Адæймаг пенсий ке рацæуй æма косгæ ке нæбал фæккæнуй, уомæ кæд игетгæ фæккæнуй, уæддæр си цидæр хуарздзийнæдтæ дæр ес. Уой мæхуæдæг дæр балæдæрдтæн. Пенсий ку рацудтæн, уæд мин фæцæй равгæ, раздæр мæ æнхæст кæмæ нæ евдæлидæ, уæхæн зæрдæхцæуæн гъуддагмæ – фæззиндтæй мин берæ уæгъдæ рæстæг, æма ахид бауайун мæ хеуæнттæмæ, мæ дзæбæх синхæнттæмæ дæр. Уотемæй фæззонгæ дæн Цуцити бийнонти хæццæ дæр. Бийнонти мадæ – Габисати Зелимхани кизгæ Светланæ ’й нæ Иристони кадгин æма фарнæхæссæг силгоймæгтæй еу. Искурдиадæгин ахургонд, филологон наукити кандидат, нæ республики æскъуæлхт косæг, е берæ æнзти дæргъи бафæллойнæ кодта Цæгат Иристони Хетæгкати Къостай номбæл паддзахадон университети ахургæнæгæй, уруссаг литератури кафедри доцентæй.

Хуарзæнхæгонд æрцудæй дзурдарæхсти Уæрæсей академий Кади гæгъæдитæй æма майданæй «Ревнителю просвещения».

Габисати Светлани наукон фæллæнттæ иссæнцæ нæ наций гуманитарон есбойнади гъæздугдзийнадæ, абони дæр ма цæмæдесаг æнцæ,  национ æма уруссаг фольклористики актуалон фарстати фæдбæл æртасæн куститæ – сæдæ мухургонд кустемæй фулдæр, уомæй уæлдай æхе æргъудигонд дзоргæ адæмон исфæлдистади уадзимистæ æмбурд кæнуни методикæ. Уæлдай цæмæдесаг æнцæ æ куститæ «Ирон адæмон зартæ» æма «Хъазахъаг киндзæхсæвæрти поэзи».

Светланæ дууинсæй анземæй фулдæр фембурд кодта æ студентти хæццæ кафедри фольклорон архив, дæсни разамунд лæвардта студентти фольклорон практикæ æма наукон куститæн.

Хъæбæр берæ ес дзорæн еци æскъуæлхт силгоймаги туххæй. Берæ лæггæдти бацудæй Иристони наукæн, æма си устур арфиаг æнцæ æ кæддæри æмкосгутæ æма студенттæ.

Аллибон Светлани хæццæ ’мбæлгæй мин æргомæй-æргомдæр кодтонцæ æ дессаги уодигъæди менеугутæ – зæрдхæлардзийнадæ, хуæдæфсармæ, фæсевæди зундамонæг, федар æгъдаубæл хуæст. Светланæ æ гъæздуг фæлтæрддзийнадæ æма берæ зонундзийнæдтæй абони дæр, æ 90 анзей сæрти цæстуарзон хай кæнуй нæ ирæзгæ фæлтæрæн. Æ царди алли гъуддагæй дæр æй фæнзуйнаг фæсевæдæн.

Габисати Светланæ æ цардæмбал, зундгонд советон-партион косæг Цуцити Аркадийи хæццæ исгъомбæл кодтонцæ дууæ фурти Аслан æма Артури. Етæ абони ’нцæ нæ республики зундгонд наукон æма æхсæнадон архайгутæ. Сæ дууæ дæр иссæнцæ наукити кандидаттæ. Аслан раздæр æнзти разамунд лæвардта Цæгат Иристони национ рахастдзийнæдти министрадæн, 2021 анзæй абони уæнгæ ба ’й  Цæгат Иристони Национ музейи разамонæг. Артур ба ’й Дзæуæгигъæуи разамунддзийнади институти социалон æртасæнти Центри хестæр наукон косæг. Сæ дууемæн дæр ес бийнонтæ, гъомбæл кæнунцæ цæуæт.

Габисати Светланæн æ наукон хъазауат æнæгъæнæй дæр нæ адæмон исфæлдистади сæрбæлтау ке адтæй, уомæ гæсгæ æримисдзæнæн нæ фидтæлтиккон еу загъд: «Кадæ рантæсуй адæймагæн æ рæстзæрдæ цардиуагæй!..» Уой имисгæ ба уомæ гæсгæ ракодтон, æма Светланæн дæр дзилли ’хсæн ес бæрзонд кадæ, е ба рантæстæй æ рæстзæрдæ цардиуаги арфиаг гъуддæгутæй…

ИКЪАТИ Таисæ