Бийнонтæ, сæ есбони уавæр æма се ’фтуйæгти бæрцæ нæ нимайгæй, сувæллони райгурди рæстæг еурæстæгон пособи исæвæрунцæ.

Аци анзи райдайæнæй нурмæ амунд пособи райстонцæ 1,4 мин цæгатиристойнаг бийнонтæ (уой хæццæ – ка нæ косуй, еци ниййергутæ дæр). Уæрæсей Социалон фонди цæгатиристойнаг хайадæ аци гъуддагæн радех кодта 39,5 миллион соми.

Аци анз 28450 соми ке бæрцæ ’й, еци феддон дæттунцæ ниййергутæй еуемæн (æфтуйаги бæрцæ нæ нимайгæй). Бийнонтæн кæд цалдæр сувæллони райгура, уæд пособи федунцæ алли нæуæгигурдæн дæр.

– Косæг ниййергутæн пособи исæвæрунцæ проактивон уагæй (гъома, курдиадæ æрветуни ихæс æвæрд сæбæл нæ фæууй), ЗАГС-и оргæнтæй Социалон фонди хайадæмæ ка ’рбафтуйуй, сувæллони райгурди туххæй еци бæрæггæнæнтæмæ гæсгæ. Æхца бафедунцæ еугур гъæугæ бæрæггæнæнтæ райсуни фæсте дæс косгæ боней æмгъудмæ, – зæгъуй Уæрæсей Федераций Социалон фонди цæгатиристонаг хайади разамонæг Милдзихти Аслан.

Бийнонти дууæ ниййерæги дæр кæд косунцæ, уæд пособи анæй еуемæ барветдзæнæнцæ. Зæгъæн, кæд айдагъ фидæ косуй, уæд имæ феддон бафтуйдзæнæй.

Социалон фонди республикон хайади клиентон службæмæ, кенæ портал «Госуслуги»-й фæрци барветун ке гъæуй, ка нæ косуй, еци ниййергутæн пособи бафедунцæ уæхæн курдиадæмæ гæсгæ. Аци гъуддаг банхæст кæнун гъæуй сувæллони райгурдæй 6 мæйей æмгъудмæ. Пособи исæвæруни туххæй унаффæ дæр рахæссунцæ 10 косгæ бонемæ.

Архайæг фæткæмæ гæсгæ, материалон агъаз федун гъæуй сувæллонмæ ка кæсуй æма сувæллон  гъомбæл кæнунмæ райсæг адæймæгутæн дæр.

Фарстатæ уæмæ кæд байзадæй, уæд уин ес Уæрæсей Социалон фонди еумæйаг контанкт-центрмæ 8-800-100-00-01 телефонæй лæвар бадзоруни барæ (Социалон фонди цæгатиристойнаг хайади линий кусти фæткæ: авдисæрæй цуппæрæни уæнгæ – 9.00 сахаттемæй 18.00 сахаттей уæнгæ, майрæнбони ба 9.00 сахаттемæй 16 сахатти æма 45 минуттей уæнгæ).