Зундгонд куд æй, уотемæй Петербурги экономикон форуми архайдтонцæ Цæгат Иристони минæвæрттæ дæр. Уоми син ци берæ аллихузон фæмбæлдтитæ адтæй, уони рæстæги федаргонд æрцудæй æмгустади бадзубандигæндтæ аллихузон регионтæ æма кустадон еугæндти хæццæ.

Нæ республики Сæргълæууæг Сергей Меняйло форуми фæзтæй еуеми æнæнхæст баргин æхсæнадæ «Газпром межрегионгаз»-и генералон директор Сергей Густови хæццæ фембæлгæй, зæрдиагæй райарфæ кодта, Цæгат Иристони фæстаг æнзти ци устур куст бакодтонцæ, уой туххæй. Фæстаг фондз анзей дæргъи региони еугурафонон курорт «Мамисон»-и уæнгæ æвæрд æрцудæнцæ хизтæ, исаразтонцæ гази хæтæл газдæттæн станцæ «Зæрæмæг»-мæ, Алагири райони фараст гъæуемæ газ уагъд ке фæрци æрцудæй, гази уæхæн  хæтæл.

Нæ республики 2030 анзи уæнгæ ма гъæуама газ бауадзонцæ Алагир æма Ирæфи районти 18 гъæуемæ, альпинистон базæ «Коми-Арт»-мæ, æртæ газдæттæн станций ба нæуæгæй райараздзæнæнцæ. Горæтгæрон райони гази хæтæл-бæттæн  исараздзæнæнцæ, цæмæй цæргутæн газ æнæкъулумпитæй лæвæрд цæуа.

Социалон догазификаций программи фæлгæти республики цæргутæй æрбацудæй цуппар мин курдиади. Газ уагъд æрцудæй 2,9 мин хæдзаремæй фулдæремæ, аци программæ æнхæст кæнунæй Цæгат Иристон хаст æрцудæй нæ бæсти дæс хуæздæр регионей хигъдмæ.

Цæгат Иристони Сæргълæууæг Сергей Меняйло æма Хонсар-Нигулæйнаг Сбербанки сæрдар Анатолий Песенников бафистонцæ дувæрсуг бадзурд цифрон технологити къабази æмгустади туххæй  мадтæлон æвзаги хæццæ кусти. Бадзурди нисан æй мадтæлон æвзаги ирæзт æма æ рацуд устур цифрон фæзтæмæ.

Сбер регионæн информацион æма консультацион æгъдауæй фæййагъаз кæндзæнæй, исараздзæнæй экспертизæ æвзагбæл косунмæ машинтти фæрци. Республикæ ба исæмбурд кæндзæнæй æма бацæттæ кæндзæнæй гъæугæ бæрæггæнæнтæ æвзаги туххæй. Бадзубанди ма кодтонцæ цифрон æгъдауæй фарстатæ лух кæнуни фæдбæл еумæйаг косæг фембæлдтитæ æма цæлхæмбурдтæ аразуни туххæй.

– Нæ сæйраг нисан æй мадтæлон æвзаги корпус исаразун, – загъта Сергей Меняйло. – Е æй, нуриккон ИИ-модельтæ кæбæл ахур кæндзæнæнцæ, тексттæ æма бæрæггæнæнти уæхæн агъазиау базæ. Идарддæр е агъаз уодзæнæй цифрон сервистæн мадтæлон æвзаг хуæздæр лæдæрунæн æма æ хæццæ косунæн. Махæн нæ мадтæлон æвзаг айдагъ кæрæдзей хæццæ дзорунæн нæй. Е æй нæ истори, культурæ, фæлтæрти бастдзийнадæ. Архайæн уобæл, цæмæй мадтæлон æвзаг айдагъдæр киунугути ма цæра, фал – нуриккон цифрон æхсæнади дæр – лæдæронцæ ’й фæсевæд, дзоронцæ ибæл аллибон.

Уомæй æ хæццæ арази уогæй, Анатолий Песенников дæр загъта:

– Æвзаг айдагъ  дзорунмæ нæй, е адæмæн æй сæ уод, сæ истори æма культурон код. Нæ ихæс æй, цæмæй технологитæ лæггадæ кæнонцæ, айдагъ экономикæн нæ, фал адæми культурон бунтæ багъæуай кæнунæн. Мадтæлон æвзагæн ес дессаги литературæ, æма махæн æхцæуæн æй цифрон федæн ин исаразун. Республики Хецауади хæццæ еумæ нейрохизти исахур кæндзинан  мадтæлон æвзаг лæдæрун æма ибæл дзорун, цæмæй æвзаг ирæза цифрон доги, Цæгат Иристони цæргутæн ба сæ бон уа нуриккон технологитæй пайда кæнун сæ мадтæлон æвзагбæл, – загъта Анатолий Песенников.

Цæгат Иристони Сæргълæууæг Сергей Меняйло æма Республикæ Адыгейи Сæргълæууæг Мурат Кумпилов бафинстонцæ регионти ’хсæн æмгустади туххæй бадзурд. Уоми куд амунд æрцудæй, уотемæй фæуурухдæр уодзæнæнцæ базарадон-экономикон, наукон-техникон, культурон æма гуманитарон къабази бастдзийнæдтæ.

Форуми рæстæг Цæгат Иристони æма акционерон æхсæнадæ «ВымпелКом»-и (бренд «Билайн») ’хсæн æмгустади бадзурд бафинстонцæ республики Сæргълæууæг Сергей Меняйло æма компаний генералон директор Сергей Анохин. Бадзурди бундорбæл «ВымпелКом»-и телекоммуникацион инфраструктурæ Цæгат Иристони фæзуати фæппарахатдæр  уодзæнæй æма фадуат ратдзæнæй мобилон бастдзийнади хуæрзгъæдæдзийнадæ фæббæрзонддæр кæнунæн республики районти. Царди уагъд цæудзæнæнцæ инновацион проекттæ нуриккон технологити бундорбæл, уой хæццæ, аразгæ интеллектæй пайда кæнгæй дæр. Нæуæг технологитæ гъæуама  бахъæртонцæ медицинæ, туризм æма адæми цардиуагæмæ дæр.

– «Билайн»-и хæццæ еумæ косдзинан Цæгат Иристони цифрон экономики ирæзтбæл, мобилон бастдзийнади хуæрзгъæдæдзийнадæбæл. Еугур хъауритæй дæр архайдзинан, аци бон ци бадзурд бафинстан, уони цубур рæстæгмæ исæнхæст кæнунбæл, – загъта Сергей Меняйло.

– Дузæрдуггаг нæй, Сергей Анохин куд бахахæ кодта, уотемæй се ’мгустадæ республикæн ке фæййагъаз уодзæнæй региони бизнес, паддзахадон хецаудзийнади оргæнтæ æма социалон къабази ирæзтæн.

Фæббæрæг кæнун гъæуй уой, æма «Билайн» ке парахат кæнуй æ 4G хизæ республики, бастдзийнадæ ефтонг кæнуй туристти уарзон бунæттæ, уони хæццæ хуæнхаг курорттæ «Мамисон» æма «Цъæй».

Республикæ Цæгат Иристон-Аланий Сæргълæууæг æма Хецауади пресс-службæ