ДЗАНАЙТИ Барис, ХЪАМБОЛТИ Марат, КОКАЙТИ Михал.

Нæ еугурдæр æй уинæн, берæ рæстæгути дæргъи Дзæуæгигъæумæ хæстæг æма сауæнгæ уомæй идарддæр рауæнти ци сагъæссаг уавæр исæвзурдæй, уой – паддзахадон арæни сæрти Фæскавказмæ рабалци кæнунмæ сæ кезумæ берæгай бæнтти дæргъи æнгъæлмæ кæсунцæ сæдæгай уæзласæн хуæдтолгитæ. Æма еци æдзæлгъадæдзийнадæй ба хъæбæр тингун кæнунцæ айдагъ еци хуæдтолгити хецæуттæ нæ, фал нæ республики медæгæ нæдтæбæл балцигæнгутæ дæр – хъоргæнæг дæр син æй, уæдта нæдтæбæл цæуни æдасдзийнадæ дæр цауддæр кæнуй.

Уæхæн æведауцæ уавæр ке исæвзуруй, уомæн æ сæйрагдæр лазæ ’й, арæни сæрти рахезæн пункти равгити кадавардзийнадæ. Уотæ зæгъун не ’нгъезуй, æма æ фæррæвдзæдæр кæнунбæл тухсæг нæййес – ци гæнæн æма амал ес, уомæй берæ цидæр ахедгæ мадзæлттæ дæр арæзт цæуй. Зæгъæн, мæнæ æрæги Уæрæсей æма Хонсар Иристони ’хсæн хуæдтолгитæ уадзæн еунæг пункт «Дæллаг Зæрæмæг»-и кадгин уавæри байгон кодтонцæ нæуæг объекттæ.

«ÆНЦОНВАДУАТ УАВÆРТÆ АРÆЗТ ЦÆУДЗÆНÆНЦÆ ИДАРДДÆР ДÆР…»

Ци нæуæгдзийнæдтæ си арæзт æрцудæй, уонæн, аци рауæн еумæ бабæрæг кæнгæй, бæрзонд аргъ искодтонцæ Цæгат Иристони Хецауади Сæрдар Дзанайти Барис, Хонсар Иристони Сæргълæууæги ихæстæ рæстæгмæ æнхæстгæнæг Хъамболти Марат, Уæрæсей транспортон министради паддзахадон арæнбæл рахезæни пункти хуæрзвадуатдзийнади Уæрæсей паддзахадон политики департаменти директор Кокайти Михал, Цæгат Иристони Сæргълæууæги æма Хецауади Администраций разамонæг Гобети Ибрагим, Уæрæсей æдасдзийнади федералон служби арæнгъæуайгæнæг управлений сæргълæууæг Цæгат Иристони Сергей Балакин æма Цæгат Иристони таможний сæргълæууæг Цегойти Геуæрги.

Арæнбæл ци куститæ æнхæстгонд æрцудæнцæ, уони равгитæмæ гæсгæ арæзт æрцудæй транспортон еугæндти цуд, никки ма байгон æнцæ транспорти цудæн æртæ уæлæнхасæн тæлми. Фæззиндтæнцæ паспорттæмæ цæстдарди кабинеттæ æма шлагбаумтæ, æхсæз нæуæг модули цæстдарæн оргæнти кустæн, цалцæггонд æрцудæй нади уæлцъарæ, æма дууердæмæ над дæр фæуурухдæр кодтонцæ.

Уомæй уæлдай ма объекти бундоронæй райаразтонцæ бæлццæнтти терминал, радиацимæ цæстдаруни системæ, уæлæнхасæн мæнгазгъунститæ, барæвдзæ ин кодтонцæ æ фæзуат.

Хъамболти Марат фиццагидæр баханхæ кодта уой, æма  «Дæллаг Зæрæмæг»-и пункти агъазиау райарæзт бантæстæй Уæрæсей Федераций æма Хонсар Иристони еумæйаг архайд æма, се ’хсæн ци сæрмагонд бадзурдтæ бафинстонцæ, уой фæрци:

– Аци фарста хъæбæр тухсун кодта Хонсар Иристони цæргути дæр, цудæнцæ нæмæ гъæститæ, арæнбæл хезгæй, берæ рæстæг ке харз кодтонцæ, уой туххæй. Уомæ гæсгæ уавæр фæррæвдзæдæр кæнуни фæдбæл дзубанди кодтан Уæрæсей Федераций разамунди хæццæ фембæлди рæстæги, æма Уæрæсей Президенти фæдзæхститæмæ гæсгæ бантæстæй фарста ралух кæнун. Нæ уæрæсейаг æмгустгæнгути хæццæ идарддæр дæр архайдзинан уадзæн пункти модернизацибæл. Мæнæй æруагæс кæнуй, нерæнгæ ма нæ размæ ци цæлхдортæ лæуунцæ, етæ еуварсгонд ке æрцæудзæнæнцæ æма Хонсар Иристони цæргутæ арæни сæрти цубур рæстæгмæ æма хуарз уавæрти ке хездзæнæнцæ, е.

