Еу бонгин лæг исфæндæ кодта æ цъæх хæрæги киунуги кæсунбæл исахур кæнун: «Ахургæнæгæн» хуарз миздæй зæрдæ байвардта, фал уæхæн «æдулидзийнадæмæ» æ гъос неке дардта. Уæд еууæхæни фæззиндтæй уæхæн дæр. Æцæг рагацау байагурдта æ мизд æма загъта ахури æмгъуд – фондз æма инсæй анзи. Исарази æй бонгин.

Ахургæнæг ахургæнæн киунугутæ æлхæнунмæ туканмæ ку бацудæй, уæд ин тукангæс уотæ:

– Æдули дæ, æви ци? Хæрæг уасунæй уæлдай ку неци зонуй, уæд æй киунуги кæсунбæл куд исахур кæндзæнæ?!

– Фондз æма инсæй анземæ кенæ хæрæг мæлдзæнæй, кенæ ба æ хецау, – адтæй ахургæнæги дзуапп.

Аци таурæхъ бакæсгæй, æ фæсномуг медеси æцæгдзийнадæ ка балæдæра, е куд нæ расагъæс кæндзæнæй, цæйбæрцæбæл ирд æвдесæн æй, нæ абони цардиуаги хабæрттæн. Уæлдайдæр хецаудзийнади еуцæйбæрцæдæр ка æрфусун æй, уонæй кедæрти зундирахастæн. «Гъар», уæлдайдæр ба зингæ пайдайаг бунæтти æрбадгæй си алкедæр æ бæрни гъуддæгутæмæ, уæлæ хæрæг киунуги кæсунбæл исахур кæнунмæ ка бавналдта, еци ахургæнæги хузæн налат цæстингасæй кæсун байдайунцæ, гъома, рæстæг цæудзæнæй, æма мæ ихæстæ кенæ нæбал гъæудзæнæнцæ, кенæ ба мæ æндæр зæрдтагондæр кустмæ раййевдзæнæнцæ. Æма гъе уотемæй бонасадæнтæ кæндзæнæй, цилинмæ ’й, æцæгæйдæр, никки уодæнцойнæдæр бунатмæ нæ раййевонцæ. Гъе уомæ гæсгæ ба, кæд æма нæмæ еугур равгитæ дæр ес, цæмæй нæ хуæздæр исонибонмæ нæдтæ хуæрзбæзгæ уонцæ, уæд уæхæн æдзæлгъæдæ «бæрнон косгути» фудæй ба еугур къаппæ-къуппитæ ’й цанæбæрæг фæррæствæндаг уодзинан…

Клим Шипенко, режиссер – «Роскосмос»-и фæндæ орбитæбæл дуйней фиццаг аййевадон кинонивæ исесуни туххæй: «Мæн, гъай-гъай дæр фæндуй фæттæхун, Зæнхæбæл нерæнгæ фæййистон…»

Цæмæй æцæг фантастикæ исесай, уой туххæй орбитæмæ тæхун уоййасæбæл нæ гъæуй. Зæнхæбæл дæр иссерæн ес, космоси сæ койдæр кæмæн нæййес, уæхæн дессæгтæ. Зæгъæн, космоси «сау цъæсгитæ» ке хонунцæ, уонæй æнæфæууинд агъазиаудæр «сау цъæсгитæ» ес, зæгъæн, «Роскосмос»– хе медæгæ паддзахадон бюджетæй уордæмæ ци миллиардтæ цæуй, уонæн сæ зингæ-зингæдæр хай фæддунт уй, сæ фæд дæр нæбал рабæрæг уй корпораций «космосон талинги итигъдади…» Æ разамонæг Д. Рогозин (хецаудзийнади итигъдади кæми ба нæма бакуста!..») æхе куд æвудгинæй, æцæгæй, уотæ ’й?..

Андрей Каприн, Уæрæсей æнæнездзийнади министради сæйраг æнæштатон онколог: «Рак зундгонд æй недзамантæй ардæмæ. Уомæй рамардæнцæ Уæрæсей уæхæн архайгутæ, куд къниаз Владимир, Уруси киристон динбæл æфтауæг, æма Ярослав Мудрый…»

Уруси VI æноси дзæбæхгæнгутæ кæд уæхæн диагнозтæ æвæрунгъон адтæнцæ, уæд си уогæ ба цæйбæрцæбæл бæрзонд адтæй медицини гъомусадæ. Уæдиккон анзфинститæ лæмбунæгдæрæй бакæсун гъæуй, кæдимайди ба си разиннидæ COVID-æй дзæбæх кæнуни рецепт.

Василий ШПАК, Уæрæсей промышленности æма базаради Министради радиоэлектронон промышленности департаменти директор – фæсарæйнаг туйтæ-шпионти туххæй: «Ес байвæрдтитæ. Цалдæр туййи фæууидтан микрофонти хæццæ. Хумæтæги туй. Микрофони хæццæ…»

Лæдæрд æй, микрофони хæццæ туйтæ – фæсарæнтæй æрбаласгæ, динамикти хæццæ – фидибæстон….Фал нур министрадти ка бадуй, уотемæй экономикон хæдзарадон æма æндæр паддзахадон сосæгдзийнæдтæ (фулдæр хæттити – сосæггагæй-сосæггагдæр!..) фæсарæнтæмæ ка уæйæ кæнуй, уони ба циуавæр туйтæ исхонæн? Кенæ ба циуавæр туйтæ исхонæн ес, знаги цæстæй нæмæ ци паддзахæдтæ кæсунцæ, уонæми, нæ бæрзондибадæг чиновниктæй ке цæуæт ахур кæнунцæ, кенæ цæрунцæ, уони? Кедæрти къохти си æнцæ нæ паддзахадон сосæгдзийнæдтæ, æма уонæй си цидæртæ ецирдигон сæрмагонд службитæ нæ «æрдоцунцæ», е уи æруагæс кæнуй. Гъе уæхæн туйтæ…