Цæгат Иристони кæронмæ æрхъæрттæй республикон программæ «Иристони æхсарæ»-йи цуппæрæймаг къæпхæни куст. Ка си архайдта, етæ æнтæстгинæй равардтонцæ фæлварæнтæ æма райстонцæ сæрмагонд дипломтæ.

Уой фæдбæл арæзт бæрæгбони мадзали сæ хæццæ фембалдæнцæ Цæгат Иристони Сæргълæууæг Сергей Меняйло, нæ республики Парламенти Сæрдар Тускъати Таймораз, æма Хецауади Сæрдар Дзанайти Барис, фæллойнæ æма социалон агъазади министр Абайти Юрий, Уæрæсей адæмон хæдзаради Академий паддзахадон разамунди Уæлдæр скъолай директор Олег Кондратенко.

Кадгин мадзали архайгутæн зæрдиагæй райарфæ кодта Сергей Меняйло:

– Сæрмагонд æфсæддон операций архайгутæй гъæуама бæлвурдæй æруагæс кæна,  паддзахади ’рдигæй син агъазгонд ке цæуй, æма сабур царди уавæрти дæр сæ бон ке æй пайда æрхæссун нæ бæстæн, нæ адæмæн æма сæхецæн дæр. Нæ бæгъатæртæ алли бон дæр устур æскъуæлхтдзийнæдтæ æвдесунцæ тугъди будури.  Дзубандитæй нæ, фал гъуддагæй æвдесунцæ, æцæг патриотизм ци æй, уой, цæттæ ’нцæ Уæрæсей адæмти сæрбæлтау цийфæнди зиндзийнæдтæмæ дæр. Уæхæн адæм гъæунцæ нæ царди алли къабази дæр. Сумах айтæ нæ нифс…

Программæ «Иристони æхсарæ»-йи архайгутæн райарфæ кодтонцæ Тускъати Таймораз, Абайти Юрий æма Олег Кондратенко дæр.

Куд зонæн, уотемæй программæ «Иристони æхсарæ»-йи сæйраг ихæс адтæй сæрмагонд æфсæддон операций архайгутæ æма ветеранти бацæттæ кæнун, цæмæй сабур царди уавæрти дæр сæ бон уа профессионалон æгъдауæй разамунд дæттун промышленности, æнæнездзийнадæ гъæуайкæнуйнади æма æндæр къабæзти. Цæйбæрцæ æнтæстгин рауайдзæнæй аци æнæмæнгæ гъæугæ проект, уой ба цард æхуæдæг равдесдзæнæй.

Программи ци дууадæс æма инсæй адæймаги архайдта, уонæн ахури рæстæг еудадзуг фараст мæйей дæргъи сæ фарсмæ лæудтæнцæ фæлтæрдгин разамонгутæ. Сæ ахурадон программæ син бацæттæ кодтонцæ Уæрæсей Адæмон хæдзаради академий паддзахадон разамунди уæлдæр скъола æма паддзахадон службæ, автономон æнæкоммерицон организаци «Россия – страна возможностей». Уомæй уæлдай, сæ хæццæ кустонцæ нæ республики еугур министрадтæ æма районти разамонгутæ дæр. Кæронбæттæни къæпхæнмæ си ци аст æма инсæй адæймаги рахъæрттæнцæ, уонæн нур сæ бон уодзæнæй паддзахадон хецаудзийнади æма бунæттон хеунаффæйади оргæнти, Цæгат Иристони æхсæнадон æма æндæр организацити косун.

Рæствæндаг уæнтæ!