Зундгонд куд æй, уотемæй аци анз Уæрæсей нимад цæуй нæ бæсти адæмихæттити еудзийнади Анзбæл. Уой фæдбæл мухур кæнæн сæрмагондæй цæттæгонд æрмæгутæ. Уогæ æнæ уомæй дæр, нæ газеткæсгутæ ‘й хуарз зонунцæ, уæхæн æрмæгутæ нæмæ нæ газети ахид фæззиннунцæ, æма ма сæ идарддæр дæр  мухур кæндзинан.

Аллихузон адæмихæттити ‘хсæн еудзийнадæ уæд уодзæнæй, æма  си алке медæгæ дæр цитгийнагдæр менеугутæ ку уонцæ зæрдхæлардзийнадæ, кæрæдзей лæдæрундзийнадæ æма нимайундзийнадæ, уæдта уæхæн зæрдихаттæй иннæ адæмихæттитæмæ дæр кæсунгъон куд уонцæ. Уомæн æвдесæн абони (2-аг фарсбæл) ке мухур кæнæн, зундгонд журналист, дзенетибадæг Цъебойти Сергейи  еци уац. Кæд раги финст æрцудæй, уæддæр æй æримисун ба раст уодзæнæй – кæдимайди ба нæ нури фæсевæдæн зундихуасæн исбæззидæ…

Æ рæстæги хъæбæр сæрустур адтан, Цæгат Кавкази исфæлдистадон косгутæн кæрæдзей хæццæ ци федар зæрдхæлар рахастдзийнæдтæ адтæй, уомæй. Советон Цæдеси фехæлди фæсте фæззингæ æведауцæ фæткити фудæй сæ еци лимæндзийнадæ æрнидæн æй. Хуарз æма нур архайд цæуй æ иснæуæг кæнунбæл. Еци гъуддаги сæрбæлтау архайæн мах дæр – нæ газети ахид фæззиннунцæ аллихузон æрмæгутæ. Абони ба мухур кæнæн (6-7-аг фæрстæбæл) Кæсæг-Балхъари адæмон финсæг Хачим Теунови радзурд «Сæгут».