Цæгат Иристони æрæги æ куст райдæдта, бæлвурд рæстæги æмгъудæй республики гъæути цæргутæн медицинон агъаз ке фæрци лæвæрд цæудзæнæй, уæхæн медицинон мобилон комплекс. Æ фиццаг пациенттæ ба уодзæнæнцæ Михайловски гъæуи цæргутæ. Алкæмæн дæр хуарз фадуат ес е ‘нæнездзийнадæ терапевт, невролог, уролог, гинеколог, УЗИ æма иннæ специалисттæмæ исбæрæг кæнунæн.

Нæуæг медицинон мобилон комплекси кусти хæццæ сæрмагондæй базонгæ ‘й нæ республики Сæргълæууæг Сергей Меняйло.

Цæлхитæбæл поликлиникæ æ дохтирти хæццæ Иристонмæ иссудæй Устур Новгородæй, æма дууæ къуæрей дæргъи косдзæнæй Михайловски гъæуи.

Нæ республики Сæргълæууæг медицинон мобилон комплекси кабинетбæл æрзилдæй, фæууидта куд косунцæ дохтиртæ уæхæн уавæрти, æма загъта:

– Аци проект, æнæмæнгæ, адтæй гъæугæ нæ республики цæргутæн. Уомæн æма, фæсвæд гъæути цæргутæй, беретæн сæ фадуат нæ амонуй, аллихузон дæсниади дохтиртæмæ районмæ кенæ сахари поликлиникитæмæ рандæун. Уæдта сæ къох дæр нæ амонуй, материалон æгъдауæй хъазар анализтæ раттун. Еци уавæр зæрдæбæлдаргæй, æрæги Сочий форуми дзубанди кодтан Устур Новгороди уæлдæр амунд медицинон мобилон комплекси компаний сæргълæууæг Юрий Протасови хæццæ æмгустади бадзурд бафинсуни туххæй. Бацæттæ кодтан еугур гъæугæ гæгъæдитæ. Аци анз алли къуæре дæр медицинон комплекс зелдзæнæй нæ республики районти идардгомау гъæутæбæл æма лæггадæ кæндзæнæй адæмæн.

Аци нæуæгдзийнадæ гъæугæ ке ‘й æма адæми æнæмæнгæ ке гъæуй, уомæ гæсгæ, Сергей Меняйло зæрдæ байвардта уæхæн медицинон комплекси машинттæ нæхе республикæн дæр исамал кæнунбæл ке байархайдзæнæнцæ, уомæй.

Еу – сувæллæнтти æнæнездзийнадæ скъолати бæрæг кæнунæн, иннæ ба – каргун адæмæн. Уомæй уæлдай, аци мадзал устур агъаз уодзæнæй диспансеризаций кустæн дæр. Рагацау онкологон незтæ рартасуни фæрци сæйги дæр афойнадæбæл исдзæбæхгæнæн ес.

Уомæй уæлдай ма Алагири райони гъæуама арæзт æрцæуа, сæйгæдæнттæн донгъæдæй аразгæ ка ‘й, уæхæн хуастæуадзæн завод. Сæйрагдæр си цæттæ кæндзæнæнцæ физраствор. Етæ хуарз фæндитæ ‘нцæ, æма бæргæ ку бантæсидæ сæ исæнхæст кæнун.

Фиццаг бон медицинон мобилон комплекси дохтирти кустæй испайда кодтонцæ дæсгай адæймæгутæ. Аци медицинон лæггæдтæ сæ еугуремæн дæр æнцæ лæвар.

Медкомплекс идарддæр косдзæнæй  Цæгат Иристони фæсвæд гъæути. Сæ кусти фæтки туххæй ба республики цæргутæн игъосун кæндзæнæй нæ республики æнæнездзийнадæ гъæуайкæнуйнади министрадæ.