Республикæ Цæгат Иристони Сæргълæууæги ихæстæ рæстæгмæ æнхæстгæнæг Сергей Меняйло хецауади æнхæстгæнæг оргæнти разамонгути хæццæ ци фембæлд исаразта, уоми дзубанди цудæй, хе фæрæзнити фæрци фатертæ исамал кæнун ка исфæндæ кодта, фал си ка фæффудевгед æй æма цидæр анхосæгти фудæй цæрæнуæттæ ка нæ райста, еци адæми бартæ багъæуай кæнунбæл.

Нæ республики Арæзтадæ æма архитектури министри ихæстæ рæстæгмæ æнхæстгæнæг Моргуати Константин куд радзурдта, уотемæй, æ рæстæги адæми къуæрттæн хæдзæрттæ аразун ка райдæдта, фал арæзтæдтæ кæронмæ ка нæ рахъæртун кодта, уæхæн компанитæй цалдæр бабун æнцæ. Уомæ гæсгæ ба æрдæгарæзтæй ниууагътонцæ 6 берæфатерон цæрæн хæдзари (сæ еумæйаг фæзуат – 60 мин квадратон метри). Адæм æхца бафистонцæ, сæ зæрдæ дардтонцæ нæуæг фатертæ райсунбæл, фал сайди бахаудтæнцæ.

Адæми еци къуæртти бартæ гъæуама закъони бундорбæл гъæуайгонд æрцæуонцæ. Уæхæн нисан профилон ведомствити размæ исæвардта Сергей Меняйло. Æ дзубандимæ гæсгæ, фарста ралух кæнуни гъуддаги æнгом æмгустадæ гъæуама уа Цæрæнуæтти арæзтади сæйраг адæми бартæ гъæуайгæнæг федералон фонди хæццæ.

Моргуати Константин куд фæббæлвурд кодта, уотемæй нуртæккæ гъæугæ гæгъæдитæбæл косунцæ, цæмæй еци хæдзæртти арæзтадæ кæронмæ рахъæртун кæнонцæ. Æ дзубандимæ гæсгæ, еци объекттæбæл куститæ рахецæн кæнунæн республикæ гъæуама байагора 98 миллион сомей бæрцæ. Еци æууæл лæдæргæй, республики разамонæг финансти министри ихæстæ рæстæгмæ æнхæстгæнæг Оксанæ Каровайæн байхæс кодта, цæмæй аци нисанæн гъæугæ фæрæзнитæ радех кæнонцæ республикон бюджетæй, æцæг, еци фарста уотæ исаразун гъæуй, цæмæй иннæ ахсгиаг социалон хæрзтæ æгириддæр кадаваргонд ма ‘рцæуонцæ.

Æмбурди архайгутæ се ‘ргом раздахтонцæ, адæми кæлæдздзаг хæдзæрттæй нæуæг цæрæнуæттæмæ раййевуни программæ куд æнхæстгонд цæуй, уомæ дæр.