Тугъдон парадæй, акцитæ «Æнæмæлгæ полк», «Сæ цæсгæнттæмæ син бакæсæ», «Георгийи лентæ» æма æндæр гъуддæгутæй Цæгат Иристон исбæрæг кæндзæнæй Устур Фидибæстон тугъди советон адæми Уæлахези 81-аг анз.

Еугурадæмон бæрæгбонмæ цæттæдзийнади фарстатæ равзурстонцæ республикон оргкомитет «Уæлахез»-и. Амудта ’й Цæгат Иристони Сæргълæууæг Сергей Меняйло. Сæргълæууæг куд радзурдта, уотемæй аци бæрæгбон нæ алке зæрди дæр цæруй, нацизмбæл  фæууæлахез ун æнцон нæ адтæй.

– Нæ алкæмæн дæр дæнцæн иссæнцæ тугъди архайгутæ æма ветерантæ. Гъæуама сæмæ кæддæриддæр нæ цæстæ дарæн. Мадта мемориалтæ, циртдзæвæнтæмæ базелун  дæр  æй бони фæтки.

Уæлдай æргом раздахун гъæуй æригæнтти тугъдон-патриотон фарстатæмæ, аразун гъæуй тематикон уроктæ, скъолати гъæуама фæззиннонцæ тематикон къумтæ, – фæббæрæг кодта Сергей Меняйло.

Хецауади Сæрдари хуæдæййевæг Александр Реутов куд загъта, уотемæй Уæлахези кадæн Дзæуæгигъæу æма районти искæндзæнæнцæ дууæсæдемæ хæстæг аллихузон зæрдæбæлдарæн гъуддæгутæ.

Дзæуæгигъæуи 9 майи ци тугъдон парад уодзæнæй, уордæмæ Сергей Меняйлой амундæй гъæуама æрхононцæ Хетæгкати Къостай номбæл университети Тугъдон ахурадон центри курсантти, скъолати кадетти кълæсти ахурдзаути, хъазахъи минæвæртти. Уомæй уæлдай, Сæргълæууæг фæдздзурдта Медгъуддæгути республикон министрадæмæ, Уæрæсей Национ гвардий регионалон управлений разамундмæ, цæмæй сæ номдзуддæр рæнгъонти рахононцæ Уæлахези парадмæ.

Уæлахези бон комкоммæ уагæй «Æнæмæлгæ полк»-и архайгутæ Сабурдзийнади проспекти рацæудзæнæнцæ сæ кадгин фидтæлти, хеуæнтти къаристити хæццæ. Еци бон Цæгат Иристони Сæргълæууæг фембæлдзæнæй Устур Фидибæстон тугъди архайгути, фæскъилдуни фæллойни ветерантæ æма сæрмагонд æфсæддон операций архайгути хæццæ. Уæлахези бони размæ, 8 майи, деденгутæ кадгин уавæри исæвæрдзæнæнцæ мемориалтæ æма циртдзæвæнтæбæл.

Сергей Меняйлой хъæппæресæй 2021 анзæй фæстæмæ ке кæнунцæ, еци «Сæ цæсгæнттæмæ син бакæсæ»-йи акци дæр æ хъаури бацæудзæнæй. Дзæуæгигъæуи мэр Милдзихти Вячеслав куд загъта, уотемæй республики сæйраг сахари ес 2 минемæй фулдæр рекламон фæйнæгутæ, Устур Фидибæстон тугъди архайгути, ветеранти къариститæ ба ’нцæ 10,7 минемæй фулдæр. Нур дæр курдиæттæ ’рветунцæ адæм. Сæ бон сæ администрацийæн, берæкъабазгун центртæн есун æй 16 апърели уæнгæ.

Никкæдæр ма еу патриотон проект  – «Иристони адæми зæрдæбæлдард». Архивон служби сайт Устур Фидибæстон тугъди архайгути туххæй хабæрттæй идзаг кæнуй. Иристони цæргутæ еци хабæрттæ ’рветунцæ. Хецæнæй æрдзубанди кодтонцæ бæрæгбони рæстæг æдасдзийнадæ æма æхсæнадон фæтки туххæй. Цæгат Иристони Сæргълæууæг бафæдзахста еци бон базарти куст бауорамун, карз ниуæзтæ уæйæ кæнун дæр бауорамун Штыби фæзæ æма Дзæуæгигъæуи Сабурдзийнади проспекти.

Цæгат Иристони Сæргълæууæг æма Хецауади пресс-службæ