Республики Парламенти Сæрдар Тускъати Таймораз, æ хæццæ Парламенти депутаттæ Бæззати Алан æма Цæгæрати Руслан, уотемæй бабæрæг кодтонцæ сувæллæнтти реабилитацион центр «Тамиск». Ами базонгæ ’нцæ, фæлладуадзæн косæндонæ «Фидибæсти уарт»-и («Щит Отечества») бундорбæл арæзт æфсæддон-патриотон агъазиау æмбурди кæронбæттæни къæпхæни мадзæлттæ куд æнхæстгонд цæунцæ, уой хæццæ.

Парламенти Сæрдар, æ хæццæ санаторий разамонæг Цæгæрати Зæринæ, уотемæй æрзилдæй центри æрмадзитæбæл, базонгæ ’й, ци ахургæнæн фæзуæттæ си ес, уони хæццæ. Еци рæстæг Тускъати Таймораз радзубанди кодта сувæллæнтти хæццæ, æ хъауритæ бавзурста хуæцæнгарзæй æхсунæй æма, æхуæдæг ка тæхуй, уæхæн аппарати хæццæ куд архайун гъæуй, уомæй.

Сæрмагонд æфсæддон операций ветерантæ æма дæсни гъомбæлгæнгутæ ахурдзаутæн амонунцæ, автомат куд æмбурд кæнун, ихалун, æхсун си гъæуй, FPV-дронти хæццæ куд архайгæ ’й, фиццаградон медицинон агъаз куд кæнгæ ’й, уони æма æфсæддон  архайди æндæр сосæгдзийнæдтæ.

Уæхæн ахуртæ исаразуни хъæппæрес равдиста Цæгат Иристони фæсевæдон æхсæнадон организаци «Нæуæг фæлтæр», æ сæргъи – Парламенти депутат Бæззати Алан. Гранти хузи син фæййагъаз кодта æзмæлд «Движение первых». Сæ архайди нисан æй историон рæстдзийнадæ багъæуай кæнун æма феронх кæнун æй нæ бауадзун, кæстæртæмæ граждайнаг бæрнондзийнадæ ирæзун кæнун æма сæ райдайæн æфсæддон цæттæдзийнади арæхстдзийнæдти хæццæ зонгæ кæнун.

Нури ахуртæ ба æнцæ абони царди домæнтæн дзуапдæттæг патриотон гъомбæлади ахсгиаг къæпхæн.Райдæдтонцæ аци анзи 1 майи æма фæууодзæнæнцæ 30 ноябри. Сæ архайгутæ ’нцæ 12-11-анздзуд æнагъон сувæллæнттæ æма æригæнттæ, уæдта айдагъ нæ республикæй нæ, фал Уæрæсей æндæр сахартæй дæр. Программи аллихузон мадзæлтти нуриуæнгæ архайунцæ 3500 ахурдзауи. Ахуртæ дехгонд æнцæ æртæ къæпхæнебæл. Фиццаг бал кæронмæ æрхъæрттæй: экскурсити рæстæг фæсевæд бабæрæг кодтонцæ, нæ республики ка ’й, Устур Фидибæстон тугъди еци циртдзæвæнтæ. Нур цæуй дуккаг къæпхæн – тематикон сæрдигон кезутæ. Еци-еу рæстæг арæзт цæунцæ интеллектуалон-патриотон еристæ, гъæзтитæ æма турниртæ.

Ахурти архайгути зонундзийнæдтæн аргъ кæнунцæ Уæрæсей Бæгъатæр, республики фæллойнæ æма социалон ирæзти министр Абайти Юрий, республики фæсевæди гъуддæгути фæдбæл комитети сæрдар Джусойти Руслан æма сæрмагонд æфсæддон операций архайгути ветеранти ассоциаций сæрдар Магкати Олег. Сувæллæнтти хæццæ фембæлунмæ æма радзубанди кæнунмæ ахид æрбацæунцæ сæрмагонд æфсæддон операций ветерантæ дæр.

Ахурти архайгутæн райарфæ кæнгæй, Тускъати Таймораз баханхæ кодта уой, æма аци гъуддаг фæлтæрти ’хсæн бастдзийнадæ æнгонгæнæг ке æй.

– Адæймаг гъæздуг уæд фæууй, æма æ анзфинст, æ бийнонти, сæ муггаги хестæртæ ка адтæнцæ æма куд цардæнцæ, уой ку фæззонуй. Нæ цитгин бæсти гъæздуг истори зонун махæн нæ устурдæр тухæ ’й, – загъта Парламенти Сæрдар.

МАЛХЪАРТИ Зæлинæ