Уотæ æнгъæл дæн, æма алли рæстæгути дæр адæм алцæй разæй дæр бæлдтæнцæ амондмæ. Нæ исонибон ба нин никки амондгундæр уæд, зæгъгæ, хумæтæги нæ ковиуонцæ. Нури доги хъæбæр берæ ка иссæй, еци социологон æрфæрститæн дæр сæ фулдæр амонди туххæй фæуунцæ. Раст зæгъгæй, уæхæн æрфæрститæ уоййасæбæл цæстиварди ’нцæ: цума адæймагæн æ хæдзарæ бунисæфт кæнуй, кадæр ба ’й, уой фæдбæл ци зæгъдзæнæ, зæгъгæ, хинцфарст кæнуй, уой хузæн æнцæ.

Фал си уæддæр еуей бæрæггæнæнти кой ба ракæнон – уой дæр уомæ гæсгæ æма баст æнцæ нæ абони дзубандий фарстай – амонди хæццæ.

Цæветтонгæ, дзиллон цæстингас бæлвурдгæнæг агентадтæй еу еци æрфарст ци уæрæсейæгти ’хсæн исаразта, уонæй ракурдта, цæмæй фондзбаллон фæткæй пайда кæнгæй, исаргъ кæнонцæ, цæйбæрцæбæл амондгун æнцæ, уомæн. Æма бафарст адæмæн сæ 17 проценти сæ амонддзийнадæн исаккаг кодтонцæ «5».

Бафарсти архайгутæн сæ 11 проценти сæ уавæрæн аргъ кæнунцæ, сæхе æнкъарунцæ «2» баллемæй, «1» баллæй ба айдагъдæр 8 проценти. Ци гъæуй адæми амондгун исунæн, зæгъгæ, фарсти фæдбæл 61 проценти нимайунцæ, мизд син фæффулдæр кæнун, 49 процентти ба – се ’нæнездзийнадæ.

Бийнонти хæзнатæ ахсгиаг æнцæ 30 процентемæн, фæндуй сæ фулдæр рæстæг бийнонти хæццæ æрветун. Сæ уарзондæр архайди хæццæ амонд уинунцæ 28 проценти, сæ дæснийади хуæздæрбæл нимад æрцæуни ба – 27 проценти. Æмбæлтти хæццæ фембæлдтитæ исамондгун кæниуонцæ 26 проценти, кусти бунати уæлдæр исхезун ба – 24 проценти.

Мадта федералон портал «Мир квартир» ба ци аналитикон хатдзæгтæ искодта, уонæмæ гæсгæ Цæгат Иристони цæргути, зæгъæн, хæдзарæ балхæнунæн фæрæзнитæ бамбурд кæнунæн багъæудзæнæй 15 анзи, æфстæуттæ ескæмæй нæ есгæй. Гъæуама æ аллимæйон мизд ба уа 46 мин соми, хæдзари аргъ ба специалисттæ банимадтонцæ, куд 8,3 миллион соми. Æ мизд æнæгъæнæй гъæуама лæвæрд цæуа аци нисанæн (цума ’й хуæрун, цæуæт дарун, дзаумау, дзабуртæ æлхæнун, зианмæ, цийнæмæ цæун дæр æма æндæр æнæмæнгæ кæнуйнаг хæрзтæ нæ гъæуй, уой хузæн).

Еугуремæй фулдæр æхца æмбурд кæнун багъæудзæнæй Дагестани цæргути, æмгъуд æй 26,3 анзи, Мæхъæли – 26,6 анзи, Цæцæни – 23,4 анзи, Кæсæг-Балхъари – 15,6 анзи, Хъæрæсе-Черкессти – 15,5 анзи.

Цума циуавæр рæуагитæ рартастонцæ аналитиктæ? Ниллæг мизд Цæгат Кавкази федералон зилди æма хæдзæртти бæрзонд аргъ? Уотемæй мах амондгунти хигъди дæр куд гъæуама уæн… Уæхæн фарста ма фæззиннуй, нæ абони царди уавæрти нæ куд тухсун кæнунцæ æргъти æма аллихузон феддонти еудадзуг ирæзт. Уой фæдбæл æрмæг ба кæсетæ 7-8-аг фæрстæбæл.