СОЦИАЛОН ЛÆГГÆДТИ ЦЕНТРИ КУСТ

Национ проект «Бийнонтæ»-йи фæлгæти Дигори райони цæргути социалон лæггæдти комплексон центр идарддæр дæр  кадæ кæнуй, æнзтæ берæ кæбæл рацудæй, еци адæмæн. Е æй хуарз æма зæрдагайгæ традици, хестæр кари адæмæн алливæрсуг агъаз бакæнунæн, алли фæлтæрти ’хсæн бастдзийнæдтæ федардæр кæнун æма бийнонти традицитæ багъæуай кæнунæн.

Æрæги æ 95 анзей бон исбæрæг кодта сахар Дигорай цæрæг Хъолоти Георгий кизгæ Симæ. Уæхæн рæсугъд бæрæгбони фæдбæл æй бабæрæг кодта Комплексон центри специалист Гуцати Маринæ. Зæрдиаг арфæ ин ракодта еугур центри косгути номæй æма ин балæвар кодта зæрдæбæлдарæн лæвар.

– Нæ зæрдæ дин зæгъуй федар æнæнездзийнадæ, уоди гъар æма фæрнугадæ, – загъта ин Маринæ.

Уæхæн æхцæуæн мадзæлттæ æвдесæн æнцæ, паддзахадон социалон политики устур ахедундзийнадæ ке ес, уомæн. Е арæзт цæуй зæрдиагæй ауодунадæмæ, ветерантæ æма рацæргæ адæмæн кадæ кæнунмæ, фæлтæрти ’хсæн бастдзийнадæмæ æма фæсевæдæн сæ царди фæлтæрддзийнадæй хай кæнунмæ.

РАВДИСТ – БИЙНОНТÆН

Станицæ Николаевскаяйи киунугæдони – Дигори райони центрон библиотеки дæлхайади æ куст райдæдта бийнонти сæрмагонд равдист сувæллæнттæ æма сæ ниййергутæн «Сумахæн, сабийтæ – нæуæг киунугутæ».

Æ исаразгутæн национ проект «Бийнонтæ» сæ размæ ци ихæс æма нисан æвæруй – еумæ киунугутæ кæсуни бийнонти традицитæ фæффедардæр кæнун æма ирæзгæ фæлтæри литературæмæ цæмæдесдзийнадæ исæвзурун кæнун, уони исæнхæст кæнунбæл зæрдиагæй архайунцæ.

Равдист исхонæн ес бийнонти еумæйаг фæлладуадзæн фæзуат. Ами ниййергутæн сæ сувæллæнтти хæццæ сæ бон равзарун æй зæрдæмæдзæугæ литературæ. Цæмæй сабийтæ æма сæ хеуæнттæ литератури алæмæти дуйней ранигъулонцæ, уой туххæй æрæмбурд кодтонцæ еугуремæй ирддæр, аййевдæр, хузгин, зæрдæскъæфæн нæуæг киунугутæ, аргъæуттæ, алæмæти хабæрттæ, æмдзæвгитæ, игъæлдзæг радзурдтæ, детективон уадзимистæ, энциклопедитæ æма наукон-популярон – еу дзурдæй, алли кари сабийтæн дæр цæмæдесаг ка ’й, уæхæн литературæ, агъаз æй сæ райрæзтæн, ахур сæ кæнуй раст гъуди кæнун æма дзорунбæл, ниййергутæн ба – сæ сувæллæнтти фарстатæн дзуæппитæ раттунæн.

Уæхæн мадзæлттæ агъаз æнцæ фæлтæрти æнгомдзийнадæн, киунугæ еумæ бакæсун ба исуодзæнæй бийнонти традици.