Аци анзæй фæстæмæ сæрмагонд æфсæддон операций цæгатиристойнаг архайгутæн дæтдзæнæнцæ бæсти Социалон фонди реабилитаций центртæмæ хе дзæбæх кæнунмæ цæуни барæдæттæг еумæйаг билеттæ.

Социалон фонди реабилитаций центртæмæ æма фæстæмæ цæуни барæдæттæг еумæйаг билеттæ дæтдзæнæнцæ транспорти еугур хузтæн (поезд, хуæдтолгæ, хуæдтæхæг, автобус, кенæ донон транспорт нимайгæй). Дзæбæхкæнуйнади фæдбæл курдиæттæн аразий дзуапп райсуни хæццæ еци-еу рæстæг еумæйаг билет дæр исараздзæнæнцæ. Сæрмагонд æфсæддон операций архайгутæн уодзæнæй барæ равзарун, ци хузи ин ратдзæнæнцæ нади харзи аргъ, уой: компенсацийæй æма еумæйаг билети хузи. Нади харзи бафинсти нæуæг хузæй испайда кæнæн уодзæнæй аци анзæй фæстæмæ æрвист курдиæттæмæ гæсгæ. Адæймагмæ ес балцæг райсуни фæдбæл курдиадæ Уæрæсей Социалон фонди цæгатиристойнаг хайади цийфæнди клиентон служби, кенæ портал «Госуслуги»-й фæрци барветуни барæ.

Никкидæр ма еу нæуæгдзийнадæ барæ даруй сахъатдзийнади фиццаг къуари хæццæ сæрмагонд операций архайгутæн: нади харзи, цæруйнади æма хуаллаги аргъ кæмæн бафедунцæ, аци анзæй фæстæмæ амунд адæймæгутæмæ ес реабилитацион центртæмæ хе дзæбæх кæнунмæ уæхæн æмдзогæнгути хæццæ ’рбацæуни барæ. Медицинон бæрæггæнæнтæмæ гæсгæ, фæккæсуйнаг ка ’й, æмдзогæнгути хæццæ цæуни барæ ес уæхæн ветерантæмæ.

– Дзæбæхкæнуйнади рæстæг – документтæ æмбурд кæнун райдайунæй хæдзарæмæ ’рбаздæхуни уæнгæ – Социалон фонди республикон хайадæ сæрмагонд æфсæддон операций ветерантæй алкæмæ дæр цæстæ даруй. Реабилитацион центртæмæ барветуни рæстæг нимад цæунцæ ветерани æнæнездзийнади уавæри туххæй медицинон-социалон бæрæггæнæнтæ. Амæй размæ æртасуйнадæ ка нæ рацудæй æма инвалид ка нæй, еци ветерантæн реабилитацион центри банхæст кæнунцæ диагностикæ æма ин хецæнæй дзæбæхкæнуйнади фæткæ байамонунцæ. Уæрæсей Бæгъатæри ном кæмæ ес, кенæ фиццаг къуари æнæкустгъон ка ’й, сæрмагонд æфсæддон операций уæхæн архайгутæмæ ес Социалон фонди реабилитацион центртæмæ дзæбæх кæнунмæ æнæ кезуйæй сæ рарветуни барæ, – зæгъуй Социалон фонди цæгатиристойнаг хайади разамонæг Милдзихти Аслан.

Нуриккон вазуггин косæндзаумæуттæй ефтонггонд ка ’й, демобилизацигонд цæгатиристойнаг æфсæддон службæгæнгутæмæ ес дзæбæхкæнуйнади Социалон фонди реабилитаций дууадæс уæхæн центри рацæуни барæ. Аци центри æрбунæттон æнцæ Астрахани, Мæскуй, Владимири, Саратови, Кирови, Волгогради, Тюмени, Кемерови, Томски æма Омски облæстти, уæдта Краснодари край æма Республикæ Хакасий.

Санаторон-курортон дзæбæхкæнуйнади дæргъвæтийнæдзийнадæ ’й еу æма инсæй боней уæнгæ, медицинон реабилитаций æмгъуд алли адæймагæн дæр хецæнæй исбæлвурд кæнунцæ. Адæймагмæ ес санаторон-курортон дзæбæхкæнуйнади анзи дæргъи еунæг хатт рацæуни барæ, медицинон реабилитаци цал хатти банхæст кæндзæнæнцæ, е ба бæлвурдгонд æрцæудзæнæй медицинон бæрæггæнæнтæмæ гæсгæ.

Фарстати фæдбæл бадзорæн ес мæнæ аци номермæ: 8-800-100-00-01, телефонæй фæдздзорæн ес Уæрæсей Социалон фонди Еугонд контакт-центрмæ.

Уæрæсей Социалон фонди цæгатиристойнаг хайади кусти фæткæ: авдисæрæй цуппæрæнмæ – 9 сахаттемæй 18 сахаттей уæнгæ, майрæнбони ба – 9 сахаттемæй 16 сахатти æма 45 минуттей уæнгæ.