Цæгатиристойнæгтæ ниййерæги капитал ахиддæр бахарз кæнунцæ цæрæнуат балхæнуни, кенæ ’й райаразуни (уой хæццæ – æфстæуттæ райсгæй дæр) гъуддагбæл. Сертификати хецæуттæн ес капитали фæрæзнитæ цæрæнуат балхæнунбæл, райаразунбæл, ипотеки фиццаг феддонбæл, кенæдта цæрæнуатон уавæртæ фæннивæбæл кæнуни фæдбæл æндæр гъуддæгутæбæл исхарз кæнуни барæ.

Аци анз 950 цæгатиристойнаг бийнонтæ ниййерæги капитал исхарз кодтонцæ цæрæнуати уавæртæ фæннивæбæл кæнунбæл. Уæрæсей Социалон фонди цæгатиристойнаг хайадæ амунд гъуддæгутæн рахай кодта 740 миллион соми.

Сертификат кæмæн райстонцæ, еци сувæллонбæл æртæ анзи ку исæнхæст уа, уæд ниййергутæн ес капитали фæрæзнитæ цæрæнуатон уавæртæ фæннивæбæл кæнунбæл бахарз кæнуни барæ. Бундорон ихæс кенæ ипотеки фиццаг феддон ка федуй, амунд фæткæ уонæбæл  нæ хъæртуй (аци уавæри ниййергутæмæ ес сабийи райгурди, кенæдта ’й гъомбæл кæнунмæ райсуни хуæдфæсте капитали фæрæзнитæ бахарз кæнуни барæ).

– Цæрунæн бæзгæбæл ке банимадтонцæ, еци цæрæнуат æвдист домæнти аккаг æй, зæгъгæ, сæрмагонд къамис уæхæн хатдзæг ку искæна, айдагъдæр уæд сертификати хецæуттæмæ ес цæрæнуат балхæнуни барæ, ниййерæги капитали фæрæзнитæй испайда кæнгæй. Аци хатдзæг райсунæн адæймаги ихæс æй бунæттон администрацимæ хе бахатун. Амунд документ ка райса, сертификати еци хецаумæ ес ниййерæги капитал исхарз кæнуни туххæй курдиадæ барветуни барæ, – зæгъуй бæсти Социалон фонди цæгатиристойнаг хайади разамонæг Милдзихти Аслан.

Уомæй уæлдай, бийнонтæмæ ниййерæги капитали фæрæзнитæ цæрæнуат райаразунбæл исхарз кæнуни барæ дæр ес. Зæгъæн, хæдзарæн исаразæн ес уæлæнхасæн азгъунст, кенæдта дуккаг уæладзуг. Райарæзти фæсте хæдзари цæрæнуатон фæзуат цæмæй фæффулдæр уа, е нимад æй сæйраг æууæлбæл. Фатер кенæ хæдзарæ исцалцæг кæнуни куститæ ба цæрæнуатон уавæртæ фæннивæбæл кæнуни фæдбæл кустити номхигъдмæ ке нæ хаунцæ, уой нимайгæй адæймагмæ ниййерæги капитал амунд гъуддагбæл исхарз кæнуни барæ нæййес.

Уæ зæрдæбæл уин лæуун кæнæн: ниййерæги капитали сертификат райсунæн ниййергутæбæл Социалон фонди хайадæмæ курдиадæ барветуни æма ескæци документтæ бавдесуни ихæс æвæрд нæййес. Сертификатæн гæгъæдитæ аразунцæ проактивон уагæй (гъома, æнæ курдиадæй), æма уотемæй сертификат райсæн ес æнцонтæй. Сертификат æма ниййерæги капитали бæрци туххæй еугур бæрæггæнæнтæ дæр финст æнцæ портал «Госуслуги»-йи ниййерæги «Личный кабинет»-и.

Адæймагмæ ес ниййерæги капиталæй испайда кæнуни туххæй курдиадæ портал «Госуслуги»-йи фæрци,  Социалон фонди регионалон хайади клиентон службити, кенæдта цæрæнуат балхæнуни, кенæ ’й аразуни фæдбæл æфстауæн гæгъæдитæ цæттæ кæнуни рæстæг комкоммæ банктæмæ барветуни барæ. Курдиадæбæл фондз косгæ бонемæ æрдзубанди кæнунцæ. Аразий унаффæ ку рахæссонцæ, уæд æхцай фæрæзнитæ барветунæн дæр раттунцæ фондз косгæ бони.

Аци анз фиццаг сувæллонæн (гъома, 2020 анзи 1 январæй фæстæмæ райгурæгæн) ниййерæги капитали бæрцæ ’й 728921,9 соми; дуккаг сувæллонæн (сертификати фæдбæл барæ фиццаг хатт кæд 2020 анзæй фæстæмæ исæвзурдæй), уæдта – 963243,17 соми. Фиццаг сувæллонæн ниййерæги капитал кæд райстонцæ, уæд дуккаг сувæллони райгурди рæстæг уæлæнхасæн бафтауйнаг фæрæзнити бæрцæ ’й 234321,27 соми.

Фарстатæ уæмæ кæд байзадæй, уæд уæмæ ес Уæрæсей Социалон фонди еумæйаг контакт-центрмæ 8-800-100-00-01 телефонæй лæвар бадзоруни барæ (Социалон фонди цæгатиристойнаг хайади линий кусти фæткæ: авдисæрæй цуппæрæнмæ – 9.00 сахаттемæй 18.00 сахаттей уæнгæ, майрæнбони ба – 9.00 сахаттемæй 16 сахатти æма 45 минуттей уæнгæ).

Уæрæсей Федераций Социалон фонди цæгатиристойнаг хайади пресс-службæ