Къарæ ист æй социалон хизæгтæй

Евгъуд мæйи минкъий гъæуагæй  фараст мин цæгатиристойнаг ниййерæги райстонцæ бийнонти федонтæ. Аци гъуддаг исæнхæст кæнунæн Уæрæсей Социалон фонди цæгатиристойнаг хайадæ барвиста 205 миллион сомемæй фулдæр. Фиццаг июни ка райдæдта, курдиæттæ есуни еци фæткæ æнхæстгонд цæудзæнæй фиццаг октябри уæнгæ.

Ниййергутæ ке райсунцæ, еци феддонти бæрцæ аразгæ ’й, физикон еуæгти æфтуйагæй хъалон кæмæй банимайунцæ, еци æфтуйаги бæрцæй. Æртиндæс, кенæ уомæй фулдæр процентей бæрцæ хумæтæги ставкæмæ гæсгæ ке бауорамунцæ, еци хъалон нæуæгæй банимайунцæ 6 процентей бæрцæ льготон ставкæмæ гæсгæ. Райдайæн æма кæронбæттæн бæрци ’хсæн игъаугæдзийнадæ  ниййерæгæн раттунцæ еурæстæгон феддони хузи.

– Адæймагмæ ес курдиадæ портал «Госуслуги»-й, Социалон фонди хайади клиентон службитæ æма берæкъабазгин центри фæрци барветуни барæ, – зæгъуйУæрæсей Федераций Социалон фонди цæгатиристойнаг хайади разамонæг Милдзихти Аслан. Документтæ исаразунæн ахиддæр багъæуй айдагъ курдиадæ, иннæ бæрæггæнæнтæ ба байагорунцæ ведомствити æмгустади фæткæмæ гæсгæ. Еу кенæ иннæ информаци паддзахадон информацион системити æвдист ку нæ фæууй, уæд адæймаги ихæс æй уæлæнхасæн бæрæггæнæнтæ комкоммæ уагæй бавдесун.

Фарæ физикон еуæгти æфтуйæгтæн æвæрд хъалон ка фиста, 18 анземæй кæстæр тæккæ минкъийдæр дууæ сувæллоней хæццæ (сувæллæнттæ кæд бонæй ахур кæнунцæ, уæдта – 23 анземæй кæстæр) алли косæг ниййерæгмæ (сувæллæнтти гъомбæл кæнунмæ райсæг адæймагмæ, евгеддармæ) ес феддонæн документтæ исаразуни барæ. Феддонæн документтæ аразæг, курдиадæ барветæг адæймаг æма сувæллæнттæ гъæуама уонцæ нæ бæсти еудадзуг цæрæг Уæрæсей граждæнтæ, ниййергутæ гъæуама официалон уагæй косонцæ æма фарæ физикон еуæгти æфтуйæгтæн æвæрд хъалон гъæуама бафистайуонцæ. Уой хæццæ бийнойнаги рæстæмбес æфтуйаги бæрцæ фарæ региони фæццæрунæн гъæугæ тæккæ минкъийдæр хæрзтæй (Цæгат Иристони – 23940 соми) 1,5 хаттемæй фулдæр гъæуама ма уа.

Архайæг фæткæмæ гæсгæ, дууæ косæг ниййерæгемæ дæр ес бийнонти феддонæн документтæ исаразуни барæ. Ниййергутæ кæд рахецæн æнцæ, уæд аци æууæл аразий дзуапп нæ раттунæн рæуонæбæл нимад нæ уодзæнæй. Алименттæй ихæстæ нæййес, зæгъгæ, уæхæн æууæл аци уавæри нимад уодзæнæй æнæмæнгæ банхæсткæнуйнагбæл. Алименттæй ихæс кæмæ ес, уæхæн адæймагæн бийнонти феддон нæ бафеддзæнæнцæ.

17 анземæй кæстæр сувæллæнттæн æма æнгъæлдзау силгоймæгтæн еумæйаг пособий хæццæ куд æй, уотæ бийнонти феддони фæдбæл барæ исбæлвурд кæнуни рæстæг дæр нимайунцæ бийнонти финансон æма есбони уавæр.

Агъази аци мадзалæй испайда кæнунцæ анзи дæргъи еу хатт, адæймаги ихæс æй агъази аци мадзали фæдбæл барæ алли анз дæр бавдесунæн.