Дзанайти Бариси дзубандимæ гæсгæ, «Дæллаг Зæрæмæг»-и уадзæн пункти ци куститæ ’нхæстгонд æрцудæнцæ, етæ бæлццæнттæн фадуат ратдзæнæнцæ æнцонвадуат уавæрти цæунæн. Уой фæдбæл æ загъд адтæй:

– Абони ци проект банхæст кодтан, е фадуат ратдзæнæй дууæ субъектей ирæзтæн æма бæлццæнтти уодæнцойнæн. Уæрæсей Президенти фæдзæхстмæ гæсгæ уадзæн пункт «Уæллаг Ларс»-и модернизаций фæсте ци æййивддзийнæдтæ ’рцудæй, етæ фæййагъаз уодзæнæнцæ пункти куст ахедгæдæрæй райаразунæн. Мах хуарз гъуди кæнæн, бæлццæнтти хъæбæр берæ рæстæг æнгъæлмæ кæсгæй лæуун ке багъæуидæ, уой. Нур ба арæнбæл рахезуни рæстæг æй 15-20 минутти. «Дæллаг Зæрæмæг»-и пункти ци уавæртæ арæзт æрцудæй, етæ дæр уотæ фæййагъаз уодзæнæнцæ бæлццæнтти æнцондзийнадæн.

«Дæллаг Зæрæмæг»-и модернизацион куститæ æнхæстгæнгæй, специалисттæ уæлдай æргом раздахтонцæ, нæдтæбæл æхсæвигон æма бонигъæди цийфæнди уавæрти рæстæг дæр хуарз ка зиндзæнæй, уæхæн бæрæггæнæнтæй нæдтæ исфæлгонц кæнунмæ æма навигацимæ дæр. Рохсдæттæн экрантæ, нæдти хецæндзийнæдтæ амонæг нисантæ – етæ  фиццаг хатт фæззиндтæнцæ паддзахадон арæнмæ цæуæг нæдтæбæл.

Никки ма уадзæн пункт ефтонггонд æрцудæй нуриккон техникæ æма ефтонггæрзтæй. Уой фæрци бæрæггонд цæудзæнæнцæ хуæдтолгитæ, цæмæй си, ке не ’нгъезуй, уæхæн дзаумæуттæ ласт ма ’рцæуонцæ.

Еу загъдæй, арæзт цæуй æма идарддæр арæзт цæудзæнæй мадзæлттæ, цæмæй Уæрæсей арæнти сæрти цæуни гъуддаги нæ паддзахади фæрнугадæ дæр гъæуайгонд цæуа æма бæлццæнттæ дæр рæствæндаг кæнонцæ.

«АХСГИАГ НАДИ УАВÆРМÆ ЕУДАДЗУГОН ЦÆСТДАРД  НÆ ЕУМÆЙАГ ИХÆС ÆЙ…»

Уæрæсейæй Фæскавказмæ цæуни фадуæтти фæдбæл ма еума хабар дæр.

Уæрæсе æма Фæскавкази паддзахæдти ’хсæн рахастдзийнæдтæ аразуни гъуддаги ахсгиаг нисанеуæг ес Рокъи æфцæгбæл надæн.

Куд æгæрон устур æй æ ахедундзийнадæ, уотæ си тасдзийнæдтæ дæр берæ ес. Уомæ гæсгæ ба имæ еудадзугдæр лæмбунæг цæстдард цæуй.

Мæнæ æрæги бабæй нади уавæртæ исбæлвурд кæнуни туххæй имæ ’ркастæнцæ федералон косæндонæ «Федералон автомобилон нæдтæ «Кавказ»-и цæгатиристойнаг управлени»-й, нæ региони æрдзон равналæнтæ æма экологий министради, æнæнгъæлæги уавæрти федералон министради сæйраг цæгатиристойнаг управлений косгутæ, уæдта æнæнхæст бæрнондзийнади æхсæнадæ «Севосгеомониторинг»-и специалисттæ.

Зæйти рацудæй æма цæугæдæнтти райвулдтитæй уæлдай тæссагдæр кæмæн æй, нади уæхæн хæйттæ бæлвурдгонд æрцудæнцæ æма сæ оперативон картæмæ бахæсдзæнæнцæ, цæмæй си æвæстеуатон службити специалисттæ багъæуаги пайда кæнонцæ, уа син тæссагдзийнæдти туххæй хабæрттæ адæмæн рагацау игъосун кæнуни фадуат.

Рокъи æфцæги над раздæрау нимад æй уæлдай тæссагдæр надбæл. Зæйти рацуди фудæй ахид æхгæд æрцæуй. Специалистти дзубандимæ гæсгæ, хуæдтолгæскъæргути фидбилизтæй багъæуай кæнунæн фадуат цæмæй уа, уой туххæй над рæстæгмæ исæхгæнуни фæдбæл унаффæ рагацау рахæссунцæ. Уавæр ку æрлæмбунæг уй, уæд нади уæлцъарæ ракæдзос кæнун æма фидбилизи фæстеугутæ райеуварс кæнуни фæдбæл куститæ æнхæстгонд æрцæунцæ.

Цæстдарæн кусти бæрæггæнæнти туххæй дзоргæй, амунд сæйраг цæгатиристойнаг управлений хецауи ихæстæ рæстæгмæ æнхæстгæнæг Сергей Веретенников зæгъуй:

– Рокъи æфцæги надбæл цæуни æдасдзийнадæбæл архайун нимад æй нæ еумæйаг ихæсбæл. Рæстæгæй-рæстæгмæ цæстдарæн куст æнхæст кæнгæй, фидбилизтæй адæми багъæуай кæнуни фадуат фæууй. Нæ оперативон службитæ нади тæссаг хæйтти картæй арæхстгинæй пайда кæнунцæ. Хуæдтолгæскъæргутæ сæхуæдтæ дæр цæмæй тæссаг уавæртæй сæхе гъæуай кæнонцæ, уой туххæй син фæдзæхсæн, сæхе куд гъæуама даронцæ, уой, уæдта уой дæр, æма бонигъæди бæрæггæнæнтæ рагацау куд бæлвурд кæнонцæ. Фидбилизи бахауни бæсти адæймаг лæгъуз бонигъæди фæуунмæ бангъæлмæ кæсæд.

ГÆТИЙТИ Светланæ