Иристон æма Кæсæг-Балхъари адæмтæ æности дæргъи кæрæдзей хæццæ æнсувæронæй ке цæрунцæ, е зундгонд æй. Нæ еци æнсувæрдзийнадæ фæлтæрæй-фæлтæрмæ цардгъон æй. Уотæ нæ нури доги дæр, æма уой фæдбæл берæ ирд æвдесæнтæ æрхæссæн ес. Уонæй еу иссæй, мæнæ æрæги Дзæуæгигъæуи ци агъазиау мадзал арæзт æрцудæй, е дæр. Цæйбæрцæбæл ахедгæ рауадæй, уобæл ба дзорæг æй æ ном дæр – «Еудзийнади æма хæлардзийнади нæдтæбæл». Цæгат Иристони цитгин иуазгутæ ба иссæнцæ Кæсæг-Балхъари Республики парламентарийтæ.

Фембæлд кæд æма æнæуой дæр хъæбæр зæрдæмæдзæугæ рауадæй, уæддæр уæлдай цийнаг ба е иссæй, æма еума хатт равдиста, дууæ синхаг республикей адæмтæ цæйбæрцæбæл æновуд æнцæ сæ кæрæдзебæл, цæйбæрцæбæл æхцæуæн син æй сæ алли фембæлд дæр сæ кæрæдзей хæццæ.

Кæсæг-Балхъари Парламенти Сæрдар Татьянæ Егорова уой фæдбæл уотæ загъта:

– Аци фембæлд æй нæ лимæндзийнади агъазиау киунуги нæуæг сифæ. Нæ дууæ республики лимæнæй цæрунцæ æности дæргъи. Е æй, аргъ кæмæн нæййес, уæхæн гъæздугдзийнадæ, æма нæ ихæс æй æ багъæуай кæнун, æма ’й кæстæр фæлтæртæмæ рæсугъдæй раттун. Нæ бастдзийнæдтæ никки федардæр цæмæй кæнонцæ, уомæн агъаз æй, евгъуд анзи ке бафинстан, дууæ парламентей ’хсæн æмгустади еци бадзурд дæр.

Не ’нсувæрон республикæй нæмæ ’рбацæуæг иуазгутæн æгасцæуай зæгъгæй, Цæгат Иристони Парламенти Сæрдар Тускъати Таймораз дæр баханхæ кодта:

– Дууæ республикемæн сæ арæн еу æй, фал нæ еу кæнуй, тæккæ фиццаг, доги сæрти ка рахизтæй, уæхæн æнсувæрондзийнадæ, лимæндзийнадæ, курухондзийнадæ, уодварни æмхузон хæзнатæ, нæ фидтæлти ’хсарæ. Абони ба еумæ цæрæн, æ берæнацион адæмтæй тухгин ка ’й æма нин еумæйаг хæдзарæ ка иссæй, уæхæн цитгин бæсти, æма æ багъæуай кæнун, рæсугъдæй кæстæртæмæ раттун æй нæ царди устурдæр нисан.