Къарæ ист æй социалон хизæгтæй

Райдæдта нæуæг ахури анз! Райдзаст кълæстæ æма тургътæ æнгъæлмæ кæсунцæ ахурдзаутæмæ. Хуарз ахур кæнунæн, сувæллæнтти æнæнездзийнадæ федар кæнунæн не скъолати ес еугур гæнæнтæ дæр.

Нæуæг ахури анзи райдайæнмæ, Зонундзийнæдти бонмæ, зæрдиагæй фенгъæлмæ кæсунцæ скъоладзаутæ, ахургæнгутæ, ниййергутæ. Уæлдайдæр ба æзинæ дæр ма æнæмæтæй ка гъазта æма фиццаг къласмæ ка бацæудзæнæй, цæхæри хузæн еци биццеутæ æма кизгуттæ. Æма куд нæ! Етæ, скъолай фарни къæсæртæбæл бахезгæй, сæхецæн байгон кæндзæнæнцæ нæуæг – зонундзийнæдти дуйне. Искæндзæнæнцæ сæхецæн нæуæг лимæнтæ, нæуæг æмбæлттæ, фал сæ хуæздæр лимæн æма ахури надбæл æмбæлццон уодзæнæй киунугæ, зæрди æма зунди рохс кæцæй есдзæнæнцæ, еци дессæгти дессаг. Сувæллон сувæллон æй, æ зæрдæ нурма гъазунмæ æхсайдзæнæй, фал сæ царди нæуæг къæпхæнмæ ке бахездзæнæнцæ æма сæ рахаст раййевун ке гъæудзæнæй, уой син гъæуама сæ зунди ниффедар кæнонцæ сæ ахургæнгутæ, сæ ниййергутæ.

Республикæ Цæгат Иристон-Аланий ахурадæ æма науки министр Алибегти Эллæ исбæрæг кодта, нæуæг ахури анзмæ министради къохи ци фарстатæ бантæстæй ралух кæнун, уой.

Æ дзубандимæ гæсгæ, республики еугур районти дæр рахецæн æнцæ ахургæнгути августи мæйи æмбурдтæ. Дзубанди си цудæй нæуæг ахури анзи нисантæбæл, кадгин уавæри лæвæрд æрцудæнцæ 186 федералон хуæрзеуæги.

– Аци нæуæг ахури анзмæ бундорон цалцæги фæсте байгон æнцæ 14 скъолай, еу скъола ба – райарæзти фæсте. Регион нæуæг ахури анзмæ райста 258673 нæуæг ахургæнæн киунуги: 51304 – ирон æвзаг æма литератури, 55160 – паддзахадон ахургæнæн киунугутæ æхсæнадæ зонунадæ æма историй, 152209 – «ФГОС»-и фæлгæти фонд иснæуæг кæнунæн. Никки ма нæуæг ахури анзæй республики гъæути косун райдайдзæнæнцæ 19 ахургæнæги национ программæ «Гъæууон ахургæнæг»-и фæлгæти. Алкедæр си паддзахади къазнайæй райста 1 миллион соми, цæмæй син сæ нæуæг бунати цæрунæн æма косунæн агъази фæрæзнæ уонцæ. Нæуæг ахури анзи фиццаг къласмæ бацæуни туххæй балæвардтонцæ 8347 курдиади. Фиццагкъласонтæ республики Сæргълæууæги номæй райсдзæнæнцæ лæвæрттæ.

Нæуæг ахури анзæй республики скъолати косун райдайдзæнæй 138 æригон ахургæнæги. Никки ма райстан 27 нæуæг автобуси. Нур республики скъолати ес æдеугурæй 192 автобуси, – фæннисан кодта министр.

Нæ кæстæртæн сæ федæн бæллеццаг æма амондгун уæд. Царди хуарздзийнæдтæй хайгин уотæ, нæ дзæбæх кизгуттæ æма биццеутæ. Аккаг хъæболтæй байрæзетæ нæ Райгурæн бæстæн.