Зундгонд куд ӕй, уотемӕй аци анз 19 сентябри Уӕрӕсей Федераций еугур регионти дӕр арӕзт ӕрцӕудзӕнӕй гъӕлӕс кӕнуни Еумӕйаг бон. Ӕвзурст цӕудзӕнӕнцӕ Паддзахадон Думи депутаттӕ, кӕцидӕр рауӕнти ба бунӕттон хецаудзийнади оргӕнтӕмӕ ӕвзурститӕ. Еци ахсгиаг гъуддагмӕ нуртӕккӕ цӕуй берӕвӕрсуг цӕттӕгӕнӕн куст.

«АДӔМИ ӔУУӔНКИ АККАГ УН ГЪӔУЙ…»

Республикӕ Цӕгат Иристон-Аланий Сӕргълӕууӕги ихӕстӕ рӕстӕгмӕ ӕнхӕстгӕнӕг Сергей Меняйлойӕн ӕрӕги  фембӕлд адтӕй, Цӕгат Иристони Парламент ӕма муниципалон искондти минӕварадон ӕмбурдти кусти парти «Еугонд Уӕрӕсе»-й номӕй ка архайуй, еци депутатти хӕццӕ.

Ӕма ӕ радзубандий тӕккӕ фиццагидӕр бафӕдзахста, цӕмӕй  си алкедӕр е ‘взаргути размӕ дзуапп радта ӕ закъонӕвӕруйнади архайди, уӕдта, адӕми аллибони царди фарстатӕ лух кӕнунбӕл куд бакуста, уой туххӕй. Уӕхӕн фембӕлдтити рӕстӕг бӕлвурддӕрӕй исбӕрӕг кӕнун гъӕуй республики цӕргути фӕндӕнттӕ ӕма тухстаг фарстатӕ.

Уӕрӕсей Федераций Паддзахадон Думи депутатти ӕвзурститӕмӕ цӕттӕ кӕнунбӕл дзоргӕй, республики разамонӕг куд баханхӕ кодта, уотемӕй гъӕлӕскӕнуйнадӕ ӕма уой размӕ еугур организацион мадзӕлттӕ дӕр гъӕуама арӕзт цӕуонцӕ закъонӕвӕруйнади уагӕвӕрдти бундорбӕл, ӕргом ӕма ӕнаййеп фӕткӕбӕл.

– Адӕми хӕццӕ ӕнгом ӕмархайд кӕнун гъӕуй, – загъта Сергей Меняйло. – Районтӕмӕ балцитӕй еуей рӕстӕг бунӕттон цӕргутӕй фегъустон, ӕвзурститӕмӕ зӕрдиагӕй ке ‘нгъӕлмӕ кӕсунцӕ, уой. Цӕмӕн, зӕгъгӕ, сӕ ку бафарстон, уӕд мин равардтонцӕ уӕхӕн дзуапп: «Депутатти бунӕттӕмӕ ка тундзуй, уонӕй аллихузон агъаздзийнӕдтӕ ракоруни равгӕ нин уодзӕнӕй…» Фӕууй уотӕ дӕр, ӕма депутаттӕ ӕвзарӕн зилдти, фӕззиннунцӕ айдагъдӕр гъӕлӕс кӕнуни агъоммӕ. Мӕ гъудимӕ гӕсгӕ, уӕхӕн цаутӕн бунат гъӕуама ма уа. Алли депутат дӕр гъӕуама ӕ зӕрдӕбӕл дара, адӕми размӕ бӕрнондзийнадӕ ке хӕссуй, адӕм се ‘ууӕнкӕй фӕххайгин кодтонцӕ, ӕма алкӕци политик дӕр еци ӕууӕнки аккаг гъӕуама уа.

ӔВЗУРСТИТӔМӔ ЦӔТТӔ КӔНГӔЙ

Республикӕ Цӕгат Иристон-Аланий Центрон ӕвзарӕн къамиси сӕрдар Моргуати Жаннӕ республики журналистти хӕццӕ фембӕлди рӕстӕг куд фегъосун кодта, уотемӕй 19 сентябри Паддзахадон Думӕмӕ депутаттӕ ‘взарунӕй уӕлдай ма нӕ республики муниципалон искондти ӕмбурдтӕмӕ депутаттӕ ӕвзардзӕнӕнцӕ Алагири, Ӕрӕдони, Дигорай, Рахесфарси ӕма Горӕтгӕрон районти.

Мизур, Унал ӕма Гӕлиати гъӕути Ӕмбурдти минӕвӕрттӕмӕ ӕвзардзӕнӕнцӕ депутаттӕ. Гъӕути сӕргълӕугутӕ ӕвзардзӕнӕнцӕ Унали, Гӕлиати ӕма Мостиздӕхи. Чиколай гъӕуи Ӕмбурди минӕвӕрттӕмӕ депутат равзарунӕн арӕзт ӕрцӕудзӕнӕй уӕлӕнхасӕн ӕвзурститӕ.

Гъӕлӕс кӕнуни бон уодзӕнӕй 19 сентябри, фал Уӕрӕсей Федераций Центрон ӕвзарӕн къамиси унаффӕмӕ гӕсгӕ ӕвзаргутӕ гъӕлӕс кӕндзӕнӕнцӕ 17, 18 ӕма 19 сентябри. Ӕвзурститӕмӕ цӕттӕ кӕнуни ӕма сӕ куд ӕмбӕлуй, уотӕ исаразунӕн республики дзуапп дӕттуй Республикӕ Цӕгат Иристон-Аланий Центрон ӕвзарӕн къамис, нури уӕнгӕ арӕзт ӕрцудӕй 10 фӕзуатон ӕвзарӕн къамиси ӕма 335 ӕвзарӕн хаййи.

Ӕвзурститӕмӕ цӕттӕ кӕнуни рӕстӕг ӕвзарӕн къамисти унаффи гъӕлӕси барти хӕццӕ архайдзӕнӕй 3484 адӕймаги. Абони уӕнгӕ ӕвзурстити архайуни барӕ ес 32 политикон партийӕн.

Нӕ республики ӕвзурстити архайдзӕнӕнцӕ 25 политикон партий. Паддзахадон Думӕмӕ ӕвзурстити къохфинститӕ ӕнӕ ӕрӕмбурд кӕнгӕй, архайуни барӕ уодзӕнӕй 14 политикон партий кандидаттӕн.

Центрон ӕвзарӕн къамиси унаффӕмӕ гӕсгӕ, нӕ республики ӕвзарӕн бюллетентӕ кустгонд кӕми цӕуонцӕ, уӕхӕн комплекстӕ уодзӕнӕй 66. Еугур фӕзуатон ӕвзарӕн къамисти ӕма 335 ӕвзарӕн хаййи азгъунстити ӕвӕрд ӕрцӕудзӕнӕй видеокамеритӕ ӕма гъӕлӕс кӕнуни бон ӕвдист цӕудзӕнӕй Интернети дӕр.

Нӕ республики Сӕргълӕууӕги ихӕстӕ рӕстӕгмӕ ӕнхӕстгӕнӕг Сергей Меняйло фембалдӕй Уӕрӕсей спортивон гъӕбесӕй хуӕцуни Федераций президент Михаил Мамиашвилий хӕццӕ, кӕци ӕрӕги Цӕгат Иристони адтӕй косӕг балций. Уой фӕдбӕл ӕрмӕг кӕсетӕ 10-аг фарсбӕл.