Аци анзи тӕккӕ кӕрони цуппаринсӕй анзи ӕнхӕст кӕнуй Устур Фидибӕстон тугъди агъазиаудӕр цаутӕй еуебӕл – 1942 анзи декабри фӕстаг бӕнтти Дзӕуӕгигъӕуи алфамбулай бустӕги дӕрӕнгонд ӕрцудӕнцӕ немуцаг-фашистон ӕрдонгти барӕуадзӕ хӕйттӕ, 1943 анзи январи ба Цӕгат Иристон ӕнӕгъӕнӕй дӕр уӕгъдӕгонд ӕрцудӕй ӕрбалӕборӕг знагӕй.

Нӕ зӕрди ес Цӕгат Иристони зӕнхӕ немуцаг-фашистон ӕрдонгтӕй исуӕгъдӕ кӕнуни хабӕрттӕ ӕма цаути туххӕй ӕрмӕгутӕ анзи дӕргъи мухур кӕнун. Уонӕй еу кӕсетӕ нӕ газети абони номери 4-5-аг фӕрстӕбӕл.

15 феврали ба бӕрӕггонд цудӕй иннӕ ахсгиаг цау – ӕртиндӕс ӕма инсӕй анзей размӕ, 1989 анзи еци бон Советон Цӕдесмӕ ӕнӕгъӕнӕй дӕр ӕрбаздахтӕнцӕ, Афганистани зӕнхӕбӕл сӕ интернационалон ихӕс ка ӕнхӕст кодта дӕс анзей дӕргъи, Советон Ӕфсади еци хӕйттӕ. Ихӕсгонд адтӕй уоми 40-аг ӕфсади командӕгӕнӕг, Советон Цӕдеси Бӕгъатӕр Борис Громовӕн. Ӕма е еци тугъди хабӕрттӕ еугуремӕй хуӕздӕр зонуй. Уомӕ гӕсгӕ гъӕуама ӕ уӕхӕн гъудий хӕццӕ арази уонцӕ: «Еци бӕсти цаути фӕдбӕл берӕ ӕнӕбунати хабӕрттӕ имисунцӕ. Уоми тугъдон цаутӕ «советон-афгайнаг тугъд» ка хонуй, етӕ ӕгириддӕр раст нӕ ‘нцӕ, уомӕн ӕма Афганистанмӕ советон ӕфсӕддон хӕйттӕ бацудӕнцӕ еци бӕсти разамунди курдиадӕмӕ гӕсгӕ. Раст нӕ ‘нцӕ, уотӕ ка дзоруй, гъома, Советон Цӕдес фӕххуӕрди ‘й еци тугъди. Федарӕй ӕй зӕгъун: советон ӕфсӕддонтӕ кӕрӕй-кӕронмӕ ӕнтӕстгинӕй исӕнхӕст кодтонцӕ, сӕ размӕ ци ихӕстӕ ӕвӕрд адтӕй, уони!..»

Уомӕ гӕсгӕ ба иӕхсгин ан, еци тугъди ци советон ӕфсӕддонтӕ ӕма граждайнаг службӕгӕнгутӕ архайдтонцӕ, уони лӕгдзийнадӕ цитгин кӕнун, арфиаг си унӕй. Уой фӕдбӕл ӕй, мӕнӕ абони 2-аг фарсбӕл ци ӕрмӕг мухур кӕнӕн, е дӕр.