Цардиуаги еугур къабæзти æнæкъулумпи кусти, террори нихмæ, инфраструктурон кустуæттæ, организацитæ æма æхсæнадон уагæвæрд зингисервæзтитæй багъæуай кæнуни мадзæлттæбæл дзуапдæттæг республикон Оперативон штабæн æрæги ци æмбурд арæзт æрцудæй, уой  бони фæтки сæйрагдæр адтæнцæ Цæгат Иристони хуæдтолгитæн артаги нæхъæртондзийнадæ    æма ибæл федуни æргътæ æнæбундорон исбæрзонд кæнун нæ бауадзуни хæццæ баст фарстатæ рæй. Республики Сæргълæууæги æма Хецауади пресс-службæ куд фегъосун кодта, уотемæй федаргонд æрцудæнцæ фæстауæрци æнæййевгæ норматив, уæдта уæлрадон æма коммуналон службити моторон артагæй ефтонг кæнуни фæткæ. Уомæй уæлдай, æркастæнцæ региони артаг æма энергетики объекттæ терроризмæй багъæуай кæнуни кусти бæрæггæнæнтæмæ.

Æмбурдæн разамунд лæвардта нæ республики Сæргълæууæг Сергей Меняйло æма райдайæни æ радзубанди тæккæ фиццагидæр адтæй, артагæй нуртæкки кадавардзийнадæ райеуварс кæнуни туххæй ци мадзæлттæ арæзт цæуй æма ма никкидæр æнæмæнгæ ци исаразун гъæуй, уобæл. Æ загъд адтæй:

– Артагæвгæнæн станцити æнæбундоронæй æгæр хæлæфгонд ке цæуй артагбæл, уой фудæй си устур кезутæ исæвзуруй, æргътæ дæр си фæббæрзонддæр унцæ. Уомæ гæсгæ уобæл байархайун гъæуй, артагæвгæнæн станцити хецæуттæ артаг минкъийдæр уæйæ кæнуни унаффæ сæхуæдтæ ма хæссонцæ. Нури хузæн тухстаг уавæр ку исæвзура, уæд гъæуама унаффæ хæсса айдагъдæр  республики Оперативон штаб. Артагæвгæнæн станцити хецæуттæ сæхуæдтæ артаги æргътæбæл ку исхуæцонцæ, кенæ ба минкъийдæр ку уæйæ кæнонцæ, уæд сæ нихмæ гъæуама карз мадзæлттæ конд æрцæуа.

Еу загъдæй, федарæй хатдзæггонд адтæй: адæмæн дæр æма æхсæнадæн дæр ахсгиаг гъуддæгути хеваст миутæ кæнуни барæ æгириддæр некæмæн ес, уой ка нæ лæдæра, уомæй ба гъæуама карз дзуапп агурд цæуа.

Æмбурди архайгутæ ма æрдзубанди кодтонцæ республики цæргутæ, кустуæттæ æма социалон ахедундзийнадæ кæмæн ес, еци организацитæ æнæкъулумпитæй артагæй æфсадунæн уæлæнхасæн мадзæлттæбæл.