Сергей МЕНЯЙЛОЙ фембæлд «Машук»-и арæзт ахурадон семинари архайгути хæццæ.

Нæ республики аци бæнтти ци берæ аллихузон цаутæ ’рцудæй, уонæн сæ хæдзарадон æма культурон ахедундзийнадæ уæлдай бæрзонддæр рауадæй сæ еугæнæг медес – нуриккон уавæрти нин уæлдай ахсгиагдæр нæ еудзийнадæ федардæр кæнун, æ гъомусади тухгиндæрбæл ба еугур равгитæ æма гæнæнтæй дæр архайун. Æма уин мæнæ ци цаути кой ракæнуйнаг ан, уонæми кæд комкоммæ уой фæдбæл дзубанди нæ цудæй, уæддæр сæ нисанеуæги бундор ба еци гъуди адтæй.

ЦÆМÆЙ НÆ ИСОНИБОНМÆ ЦÆУГÆЙ РÆСТВÆНДАГ УÆН!..

Сахар Пятигорски фæсевæдон мадзал «Машук»-и æрæги арæзт æрцудæй ахурадон семинар «Коммуникация и лидерство в действии. Команда РСО-Алания». Архайдтонцæ си нæ республики Сæргълæууæги æма Хецауади Администраций косгутæ, хецаудзийнади минæвæрттæ, сæрмагонд æфсæддон операций архайгутæ. Семинари ахурадон программæмæ гæсгæ куд нисангонд цудæй, уотæ си æрдзубанди кодтонцæ, абони сæ ахсгиагдзийнадæ уæлдай бæлвурд кæмæн æй, уæхæн аллихузон фарстатæбæл – фæсевæдæн бæлдтаг хабæрттæбæл, нæ Фидибæсти уодварнон хæзнати æведуйгæ фарни æма сæ исонибони фæлтæртæн дæр федауцæй багъæуай кæнуни, æвзурститæ аразуни æма си архайуни, информацион фæткити туххæй æма æндæр гъуддæгутæбæл.

Семинари архайгути хæццæ фембалдæй нæ республики Сæргълæууæг Сергей Меняйло. Æ радзубандий фиццагидæр уой баханхæ кодта, æма ауæхæн мадзæлттæ зæрдæмæдзæугæ æнцæ куд кæрæдзей хæццæ фембæлуни равгæ, фæл уæддæр сæйраг ба е æй, æма еумæйагæй æрдзубанди кæнгæй æрцæуæн нæ куст æнтæстгинæй райаразуни фæдбæл еумæйаг унаффæмæ, исбæлвурд кæнæн нæ исонибонмæ рæствæндагдæрæй цæуни мадзæлттæ. Уой фæдбæл дзоргæй æ гъуди адтæй:

– Еудзийнадæ æма æмгустадæ ’нцæ нæ цардгъондзийнади сæйрагдæр бундор æма сæ гъæуай кæнун, федардæр кæнун гъæуй…

Семинари рæстæги æ архайгутæн равдистонцæ кинонивæ «Рæстдзийнади надбæл». Дзубанди си цæуй, сæрмагонд æфсæддон операций Цæгат Иристонæй æ тугъдон ихæстæ ка ’нхæст кæнуй, уони туххæй.

– Кинониви алли радзурд дæр æй патриотизм, лæгдзийнадæ æма æхсари ирд æвдесæн,– загъта Сергей Меняйло. – Ци цаутæ æма хабæртти кой си цæуй, уони æнæмæнгæ гъæуй зонун. Махæй гъæуама иронх ма уонцæ нæ бæгъатæртæ. Арфæ кæнæн зонундзийнæдти центр «Машук»-æн, уæхæн ахсгиаг программæ царди ке рауагътонцæ, уой туххæй. Хецæн арфæ ба кæнæн кинонивæ исаразгутæ æма æ архайгутæн, сæ федар уодихъаурæ æма рæстдзийнадæн.

Кинонивæмæ бакæсуни фæсте семинари архайгутæ равардтонцæ фарстатæ Сергей Меняйло æма кинониви продюсер Кашина-Зассети Ольгæмæ.

