдтæн уой размæ, фæстагмæ, мацæбæл гъуди кæнон, зæгъгæ, си байзадтæн. Еу минкъий рæстæг мæ дохтирти агъаз дæр багъудæй, фал мæмæ адæм дзурдтонцæ аллирдигæй, æма, тæрегъæд æнцæ, зæгъгæ, дууæ къуæрей фæсте сæйгæдонæй рацудтæн æма мæ куст идарддæр хъæртун кодтон…

Центри косгутæй алке ирисхъæ дæр тугъдон æверхъаудзийнадæй  æй сæрмагонд æфсæддон операций хæццæ. Алкæмæй дæр си кадæр уоми бастъалдæй: кæмæн – æ сæри хецау, кæмæн – æ хуарз хæстæгутæ… Уæхæн зиндзийнæдтæ бавзаргæй дæр сæ  нифс нæ расастæй, еумæйагæй косунцæ арфиаг гъуддагбæл – зæрдрист ниййергутæн, бийнонтæн агорунцæ сæ тугъдонти, архайунцæ сæ ирисхъæ исбæрæг кæнунбæл. Кусти уæззаудæр уаргъ æхемæ райсуй Арзу æхуæдæг, иннетæ нерæнгæ ахур нæма ’нцæ, зæгъгæ. Амонуй син, сæ хæццæ дзубанди кæнуй, цæмæй сæ психикæ ма фæккеуа.

– Ке фæййагорæн, еци тугъдонтæй информаци  ке туххæй райсæн, уонæй беретæн сæ бийнонтæй кæмæндæр се ’нæнездзийнадæ рæвдзæ уавæри нæ фæууй –  кæмæн æ зæрдæ ресуй, ка ба уæззау сæйгæ ’й… Сагъæси бафтуйæн, куд син æй фегъосун кæнæн…  Нæ Центри косуй æртæ психологи, ке багъæуй, уони фæууинунцæ сæ косæн бунæтти, лæвар. Идарддзæфмæ дæр косунцæ психологтæ, æма ку багъæуй, уæд цæттæ ’нцæ фæййагъаз кæнунмæ…

Центри косгутæн ес бастдзийнадæ, æбæрæгæй фесавдæй, зæгъгæ, нимад ка цæуй, еци тугъдонтæн сæ бийнонти хæццæ, исахур сæбæл унцæ. Аллибон сæмæ цæунцæ, нифс сæмæ фæууй, ке сæ иссердзæнæнцæ, сæ тугъдонтæй хабар ку нæбал фегъосунцæ, уæд. Фал, рæстæг куд цæуй, уотæ еци нифс дæр минкъийдæр кæнун райдайуй сæ зæрдити. Уæддæр Центри косгутæ ба нæ нидæндæр кæнунцæ архайд, фæндуй сæ, сæ тугъдонти ирисхъæ базонунмæ ка бæллуй, уони содзаггаг фарстайæн: «Кæми нин айтæ?.. Кæмæй уæ байагорæн?..» – бæлвурд дзуапп раттун…

ХЕКЪИЛАТИ Маринæ