Ахургӕнӕги Бони кадӕн ӕрӕги Республикӕ Цӕгат Иристон-Аланий Сӕргълӕууӕг Сергей Меняйло Евгений Вахтангови номбӕл паддзахадон академион театри кадгин хуӕрзеугутӕй исхуарзӕнхӕ кодта, нӕ республики скъолати ахургӕнӕги фӕллойнӕ кадӕ ӕма радӕй ка ‘нхӕст кӕнуй, фӕлтӕрти зонундзийнӕдти надбӕл ка ‘фтауй, еци ахургӕнгути. Ракодта син зӕрдиаг арфитӕ дӕр:

– Мӕнӕн мӕ царди кӕддӕриддӕр ахургӕнӕг устур бунат ахӕста ӕма ахӕссуй абони дӕр. Еци куст уӕлдай табуйагдӕр ӕй, уомӕн ӕма адӕймагӕн сувӕллони бонти ӕ ирӕзгӕ уоди гъомбӕладӕмӕ ахургӕнӕг бахӕссуй бӕсти рӕсугъддӕр менеугутӕ. Ниййергути фулдӕр хатт нӕ фӕййевдӕлуй ӕма сӕ сувӕллӕнтти ахургӕнгутӕ ӕма гъомбӕлгӕнгути евгед бакӕнунцӕ. Гъомбӕлгӕнӕги кой дӕр хумӕтӕги не ‘скодтан. 27 сентябри нӕ бӕстӕ исбӕрӕг кодта гъомбӕлгӕнӕги Бон. Ахургӕнӕг ӕма гъомбӕлгӕнӕгӕн ба сӕ ихӕстӕ еухузон ӕнцӕ. Алкӕмӕн дӕр ни адтӕй ахургӕнгутӕ, ӕма син мах сӕ фудӕбон бафедунӕн некӕд иссердзинан фӕрӕзнитӕ. Уӕлдай арфӕ кӕнун ахуради ветерантӕн, 30-40-50 ӕнзти дӕргъи ка косуй, уонӕн. Зин рӕстӕгути дӕр уӕ нифс некӕд расастӕй, фӕлтӕрти рохс дуйнемӕ хонунӕй некӕд бафӕлладайтӕ. Ӕма уин еугур Иристони цӕргути номӕй арфӕ кӕнун.

Уотемӕй Республикӕ Цӕгат Иристон-Аланий ӕскъуӕлхт ахургӕнӕги ном лӕвӕрд ӕрцудӕй Ирӕфи райони Секери астӕуккаг скъолай ирон ӕвзаг ӕма литератури ахургӕнгутӕ Гокъонати Ларӕ ӕма Дрети Тамарӕн, Брути скъолай биологий ахургӕнӕг Гулдати Салихатӕн, Ирӕфи райони поселок Советскийи скъолай ирон ӕвзаг ӕма литератури ахургӕнӕг Дзобати Аллӕн, Горӕтгӕрон райони Михайловски скъолай ирон ӕвзаг ӕма литератури ахургӕнӕг Дзӕрӕхохти Валентинӕн, Ирӕфи райони Чиколай 3-аг астӕуккаг скъолай райдайӕн кълӕсти ахургӕнӕг Хъарданти Ларисӕн, Дзӕуӕгигъӕуи 42-аг скъолай ирон ӕвзаг ӕма литератури ахургӕнӕг Хъӕцмӕзти Мӕдинӕн ӕма Ирӕфи райони Хӕзнидони скъолай математики ахургӕнӕг Чегемти Людмилӕн.

Никкидӕр ма иннӕ ведомствити хуӕрзеугутӕй ӕма реубӕлдаргӕ нисантӕй хуарзӕнхӕгонд ӕрцудӕнцӕ нӕ республики скъолати раззагдӕр ахургӕнгутӕ. Ахуради къабази косгутӕн ма арфитӕ Республикӕ Цӕгат Иристон-Аланий депутатти номӕй ракодтонцӕ Гутнати Аслӕнбег ӕма Ахургӕнгути профцӕдести сӕрдар Тезиати Таймураз.