Мадзали рæстæг Сергей Меняйло Арфи финстæгутæ равардта «Машук»-и ахурадон архайди департаменти хецау Екатеринæ Ханæн, Центри директори ихæстæ рæстæгмæ æнхæстгæнæг Дмитрий Садкойæн, кинонивæ «Рæстдзийнади надбæл»-и продюсер Кашина-Зассети Ольгæ æма проекти автор Аннæ Захарянæн.

*  *  *

Мæнæ ци семинари кой кæнæн, уоми æхцæуæн цаутæй ма иссæй е дæр, æма федералон проект «Медиа Рост» æнхæст кæнуни гъуддаги зæрдиагæй архайуни туххæй си Цæгат Иристони Хетæгкати Къостай номбæл паддзахадон университети историон факультети цæттæкæнуйнади къабазæ «Социологи»-й магистранткæ Багулти Алинæн исаккаг кодтонцæ нæ региони Сæргълæууæги Арфи финстæг. Æ хуæрзеуæг ин кадгин уавæри равардта нæ республики Сæргълæууæг æма Хецауади Администраций разамонæг Гобети Ибрагим æма уой фæдбæл æ радзубандий уотæ загъта:

– Пайдайаг проектти архайгæй, нæ фæсевæд æскъуæлхтдзийнæдтæ ке æвдесунцæ, е нин æхцæуæн æй. Алинæ æма нæ иннæ æригон специалисттæн сæ медесгун фæндитæ банхæст кæнун ке бантæсдзæнæй, е ни федарæй æруагæс кæнуй.

СÆРÆН ФÆСЕВÆДÆН – РАЗÆНГАРДГÆНÆГ АГЪАЗ

Цæгат Иристони фæсевæд цæйбæрцæбæл сæрæн æнцæ, цæйбæрцæбæл арфиаг гъуддæгутæй æскъуæлхунцæ, е зундгонд æй. Уой фæдбæл берæ ирд æвдесæнтæ ’рхæссæн ес. Зæгъæн, Уæрæсей культурон хъæппæрести Президенти фонд кæдæй арæзт æрцудæй, уæдæй ардæмæ æ гранттæй аккаггонд æрцудæй не ’мзæнхонтæй æригон архайгутæ. Æма си мах дæр сæрустур ан.

Уой бæлвурдæй баханхæ кодта нæ республики Сæргълæууæг Сергей Меняйло, æрæги ин Президентон фонди 2026 анзи грантти рамолуни дуккаг конкурси цæгатиристойнаг уæлахездзаути хæццæ ци фембæлд адтæй, уоми æ радзубандий. Фембæлд исаразунæн ма адтæй еума ахсгиаг рæуагæ – фонди исарæзтбæл исæнхæст æй  фондз анзи.

Не ’мзæнхонти ’рдигæй конкурсмæ ци дууæ æма дууинсæй проектти æвдист æрцудæй, уонæй аст райстонцæ агъаз.

Аци бæрæггæнæнмæ гæсгæ нæ республикæ Цæгат Кавкази федералон зилди субъектти ’хсæн байахæста фиццаг бунат. Еумæ райсгæй, грантти хузи фæрæзнитæ ’нцæ 24,5 миллион соми.

Сергей Меняйло зæрдиаг арфæ ракодта культурон хъæппæрести Президентон фонди 2026 анзи грантти дуккаг конкурси уæлахездзаутæн.

– Гранттæ райсун æхцæуæн куд нæй, фал уомæй сæйрагдæр ба е æй, нæ культури ирæзтæн, фæсевæди ’хсæн æ парахат кæнунæн хъæппæрестæ уæмæ ке фæззиннуй, е. Уæлахездзаути ’хсæн ес нæ адæми истори, æгъдæуттæ æма фæткитæ багъæуай кæнунмæ арæзт проекттæ. Нæ адæми равзурд, нæ фидтæлтæй нæмæ ци æведуйгæ хæзнатæ æрхъæрттæнцæ, уони арæхстгинæй багъæуай кæнун, историй сифтæ «райгас» кæнун, абони фæлтæрти æргом сæмæ раздахун, цæмæдесæй сæ равдесун æй вазуггин æма арф темæ. Æхцæуæн æй, уой бæрцæ хуарз æма пайдайаг проекттæ царди уагъд ке ’рцæудзæнæнцæ Цæгат Иристони сумах фæрци æма культурон хъæппæрести Президентон фонди агъазæй. Сумах айтæ сæрæн фæсевæд, зæрдиагæй уин арфæ кæнун!

