Астӕуккаг профессион ахуради бюджетон бунӕттӕ гъӕуама 1840-ӕй исхъӕртонцӕ 3048-ей уӕнгӕ. Уӕхӕн адтӕй ахурадӕ ӕма науки Министрадӕн республики Сӕргълӕууӕг Сергей Меняйлой амунддзийнадӕ.

Цӕмӕй астӕуккаг профессион ахурадӕ ӕхебӕл исхуӕца, уой туххӕй ибӕл аци анз бафтуйдзӕнӕй 11 нӕуӕг дӕсниади. Фӕззиндзӕнӕнцӕ Цӕгат Кавкази аграрон-технологон колледжи, Дзӕуӕгигъӕуи берӕфадуатгин, Цӕгат Иристони базарадон-экономикон, Мӕздӕги механикон-технологон, Дзӕуӕгигъӕуи электроники, Цӕгат Кавкази арӕзтадон, Дзӕуӕгигъӕуи политехникон, Мӕздӕги аграрон-промышленнон техникумти ӕма Елхотти берӕвадуатгин колледжи.

Ахурадӕ ӕма науки министр Алибегти Эллӕ куд радзурдта, уотемӕй сӕ зӕрди ес профессион ахуради хуӕрзгъӕдӕдзийнадӕбӕл бафтаун, уӕдта республики экономикӕн кадртӕ цӕттӕ кӕнун. Еци ихӕстӕ син сӕ размӕ исӕвардта республики Сӕргълӕууӕг. Ӕма сӕ исӕнхӕст кӕнуни туххӕй уавӕртӕ арӕзт цӕунцӕ.

– Сӕхецӕн астӕуккаг профессион ахурадӕ ка равзаруй, еци рауагъдонти бӕрцӕ фулдӕрӕй-фулдӕр кӕнуй. Архайӕн колледжтӕ ӕма техникумти профессионалон ахурадӕ нуриккондӕр ахурадон программитӕй ефтонг кӕнунбӕл, сӕ материалон-техникон равгитӕ син ӕнхӕстдӕр кӕнунбӕл, – загъта министр.

Еугур еци хабӕрттӕ ӕнтӕстгинӕй арӕзт цӕунцӕ федералон ӕма регионалон программити фӕрци, кӕцитӕ конд ӕнцӕ 2026 анзи уӕнгӕ.  Алибегти Эллӕ ма куд радзурдта, уотемӕй республикон бюджетӕй еци гъуддӕгутӕн радех кӕндзӕнӕнцӕ 50 миллион соми. Еци ӕхцайӕй айдагъ зӕронд ӕрмадзитӕмӕ нӕ базелдзӕнӕнцӕ, фал ма нӕугутӕ дӕр исараздзӕнӕнцӕ.

Национ проект «Ахурадӕ»-йи фӕрци фондз училищеми фӕззиндзӕнӕй 12 ӕрмадзи, баст ӕнцӕ аййевади хӕццӕ, информацион технологити, арӕзтади, гъӕууон хӕдзаради, социалон къабӕзти хӕццӕ. Аци анз уонӕн федералон бюджетӕй радех кӕндзӕнӕнцӕ 61 миллион соми, хуарз ефтонггонд ӕрмадзитӕ фӕззиндзӕнӕнцӕ Дзӕуӕгигъӕуи, электроники, Цӕгат Кавкази аграрон-технологон, Цӕгат Иристони медицинон колледжти, Цӕгат Кавкази арӕзтадон, Дзӕуӕгигъӕуи базарадон-экономикон техникумти.

Национ проекти фӕрци 2022-2024 ӕнзти республики фӕззиндзӕнӕй 39 ӕрмадзи. Фарӕ ба адтӕнцӕ 16 ӕрмадзи. Сергей Меняйлой хъӕппӕресӕй ахурдзаутӕн ес федар бастдзийнӕдтӕ кустдӕтгути хӕццӕ.

ГӔЛӔУТИ Наталья