Нур кæдæй æма кæдæй ардæмæ еци дзорæги дзорæн нæ дзиллæмæ, еци корæги си корæн, цæмæй нæ мадтæлон æвзагбæл мухури фæрæзнитæ – газет «Дигорæ» æма журнал «Ирæф» – рафинсонцæ, æновуд сæбæл уонцæ. Фал нæ игъосæг ба уоййасæбæл нæййес, æма еци уавæр цæйбæрцæбæл æнæраст æй, уой балæдæрдтæнцæ нæ кæстæртæ æма хестæрти фезгули кæнуни ихæс сæхемæ райстонцæ. Гъе уотæ балæдæрун æнгъезуй мæнæ æрæги Чиколай сувæллæнтти къуар нæ республики адæмон артисткæ, Ирæфи райони сувæллæнтти исфæлдистадон еугонди разамонæг Цæрикъати Рими æма  райони киунугæдони сæргълæууæг Дзоблати Рими хъæппæресæй ци мадзал исаразтонцæ нæ мадтæлон æвзаги, газет «Дигорæ» æма журнал «Ирæф»-и цардгъондзийнади сæрбæлтау ци алæмæти зæрдæмæдзæугæ мадзал исаразтонцæ, уой. Еци æмбурдæй рацудæнцæ гъæунгти, сæ къохти адтæй дигорон æвзаги кадæн зæгъдтити хæццæ плакаттæ, уотемæй. Еци цæугæ-цæугæй ба аййевæй дзурдтонцæ дигорон æвзагбæл финст æмдзæвгитæ, иурстонцæ газет «Дигорæ» æма журнал «Ирæф»- хецæн номертæ.

Адæмæн аци мадзал сæ зæрдæмæ хъæбæр фæццудæй. Фал цума сæмæ багъардзæнæй кæстæрти мæтæ æма фæрразæнгард уодзæнæнцæ газет «Дигорæ» дæр æма журнал «Ирæф» дæр дзиллонæй рафинсунмæ? Уой рæстæг равдесдзæнæй. Мæнæ ци мадзали кой кæнæн, уой туххæй ба æрмæг кæсетæ 4-аг фарсбæл.