Фарстатæ уæмæ кæд  байзадæнцæ, уæд уæмæ ес 8-800-100-00-01 телефонæй  Уæрæсей Социалон фонди еумæйаг контакт центрмæ лæвар бадзоруни барæ (Уæрæсей Федераций Социалон фонди цæгатиристойнаг хайади линий кусти фæткæ: авдисæрæй цуппæрæни уæнгæ – 9.00 сахаттемæй 18.00 сахаттей уæнгæ, майрæнбони – 9.00 сахаттемæй 16.00 сахатти æма 45 минуттей уæнгæ).

Нæуæг хабæрттæ еугуремæй раздæр цæмæй базонайтæ, уой туххæй уæхе ниффинсетæ Уæрæсей Федераций Социалон фонди цæгатиристойнаг хайади канали мессенджер Макси: https:\\max.ru\id1504029836 gos.

* * *

УÆЛÆНХАСÆН ФÆЛЛАДУАДЗÆН БÆНТТÆ – НИЙЙЕРГУТÆН

Косгæ ка кæнуй, еци ниййергутæ, евгеддартæ æма æстдæс анзей уæнгæ инвалид сувæллæнттæмæ цæстдаргутæн сæ бон æй мæйæ цуппар уæлæнхасæн фæлладуадзæн бони райсун. Уонæй испайда кæнун æнгъезуй дохтиртæмæ цæугæй, сувæллони æнæнездзийнадæ фæффедардæр кæнунæн, кенæ æндæр ахсгиаг мадзæлттæ исаразунæн.

Анзи фиццаг æрдæг Уæрæсей Социалон фонди республикон хайадæ уæлæнхасæн фæлладуадзæн бæнттæн æхца бафедунæн радех кодта 2,7 миллион соми.

Ниййергутæн сæ бон æй еци бæнттæ се ’хсæн байуарун, кенæ ба си сæ еу гъæуама испайда кæна. Уæхæн уæлæнхасæн отпускæн æхца фист цæуй рæстæмбес мизди бæрцæ.

Фæлладуадзæн бæнттæ инвалид сувæллони ниййергутæн сæ бон райсун æй кенæ фæд-фæди, кенæ ба сæхе фæндæмæ гæсгæ æндæр бæнтти. Уомæй уæлдай ма еци бæнттæ æнгъезуй анзи æрдæг æмбурд кæнун æма си испайда кæнун уæлæнхасæн кустæй бауолæфунæн. Анзи еци бæнтти нимæдзæ цуппар æма инсæйемæй фулдæр гъæуама ма уа (кустдæттæги хæццæ бадзубанди кæнгæй).

– Зæрдæбæл дарун гъæуй: пайдагонд ци бæнттæй не ’рцудæй, етæ иннæ къæлиндарон анзмæ хаст нæ цæунцæ, æхца дæр син нæ дæттунцæ, – фæббæлвурд кодта Уæрæсей Социалон фонди республикон хайади разамонæг Милдзихти Аслан. Уæлæнхасæн фæлладуадзæн бæнттæ не ’нгъезуй радон отпускмæ бафтаун дæр, уотæ æнæ мизд бафедгæ отпуск æма æртæ анзей уæнгæ сувæллонмæ зелуни фæдбæл отпускмæ дæр.

Уæлæнхасæн фæлладуадзæн бæнттæ райсунæн ниййерæги ниффинсун гъæуй курдиадæ кустдæттæгмæ. Æ хæццæ ин бадæттун гъæуй дуккаг ниййерæги кустæй бæлвурдгæнæн гæгъæди пайдагонд уæлæнхасæн фæлладуадзæн бæнтти туххæй. Кæд ниййерæг аци анз æ кусти бунат раййивта, уæд еци бæлвурдгæнæн гæгъæди райсун гъæуй раздæри кусти бунатæй.

Кæд ма уæмæ фарстатæ исæвзурдæй, уæд уæ бон алкæддæр лæвар бадзорун æй Уæрæсей Социалон фонди еугонд контакт-центри телефони уæхæн номерæй: 800-100-00-01. Уæрæсей Социалон фонди цæгатиристойнаг хайадæ косуй авдисæрæй цуппæрæни уæнгæ – 9.00-18.00, майрæнбони – 9.00-16.45.