Культурон хъæппæрести Президентон фонди Дзæуæгигъæуи проектон офиси разамонæг Байати Лолæ куд фæббæрæг кодта, уотемæй ци проекттæ фæууæлахез  æнцæ, уонæй дууæ баст æнцæ архитектури къабази хæццæ, е ба уæлдай æхцæуæндæр æй, уомæн æма 2026 анзи Цæгат Иристон нимад æй куд Архитектури анз.

Фембæлди архайгутæ радзурдтонцæ сæ проектти, уæдта конкурси архайуни фæлтæрддзийнади туххæй, базонгæ кодтонцæ сæ идарддæри фæндитæ æма нисанти хæццæ.

Куд загътан, уотемæй фонд аци анз исбæрæг кæндзæнæй æ фондзанзон юбилей. Еци рæстæг Цæгат Иристонæй гранттæ райсуни конкурсти архайдтонцæ 395 команди, 47 проекти иссæнцæ уæлахездзаутæ æма республикæмæ грантти хузи æрбафтудæнцæ 147 миллион соми.

Культурон хъæппæрести президентон фонди Дзæуæгигъæуи проектон офис байгон æй 2024 анзи, æма уæдæй ардæмæ консультацион æма методикон æгъдауæй агъаз кæнуй республики æнæкоммерцион æма коммерцион организацитæн, амалгъонти культурон, аййевадон æма креативон индустрий хъæппæрестæн.

НÆ БУДУРТИ ТИЛЛÆГÆРЗАД АГЪАЗЗАГДÆР КУД КÆНА…

Нæ Фидибæсти цæрæг адæмти ’хсæн еудзийнадæ æма æмархайд гъомусдæр кæнунæн культурон-ахурадон хъæппæрести хæццæ æмбæрцæ агъазгæнæг æй хæдзарадон гъуддæгути æнтæстгин райрæзт дæр. Уой фæдбæл æрхæсдзинан еу æвдесæн.

Зундгонд гъæууонхæдзарадон кустуат «Фат-Агро»-й хъæппæресæй бабæй Цæгат Иристони 13-14 августи арæзт æрцæудзæнæй аллианзон наукон-практикон форум – нур æстæймаг хатт. Федарæй уотæ зæгъун æнгъезуй, æма е исуодзæнæй агропромышленнон къабази ахсгиагдæр цау, æрбайеу кæндзæнæй науки, амалгъонади, гъæууон хæдзаради, аллихузон ведомствити минæвæртти.

Æ архайгутæ ба исуодзæнæнцæ иуазгутæ, æрцæудзæнæнцæ Уæрæсей алли регионтæ æма фæсарæйнаг бæститæй. Дзубанди си цæбæл цæудзæнæй, еци фарстатæн ба сæ сæйрагдæр исуодзæнæй – «Хуæрзмуггаг картофи муггаг рауадзуни нуриккон технологитæ». Специалисттæ се ’ргом фулдæр раздахдзæнæнцæ нæ будурти таун æма садзунæн нæхе фидибæстон хуæрзмуггагон хузтæ исаразуни фарстатæмæ, кустади ахедундзийнадæ фæгъгъомусгиндæр кæнунмæ инновацион технологитæ хæссуни гъуддагмæ.

Эксперттæ исбæлвурд кæндзæнæнцæ селекций нуриккон фадуæттæ, хуæрзмуггаг æрмæги æнæнездзийнадæ, къабази нимæдзон унаффитæй пайда кæнуни равналæнтæ, картоф даруни технологитæ, æ багъæуай кæнуни, импорти бæсти хе продукци уадзуни æма æндæр фарстатæ. Уæлдай æргом раздахдзæнæнцæ дуйнеуон æма регионалон æмгустадæмæ практикон фæлтæрддзийнадæй кæрæдземæн хай кæнунмæ, наукæ æма амалгъонади ’хсæн рахаститæмæ.

Аци цаути хабæрттæбæл рафæлгæст бацæттæ кодта ХЕКЪИЛАТИ Маринæ