Хуæрзконд уосæ, дан, гъæунги куд цудæй, уотемæй æ фæдбæл еу бафтудæй æма ’й цох нæбал уагъта. Силгоймаг цæхгæрмæ гъæунгмæ ку бахъæрдтæй, уæд уоми фæззилдæй. Лæг дæр – æ фæсте. Уæд силгоймаг æ цуд фæссабурдæр кодта æма лæги бафарста:
– Мæ фæдбæл ци бафтудтæ? Ци дæ гъæуй?
– Уарзгæ дæ кæнун…
– Дзæгъæли мæ бауарзтай. Мæ фæсте мæ хуæрæ æрбацæуй. Е мæнæй фондзинсæй хатти рæсугъддæр æй. Уой ку бауарзай, уæд дин хуæздæр уодзæнæй.
Нæлгоймаг сахълæуд фæккодта æма фæстæмæ раздах-тæй. Хъæбæр фудконд силгоймаги ку рауидта, уæд исмæст-гун æй æма фиццаги фæдбæл ниййарцæ ’й. Баййафта æй æма ’й фæрсуй:
– Цæмæн мæ расайдтай?
– Æма мæ ду цæмæн расайдтай? Æцæгæй мæ ку бауарзтайсæ, уæд æндæр силгоймагмæ нæ раздахтайсæ, мæнæй сæдæ хатти рæсугъддæр ку адтайдæ, уæддæр, – дзуапп ин равардта силгоймаг æма æ над раидарддæр кодта…
Аци искæсæйнаг таурæхъ уомæ гæсгæ æримистан, æма нæмæ берæ уæхæн лæгтæ ес, кæцитæ ести хецаугонд кенæ бонгин адæймаги фæдбæл ниййелæг унцæ, табедзитæ ин кæнунæй сæхебæл нæ ауæрдунцæ… Фал син еске æндæрей туххæй ку иской кæнуй, уой равгитæ агъазиаудæр æнцæ, зæгъгæ, уæд уой æрдæмæ фæуунцæ… Æма сæбæл уомæй сайд ку ’рцæуй, уæд ма бæргæ фæффæсмон кæнунцæ, фал… Нæ рагфидтæлтæ хумæтæги нæ зæгъиуонцæ: «Адæймаг зæрдæ æма зундæ æй!..»

Сергей МИРОНОВ, парти «Рæстаг Уæрæсе»-й раздзæуæг: «Уæрæсей Пенсион фонди кусти Нимайæн палатæ ци гъæндзийнæдтæ раргом кодта, етæ азари æфтаунцæ. Æнæмæнгæ гъæуй еци организаций кегъæредзийнадæй исуæгъдæ ун…»
– Цал хатти рагъæр æнцæ Пенсион фонди берæ азари æфтауæг миутæ. Æма? Æ разамундæй ин кедæрти феййевунцæ, дзуапп си некæмæй байагорунцæ, уотемæй. Фудракæндтитæ ба си, уæхуæдтæ ’й уинетæ, куд цудæнцæ, уотæ цæунцæ нерæнгæ дæр… Уомæ гæсгæ ба, гъуддаг ескæмæй исуæгъдæ унмæ ку æрхъæрта, уæд, æвæдзи, Пенсион фонд нæ, фал Нимайæн палатæбæл уодзæнæй цæф.

Иосиф РАЙХЕЛЬГАУЗ, театр «Нуриккон пьеси скъола»-й аййевадон разамонæг, – провинциалон театри директорти туххæй, кæцити еци бунæтти æвæрунцæ губернатортæ сæхе фæндонæй: «Еу халсарти базæн разамунд лæвардта. Иннæ ба ахæстдони сæргъи адтæй…»
– Æма уоми дессагæй ци ес? Нæ абони цард æцæг спектакль ку æй. Æ «сценæбæл» гъазгутæ ба ка ’нцæ? Мулкити фулдæр еугурадæмон хуар-дони сæргъи æма унаффæгæнæг син ка ’й, етæ. Кадæртæ си бадунцæ, кæми син бадгæй уоми, гъома, ахæстдони. Иннети дæр сæ фæдбæл барветдзæнæнцæ? Магъа-магъа… Цидæр æй, уæддæр ма абони сценæбæл æнцæ. Мах ба, хумæтæг дзиллæ театрдзаути хузæн сæмæ кæсæн æма гъенцъун кæнæн се ’наккаг миутæмæ гæсгæ…

Лев ЛЕЩЕНКО, зундгонд зартæгæнæг: «Абони еугурей дæр уотæ фæндуй, цæмæй сæмæ алцидæр уа, уотемæй ба уой туххæй архайунæй сæхецæн уоййасæбæл нæ зин кæнгæй. Фал уотæ нæ фæууй!..»
– Æгæр дæр ма фæууй!..
Зæгъæн, Левæ, уобæл некæд расагъæс кодтай, æма дин Цæгат Иристони адæмон артисти ном кæддæр цæй туххæй равардтонцæ? Уанæбæрæг цæмæй фескъуæлхтæ нæ республики аййевади æма дин уайтæккæ февардтонцæ, нæхе артисттæй беретæ æцæгæйдæр ке аккаг æнцæ, фал син цæмæдæр æвгъау кæнунцæ, еци цитгин ном?.. Е ба дин «уотæ нæ фæууй…»