Уæрæсей Федераций вице-премьер Дмитрий Чернышенко Мæскуй ци селекторон æмбурд исаразта, уой архайгутæ бундоронæй æрдзубанди кодтонцæ еумæйаг, астæуккаг профессионалон æма уæлдæр ахурадон уагæдæнтти ахури нæуæг анзи цæттæдзийнади хæццæ баст фарстатæбæл.

Мадзали архайдтонцæ Уæрæсей рохсади министр Сергей Кравцов, наукæ æма уæлдæр ахуради министри хуæдæййевæг Еленæ Тумакова, Уæрæсей субъектти сæргълæугутæ, регионалон хецаудзийнади ахуради управленити разамонгутæ, Президенти Æнхæстбаргин минæвæрттæ федералон зилдти. Цæгат Иристони студийæй ма видеобастдзийнади фæрци æмбурди архайдтонцæ дзуапдæттæг министрадтæ æма ведомствити разамонгутæ.

Дмитрий Чернышенко сæрмагонд æргом раздахта сувæллæнттæ æма инфраструктури æдасдзийнадæмæ, кадртæ æма ахургæнæн киунугутæ фагæ ес æви нæ, уæдта кадгин линейкитæ куд арæзт цæудзæнæнцæ, еци фарстатæмæ. Алли сувæллони æдасдзийнадæ дæр сæйраг гъуддаг æй, æма уобæл еумæ косунцæ Медгъуддæгути министрадæ, Уæрæсей гварди æма регионтæ.

Æ радзубандий Дмитрий Чернышенко æмбурди архайгути зæрдæбæл æрлæуун кодта, ахургæнгутæн уæлæнхасæн агъази мадзæлтти туххæй Указ. Нур еци мадзæлттæ регионти практикон æгъдауæй гъæуама æнхæстгонд цæуонцæ. Æма вице-премьер ахуради регионалон оргæнтæн бафæдзахста еци фарстамæ еудадзуг цæстæ дарун.

Идарддæр нæуæггонд цæуй ахурадон инфраструктурæ – сувæллæнтти рæвдауæндæнтти, скъолатæ, колледжтæ æма уæлдæр ахургæнæндæнтти. Нерæнгæ бал арæзт æрцудæй 1,7 мин скъолай. Сæрмагонд цæстдард цæуй университеттæ æма студентти æмдзæрæнти инфраструктури модернизацимæ.

Регионти разамонгутæн ихæсгонд æрцудæй еугур цæттæгæнæн мадзæлттæ дæр ахури анзи райдайæнмæ фæуун, линейкитæ гъæугæ уавæрти исаразун, скъолати киунугутæ фагæ ес æви нæййес, уой исбæлвурд кæнун.

Рохсади министр Сергей Кравцов фегъосун кодта:

– Ахуради системæ еумæ райсгæй, ахури анзи райдайæнмæ цæттæ ’й. Уинæн, ахургæнгути ваканситæ дæр минкъийдæр ке кæнунцæ. «Роструд»-и бæрæггæнæнтæмæ гæсгæ, сæ нимæдзæ фæмминкъийдæр æй 1,1 процентей бæрцæ, фари хæццæ рабаргæй.

Æмбурди архайдта нæ республики Хецауади Сæрдар Дзанайти Барис дæр, æма æ радзубандий загъта:

– Цæгат Иристон ахури анзи райдайæнмæ цæттæ ’й. Еудадзуг лæмбунæг каст цæуй æдасдзийнадæ æма ахуради хуæрзгъæдæдзийнади фарстатæмæ. Сæ цæттæдзийнадæ син исбæлвурд кодта сæрмагонд къамис. Предметон къæбинети ес гъæугæ интерактивон ефтонггæрзтæ, компьютертæ, берæфадуатгун арæзтитæ. Еугур скъолати дæр ес тæвдæ хуæруйнаг исаразунæн гъæугæ уавæртæ.

Уомæй уæлдай, национ проект «Фæсевæд æма сувæллæнттæ»-йи фæлгæти республики идарддæр цæуй ахедгæ куст скъолатæ æма рæвдауæндæнтти бундорон цалцæгбæл.

Дзанайти Барис ма куд фегъосун кодта, уотемæй республики Сæргълæууæг Сергей
Меняйлой унаффæй къуар хъæппæреси æнхæстгонд цæудзæнæнцæ. Зæгъæн, республикон программæ «Ахургæнæг – дæ фарсмæ» – æригон ахургæнгутæн методикон амунддзийнæдтæ райсунæн сæ кусти фæлтæрдгун ахургæнгутæй. Уомæй уæлдай ма ес фæндæ «Пушкини картæ»-й халдех исаразун регионалон программæ «Хетæгкати Къостай картæ».