Нæ дзиллæмæ, æвæдзи, уæхæн нæ разиндзæнæй, æма ка нæ зонуй нæ номдзуд, æностæмæ нин цитгийнаг Малити Геуæргий мæнæ аци фæдзæхст:

Рохсмæ, фæсевæд, тундзетæ,

Рохсмæ цæуетæ æнгом,

Нифс, лæгдзийнадæ уарзетæ,

Скæнтæ муггагмæ стур ном.

Арвмæ мæсуг амайетæ,

Хормæ скæнетæ фæндаг,

Гъæйт, зæрдиуагæй уайетæ,

Догъи ма уотæ фæстаг!

Ахид æримисуй аци рæнгъитæ Хъамболти Марат дæр – зундгонд ахурадон æма паддзахадон архайæг, абони ба Хонсар Иристони Президенти ихæстæ æнхæстгæнæг. Æма сæ уотид зæрдидзæбæхæн нæ æримисуй, фал син сæ медес бæлвурд арфиаг гъуддæгутæй исцардгъон кæнуни фæндæй. Лæдæрд æй, цæмæй фæсевæд царди догъи ма уонцæ фæстаг, цæмæй сæ ирисхъæ нисантæ æнхæст кæнунгъон уонцæ, уой туххæй син сæ нифсхастæн агъаз кæнун дæр гъæуй. Æма еци гъуддагмæ ба зингæ æвæрæн хæссуй Хъамболи-фурт. Еудадзугдæр æ равгитæ æма гæнæнтæй æмбæрцæ агъаз кæнуй  ахурдзау кæстæртæн. Мæнæ нур дæр бабæй син зæрдæхцæуæн лæвæрттæ бацæттæ кодта – æ райгурæн Ирæфи райони аци анз ахур кæнун ка байдайдзæнæй, еци фиццагкъласонтæн – æдеугурæй æхсæзинсæй биццеуи æма кизгемæн – сæ бæрæгбони фæдбæл æ номæй лæвæрд æрцæудзæнæнцæ ахургæнæнгæрзти æмбурдгæндтæ. Махмæ гæсгæ, дзорун дæр ибæл нæ гъæуй, е сабий ахурдзаутæн сæхецæн дæр æма сæ ниййергутæн дæр цæйбæрцæбæл æхцæуæн уодзæнæй, цæйбæрцæбæл зæрдиаг арфитæ ракæндзæнæнцæ сæ хуæрзгæнæг Хъамболти Маратæн. Устур æфсапæ бакуста æма си Хуцау арази уæд, æ гъуддæгутæ рæстмæ æма æнтæстгин уæнтæ.