Цуппаринсæй анзи кæбæл исæнхæст æй, Уæрæсей Социалон фонди цæгатиристойнаг хайадæ республики цæрæг еци адæмæн пенсимæ федаргонд феддони бæрцæ æнæ курдиадæй дууæ хатти фæффулдæр кæнуй.

Нуртæккæ 80 анзей юбилей исбæрæггæнæг 24 минемæй фулдæр цæгатиристойнаг пенсиесæги фулдæргонд пенси есунцæ. Паддзахадæ ке исæвæруй, федаргонд феддуйнаг нимад æй карæмæ гæсгæ фæдзæхстадон пенсимæ зæрдæдарæнти хæццæ уæхæн уæлæфтауæнбæл. Нуртæккæ 9584,69 соми ке бæрцæ ’й, еци амунд уæлæфтауæни бæрцæбæл аллианз дæр æфтаунцæ. Цуппаринсæй анзи кæбæл исæнхæст æй, еци адæймаги пенсибæл бафтаунцæ амунд уæлæфтауæн.

– Цуппаринсæй анзи кæбæл исæнхæст уй, еци адæймагæн æ пенсимæ уæлæфтауæн æвæрунцæ æма ’й феддзæнæнцæ радон мæйæй фæстæмæ. Аци гъуддаги фæдбæл адæймагбæл ести курдиадæ æрветуни ихæс æвæрд нæййес. Зæгъæн, пенсиесæгбæл цуппаринсæй анзи кæд 20 апърели исæнхæст æй, уæд ин фулдæргонд пенси барветдзæнæнцæ майи 20 апърелæй 30 апърели уæнгæ æмгъудмæ бафтуди хæццæ,  фæстæдæр пенси, дувæр федаргонд феддуйнаг нимайгæй, æрветдзæнæнцæ алли мæйæ, – зæгъуй амунд хайади разамонæг Милдзихти Аслан.

Федаргонд феддуйнаг  нæуæгæй банимайуни барæ ес айдагъдæр карæмæ гæсгæ фæдзæхстадон пенсиесгутæн. Социалон, кенæ дарæги фесæфти фæдбæл пенси ка есуй, еци адæмæн феддуйнаг нæ фæффулдæр кæндзæнæнцæ. Фиццаг къуари æнæкустгъонтæн дæр сæ пенсий бæрцæ нæ фæффулдæр кæндзæнæнцæ, уомæн æма аци адæм, сæ карæ нæ нимайгæй, нуриуæнгæ есунцæ пенсимæ дувæр бæрцæй федаргонд феддуйнаг.

Уомæй уæлдай, 80 анзи кæбæл исæнхæст æй, еци адæймаги фæдзæхстадон пенсимæ æнæ курдиадæй æвæрунцæ зелуни фæдбæл уæлæфтауæн. Амæй размæ амунд компенсацион феддуйнаг æвардтонцæ пенсиесæги æма пенсиесæгмæ зелæг адæймаги курдиадæмæ гæсгæ, фал фарæй фæстæмæ Социалон фонди хайадæ феддуйнаг æвæруй хуæдбарæй. Пенсиесæгмæ ес æхцай фæрæзнитæй хе фæндонмæ гæсгæ испайда кæнуни барæ. Аци анзæй фæстæмæ адæймагмæ зелуни фæдбæл уæлæфтауæни бæрцæ ’й 1413,86 соми. Фæдзæхстадон пенси æма уæлæфтауæни бæрцæ алли анз фулдæргонд æрцæунцæ.

Фарстатæ уæмæ кæд байзадæй, уæд уæмæ ес Уæрæсей Социалон фонди еумæйаг контакт-центрмæ 8-800-100-00-01 телефонæй лæвар бадзоруни барæ (Социалон фонди цæгатиристойнаг хайади линий кусти фæткæ: авдисæрæй цуппæрæнмæ – 9.00 сахаттемæй 18.00 сахаттей уæнгæ, майрæнбони ба – 9.00 сахаттемæй 16 сахатти æма 45 минуттей уæнгæ).